TANAP layihəsi təkcə Türkiyə və Azərbaycana deyil, bütün regiona mənfəət gətirəcəkdir

"Xəzər regionundan qazın Avropaya nəqli layihəsi olan "Nabucco West" Trans-Adriatik qaz kəmərindən (TAP) daha iddialıdır".

AzərTAc xəbər verir ki, bu sözləri Bakıda keçirilən Dünya İqtisadi Forumunda iştirak edən Türkiyənin energetika və təbii ehtiyatlar naziri Taner Yıldız demişdir.

T.Yıldız bildirmişdir ki, Avropaya qaz tədarükü üzrə yekun marşrutunun seçilməsi zamanı nəqldən əldə edilən iqtisadi mənfəət nəzərə alınacaqdır. Bu mənada, "Nabucco West" daha iddialıdır.

Bununla belə, T.Yıldız qeyd etmişdir ki, yekun marşrutun seçilməsi haqqında qərar "Şahdəniz" konsorsiumu tərəfindən veriləcəkdir. Trans-Anadolu qaz kəməri (TANAP) layihəsinə gəlincə, nazir nəzərə çatdırmışdır ki, cari il ərzində bu layihə çərçivəsində konkret addımlar atılacaqdır. Xüsusilə hüquqi əsaslar yaradılacaq və torpaq işlərinə başlanılacaqdır. Hazırda TANAP qaz kəmərinin keçəcəyi dəqiq marşrutun təyin edilməsi üzərində işlər davam etdirilir.

Nazirin sözlərinə görə, bu layihənin həyata keçirilməsi təkcə Türkiyə və Azərbaycana deyil, həm də bütün regiona mənfəət gətirəcəkdir.

Azərbaycan.- 2013.- 9 aprel.- S. 8.