Rüstəm İbrahimbəyovun açıqlaması onun antiazərbaycançı mövqedə olduğunu bir daha təsdiqlədi

Erməni sevgisini gizlədə bilməyən bu şəxsi artıq Azərbaycan xalqı Əkrəm Naibovla birlikdə itirdi

Yenə də erməni sevgisi, erməni xislətinə uyğun yanaşma və insanları təslimçi sülhə çağırış. Burada təəccüblü heç nə yoxdur. Çünki bu, Rüstəm İbrahimbəyovun dəyişməz simasıdır. Azərbaycan xalqı artıq bu şəxsi Əkrəm Naibovla birgə dəfn edib. Rüstəm İbrahimbəyov ermənini bizə düşmən hesab etmir. Bu azmış kimi, kinorejissor son açıqlamasında Dağlıq Qarabağın Azərbaycana məxsusluğunu şübhə altına alır, torpaqlarımızın hərbi yolla işğaldan azad edilməyini cinayət adlandırır.

Rüstəm İbrahimbəyov son açıqlamasında deyir: "Mən əminəm ki, erməni xalqı bizə düşmən deyil. Onlar da azərbaycanlılar kimi, baş verənlərin qurbanıdır. Hər iki tərəf - həm Azərbaycandakı, həm də Ermənistandakı əhali köçmək məcburiyyətində qalıb. İnsanları orduya çağırırlar və onlar öz Vətən borclarını yerinə yetirməlidirlər. Mən onları bu borcu yerinə yetirməyə çağırmıram. Daha vacib olanı kitabları yandırmamaq və iki millətin bir-birini əbədi olaraq düşmən kimi görməməsidir".

Əsrlər boyu Azərbaycan xalqına düşmən olan, soyqırımı aktları, faciələr törədən, bələkdəki körpələri süngüyə keçirən erməni quldurları deyilmi?! Məgər R.İbrahimbəyov tarixi bu qədərmi saxtalaşdıra bilər? O çox gözəl bilir ki, bu millətin başına gətirilən bütün oyunlar, qətliamlar, etnik təmizləmə əməliyyatları, torpaqlarımızın işğalı məhz erməni daşnaklarının cinayətidir.

R.İbrahimbəyovun digər fikirlərinə diqqət yetirin: "Azərbaycan və Ermənistan vaxtilə bir dövlət olublar. Nə qədər ki, biz bir dövlətdə yaşayırdıq, heç bir torpaq iddiaları yox idi. Bunlar yalnız arzu xarakteri daşıyırdı, nəinki hərbi əməliyyat məqsədi. Onlar Qarabağı özlərininki, biz də öz torpağımız sayırıq. Məncə, bu, müzakirə mövzusudur. Bu, danışıqlar və elmi araşdırmalar mövzusudur".

Bu fikirləri ilə R.İbrahimbəyov tarixi saxtalaşdıran Ermənistanın Qarabağı öz torpağı sayması ilə bağlı iddialarına haqq qazandırmırmı? Doğrudanmı, ermənilərin torpaq iddiaları olmayıb və ya bunun müzakirəsinə ehtiyac varmı?

Azərbaycan Prezidenti İlham Əliyev dəfələrlə beynəlxalq konfranslarda, keçirdiyi bütün görüşlərdə birmənalı olaraq deyir: "Azərbaycanın ərazi bütövlüyü bütün dünya tərəfindən tanınır. Azərbaycanın ərazi bütövlüyü danışıqlar mövzusu deyil, ola da bilməz. Dağlıq Qarabağ münaqişəsi beynəlxalq hüquq normaları, Azərbaycanın ərazi bütövlüyü əsasında həllini tapmalıdır. Azərbaycan məsələnin ancaq beynəlxalq hüquq normaları əsasında həll olunmasını məqbul hesab edir. Beynəlxalq təşkilatların qərar və qətnamələri qeyd-şərtsiz icra edilməlidir". Məhz bu qətiyyətli addımlardan sonra dünya birliyi Azərbaycan həqiqətlərini qəbul edərək ölkəmizin ərazi bütövlüyünü tanıdığı halda, R.İbrahimbəyov utanmadan bunun müzakirə mövzusu olduğunu dilə gətirir. Bunlar yalnız Ermənistanda orta məktəblərdə keçilən dərsliklərdə yazıla bilər. Görünür, R.İbrahimbəyov erməni ədəbiyyatını, orta məktəb dərsliklərini tez-tez nəzərdən keçirərkən, hansısa "tarixçinin" fikirlərini bəyənib.

Xalqlar dostluğundan gen-bol bəhs edən Rüstəm İbrahimbəyov nəyə görəsə, 20 faiz ərazisi işğal olunmuş və 20 il ərzində işğal altında saxlanılan, 1 milyondan çox əhalisi yurdlarından didərgin düşən öz xalqı ilə xarici aqressorun arasında bərabərlik işarəsi qoyur. Sanki ermənilər də azərbaycanlılar kimi Qarabağ müharibəsinin zərərçəkənləridir.

Bu adam indi "Ziyalılar forumu" adlı qondarma qurumda təmsil olunur və özünü həmin aşağıladıqları millətin, ermənilərdən aşağı tutduğu xalqın ziyalısı kimi təqdim edir. Halbuki onun ermənipərəstliyi və erməni sevgisi elə bu açıqlamaları ilə sübuta ehtiyacı olmayan aksiomdur. 2008-ci ildə azərbaycanlı kinorejissorun rus mətbuatına verdiyi erməni həsrətli müsahibə əvvəllər azərbaycanlılarda təəccüb doğursa da, zaman keçdikcə bu təəccüb öz yerini qınağa və haqlı nifrətə verdi. Belə ki, Kinematoqrafçılar İttifaqının tədbirlərinə dəvətlilər müəyyənləşdirilərkən Rüstəm İbrahimbəyovun ağlına ilk olaraq ermənilər gəlirmiş. Bakıda keçirilən "Şərq-Qərb" festivalına R.İbrahimbəyovun daşnak partiyasının üzvü Roman Balayan və bakılı, sovet dövründə Azərbaycanda mövcud olan nazirliklərin birində çalışan Rudik Avanesovu dəvət etməsi də bunun bariz örnəyidir. Məlumata görə, R.Balayan Daşnaksütyun partiyasının fəallarındandır. Lakin Balayan R.İbrahimbəyovla möhkəm dostluq əlaqələri olan yeganə erməni deyil. Rüstəm İbrahimbəyovun erməni sevgisi, ermənilərlə işbirliyi hələ ötən əsrin 80-90-cı illərində bəlli idi. Hətta bu ərəfədə kinorejissor ermənilərin Bakını tərk etməsindən təəssüfünü də gizlətməmişdi.

Rüstəm İbrahimbəyovun ürəyindəki erməni sevgisi onun fəaliyyətində də aydın hiss olunur. Azərbaycan xalqının qürur yeri, dövlətimizin azadlığı uğrunda şəhid olan yüzlərlə vətən övladının dəfn olunduğu bir məkanda R.İbrahimbəyovun dostlarının istirahət edəcəyi restoran tikmək ideyasını başqa nə ilə izah etmək olar?! Xatırlatmaq yerinə düşər ki, R.İbrahimbəyov bir neçə il öncə Bakının mərkəzində "Kino evi" açmaq niyyətində idi. Sonradan bəlli oldu ki, Şəhidlər xiyabanının ətrafındakı meşə massivini əlinə keçirərək orada özünün biznes marağına xidmət göstərəcək restoranlar kompleksi tikmək niyyətində olan Rüstəm İbrahimbəyov, sən demə, kino adından sadəcə, istifadə edirmiş. Hətta Rusiyada bəzi dairələrlə də bu istiqamətdə danışıqlar aparan, özünə "sponsorlar" tapan, həmin ərazidə biznes və restoran şəbəkəsi yaratmağa çalışan Rüstəm İbrahimbəyovun növbəti dəfə Azərbaycanın milli-mənəvi dəyərlərinə münasibətini ortaya çıxarır. Onun üçün ən əsas məsələ biznes marağının təmin edilməsidir. Şəhidlər xiyabanı, milli dəyər belələrini əsla maraqlandırmır...

R.İbrahimbəyovun bu gün "siyasətə atılması"na səbəb də milli dəyərlərimizə qarşı yönəlmiş tamahkar biznes planlarının həyata keçirilməsinə izin verilməməsi olub. Beləliklə, göstərilən bu faktlar bir daha Rüstəm İbrahimbəyovun ziyalı deyil, saxtakar, eqoist, yalançı, milli dəyərləri heçə sayan, düşmənlə əlbir olan bir şəxs olduğunu təsdiqləyir. Belələrinin isə xalqımızın adından danışmağa heç bir haqqı çatmır.

Rəşad BAXŞƏLİYEV

Azərbaycan.- 2013.- 6 aprel.- S. 11.