Azərbaycan Respublikası hökuməti və Albaniya Respublikası Nazirlər Şurası arasında əməkdaşlığa dair Saziş imzalanmışdır

Aprelin 8-də Azərbaycan Respublikasının Baş naziri Artur Rasizadə Albaniya Respublikasının Baş naziri Sali Berişanın başçılıq etdiyi nümayəndə heyəti ilə görüşmüşdür.

AzərTAc xəbər verir ki, Albaniyanın Baş naziri ilə bir il əvvəl keçirdiyi görüşü xatırlayan Baş nazir Artur Rasizadə ötən dövr ərzində ölkəmizdə baş verən sosial-iqtisadi inkişaf tendensiyaları barədə ətraflı məlumat vermişdir.

Baş nazir albaniyalı həmkarının Bakıda keçirilən Dünya İqtisadi Forumunda iştirakını yüksək qiymətləndirmişdir. A.Rasizadə bunu ölkələr arasında əməkdaşlıq əlaqələrinin daha da genişləndirilməsinə öz töhfəsini verəcəyinə əminliyini bildirmişdir.

Albaniyanın Baş naziri Sali Berişa Azərbaycanda müşahidə etdiyi qonaqpərvərliyə və belə bir mötəbər foruma ev sahibliyinə görə minnətdarlığını ifadə etmişdir. Forumun yüksək səviyyədə təşkil olunduğunu diqqətə çatdıran Sali Berişa Albaniyanın son illər Avropada baş verən iqtisadi böhrandan uğurla çıxdığını, hətta ölkəsinin sərmayələrin qoyuluşunda davamlılığı təmin edə bildiyini də vurğulamışdır. Qeyd edilmişdir ki, iqtisadiyyatın inkişafında yüksəliş əldə etmək üçün bir çox sahələrdə güzəştlər edilmiş, xüsusilə istehsal üçün ölkəyə gətirilən xammal vergidən azad olunmuşdur. Həmçinin kənd təsərrüfatı sahəsində istehsal olunan məhsullar da vergidən azad olunmuşdur.

Sonda Azərbaycan Respublikası hökuməti və Albaniya Respublikası Nazirlər Şurası arasında əməkdaşlığa dair Saziş imzalanmışdır.

Azərbaycan.- 2013.- 9 aprel.- S. 4.