Albaniya ilə Azərbaycan arasında enerji sahəsində əməkdaşlığın perspektivləri müzakirə olunmuşdur

Aprelin 8-də Azərbaycan Respublikası Dövlət Neft Şirkətində (ARDNŞ) Bakıda keçirilən "Cənubi Qafqazın və Mərkəzi Asiyanın gələcəyi ilə bağlı strateji dialoq" mövzusunda Dünya İqtisadi Forumunun iştirakçısı, Albaniyanın Baş naziri Sali Berişa ilə görüş keçirilmişdir.

AzərTAc xəbər verir ki, görüşdə Azərbaycan ilə Albaniya arasında münasibətlərin yüksələn xətlə inkişaf etdiyi bildirilmişdir.

Albaniyanın Baş naziri Sali Berişa ölkələrimiz arasında iqtisadi əlaqələrin, xüsusilə də neft-qaz sektorunda əməkdaşlığın böyük önəm daşıdığını diqqətə çatdırmış, qarşılıqlı tərəfdaşlığa mühüm əhəmiyyət verə biləcəyini vurğulamışdır. O, Bakıda keçirilən Forumun Azərbaycan ilə dünya ölkələri arasında iqtisadi əlaqələrin daha da dərinləşməsi baxımından əhəmiyyətini vurğulamışdır.

Qonaq Azərbaycanda hasil olunan təbii qazın Avropaya nəqli istiqamətində aparılan işlərlə maraqlanmış, Trans-Adriatik (TAP) layihəsinin gerçəkləşməsində rəsmi Tirananın maraqlı olduğunu qeyd etmişdir.

ARDNŞ prezidenti Rövnəq Abdullayev Azərbaycan qazının Avropaya nəqli istiqamətində TAP və "Nabucco-West" marşrutları üzrə təqdim edilmiş təkliflərin dəyərləndirilmə mərhələsində olduğunu bildirmişdir.

Görüşdə Azərbaycan ilə Albaniya ikitərəfli əməkdaşlığının perspektivləri haqqında geniş müzakirələr aparılmışdır.

Azərbaycan.- 2013.- 9 aprel.- S. 8.