Qanna Qopko: “Azərbaycanda sürətli inkişafın şahidi oldum”

"Azərbaycanda sürətli inkişafın şahidi oldum. Bakıya səfərimdən çox məmnunam. Burada özümü vətənimdəki kimi hiss etdim".

Bu sözləri aprelin 7-də AzərTAc-a müsahibəsində Dünya İqtisadi Forumu (Davos Forumu) çərçivəsində Bakıda "Cənubi Qafqaz və Mərkəzi Asiya: 2020-ci ilə baxış" mövzusunda gənclər forumunun iştirakçılarının "Coca-Cola" şirkətinin rəsmiləri ilə keçirilən görüşündə iştirak edən Ukrayna Qeyri-Hökumət Təşkilatları Koalisiyasının əlaqələndiricisi, sosial əlaqələr üzrə elmlər namizədi Qanna Qopko demişdir.

Ukraynalı qonaq forumun əhəmiyyətini vurğulamış, bu platformada görüşün əməkdaşlıq əlaqələrinin inkişafında mühüm rol oynayacağını qeyd etmişdir. Alim gənclərin forumunda maraqlı məsələlər barədə müzakirələr aparıldığını da vurğulamışdır. Bakıya ilk dəfə gəldiyini deyən ukraynalı alim şəhərin gözəlliyindən, xüsusilə gecələrinin möhtəşəmliyindən söz açmışdır.

Qonaq Xəzər dənizi, İçərişəhər, Qız qalasının onda unudulmaz təəssürat oyatdığını qeyd etmişdir. Bu yerlərdən zövq aldığını deyən Q.Qopko Bakıda Şərq və Qərb elementlərini özündə birləşdirən memarlıq nümunələrinə heyran qaldığını, həm qədim, həm də müasir arxitekturanın valehedici olduğunu diqqətə çatdırmışdır.

O, forumdan sonra daha bir neçə gün Azərbaycanda qalacağını və ölkəmizlə yaxından tanış olacağını bildirmişdir.

Alim Azərbaycanın milli özəlliklərini əks etdirən xüsusi hədiyyələri özü ilə vətəninə aparacağını söyləmişdir.

Azərbaycan.- 2013.- 9 aprel.- S. 8.