Azərbaycan xarici mətbuatın diqqət mərkəzindədir

Bakıda İqtisadi Forumun keçirilməsi ölkəmizin reytinq göstəricisinin artdığının sübutudur

Azərbaycanın xarici siyasətdə nail olduğu uğurlar bu gün bütün dünyanı heyran edir, dövlətimizə olan etimadı artırır. İndi ölkəmiz ən nüfuzlu beynəlxalq qurumlarda təmsil olunur, səsi eşidilir.

Müstəqil Azərbaycan aparıcı beynəlxalq təşkilatlar çərçivəsində özünün maraq və mənafeyini maksimum dərəcədə təmin edib. Prezident İlham Əliyev Azərbaycanın beynəlxalq arenada nüfuzunun daha da yüksəlməsinə, müstəqil siyasət yeritməklə ölkənin milli maraqlarını maksimum səviyyədə təmin etməyə nail olub. Ölkədə aparılan məqsədyönlü tədbirlər nəticəsində Azərbaycan həm də dünya miqyaslı siyasi-mədəni kütləvi tədbirlərə ev sahibliyi edən mərkəzlərdən birinə çevrilib.

Belə mötəbər beynəlxalq siyasi tədbirlərin keçirilməsi üçün məhz ölkəmizin seçilməsi təsadüfi deyil. Azərbaycan qədim və zəngin mədəniyyətə, tarixə malik olması və müasir dünyanın siyasi səhnəsində oynadığı rola görə də bu cür tədbirlərin keçirilməsi üçün əhəmiyyətli məkana çevrilib. Bununla yanaşı, ölkəmizin sürətli inkişafı, dünya birliyində nüfuzunun artması ölkəmizdə siyasi anlaşmaya xidmət edən belə tədbirlərin keçirilməsini şərtləndirir. Bu isə, öz növbəsində, qloballaşan dünyada siyasi dialoqa, qarşılıqlı anlaşmaya kömək edir.

Təbii ki, bütün bu nailiyyətlər dünya mətbuatının diqqətindən yayınmır. Azərbaycanın bütün sferalarda sürətli inkişafı, qazandığı uğurları aparıcı beynəlxalq KİV-lərdə daim öz əksini tapır. Belə ki, müxtəlif beynəlxalq tədbirlərin keçirildiyi məkana çevrilən Azərbaycana təşrif buyuran dünya və Avropanın bir sıra nüfuzlu KİV təmsilçiləri qayıdarkən ölkəmizin inkişafına, xalqımızın qonaqpərvərliyinə, zəngin mədəniyyətinə heyranlıqlarını dəfələrlə vurğulayırlar.

Belə nəşrlərdən biri də ABŞ-ın nüfuzlu "Washington Times" qəzetidir. Qəzet "Müvəffəqiyyəti necə yaratmalı - Azərbaycandan nümunə" sərlövhəli məqalə dərc edib. Məqalənin müəllifi Rob Sübhani yazır: "Dünyanın diqqəti neftlə zəngin olan Venesuelanın həyatdan köçmüş lideri Uqo Çavesə yönəldiyi bir zamanda digər yarımkürədə 52 yaşlı İlham Əliyev nəzarət olunan iqtisadiyyatın azad və tərəqqi edən iqtisadiyyata transformasiyası üçün ölkəsinin böyük enerji resurslarından istifadə edərək öz dövlətini idarə edir. Sosializm Venesuelanın çox böyük potensialını dağıtdığı halda cənab İlham Əliyevin bazar kapitalizmini qəbul etməsi onun ölkəsini keçmiş Sovet İttifaqının Küveytinə çevirib. Son on ildə burada ümumi daxili məhsulun orta illik artımı 24 faiz olub".

Məqalədə həmçinin qeyd olunur ki, başqa dövlətlərdə antisemitizm hökm sürdüyü, İsrail vətəndaşları təqib olunduğu halda, Prezident İlham Əliyev Bakının mərkəzində sinaqoqlar və kilsələr açır. Müəllif terrorizmə qarşı mübarizədə Azərbaycanın etibarlığını vurğulayaraq senator Mak Keynə istinadla yazır ki, Əfqanıstanda Azərbaycanın xüsusi dəstələri mərdliklə və bacarıqla əməliyyatlar aparıblar.

Keçən ay Pakistanın nüfuzlu "Diplomatic Star" jurnalında isə "31 mart - 1918-ci ilin qanlı yaddaşı" sərlövhəli məqalə dərc edilib. Burada müəllif əsrlər boyu "böyük Ermənistan" xülyası ilə yaşayan erməni şovinistlərinin öz məkrli niyyətlərinə çatmaq üçün hər vasitəyə əl atdıqlarını, dinc əhaliyə qarşı misli görünməmiş cinayətlər törətdiklərini yazır.

Bu nəşrlər içərisində ən diqqət çəkəni "The Business Year" jurnalıdır ki, hansı ki bu nəşrin təşkilatçılığı ilə keçirdiyimiz günlərdə "Azerbaijan-2013" xüsusi buraxılışı işıq üzü görüb. Buraxılışda Prezident İlham Əliyevin uğurlu daxili və xarici siyasəti nəticəsində Azərbaycanın son dövrlərdə bütün sahələr üzrə qazandığı nailiyyətləri yer alıb.

Eyni zamanda Fransanın "France 24", Səudiyyə Ərəbistanının "Al Arabiya" telekanallarında, Pakistanın ingilisdilli "Daily Times", İtaliyanın "İl Messaggero" qəzetlərində dərc edilən xəbər və məqalələrdə Azərbaycanın dünyada artan nüfuzundan, iqtisadi və siyasi cəhətdən əldə etdiyi nailiyyətlərdən bəhs edilir.

Fərəhləndirici haldır ki, Bakı daha böyük bir beynəlxalq tədbirə ev sahibliyi edir. Aprelin 7-8-də Bakıda "Cənubi Qafqazın və Mərkəzi Asiyanın gələcəyi ilə bağlı strateji dialoq" mövzusunda Dünya İqtisadi Forumu (Davos Forumu) keçiriləcək. Forumu izləmək üçün dünyanın bir sıra nöqtələrindən jurnalistlər ölkəmizə gəlmişlər. İnanırıq ki, forum başa çatdıqdan sonra xarici KİV-lər növbəti dəfə ölkəmizin beynəlxalq müstəvidə artan nüfuzunu, Prezident İlham Əliyevin rəhbərliyi ilə həyata keçirilən iqtisadi islahatları qələmə almaqla dünya birliyinin Azərbaycana verdiyi yüksək qiymətin şahidi olacaqlar.

Elçin CƏFƏROV

Azərbaycan.-2013.-7 aprel.-S.5.