Astanada rus dilində nəşr olunan “Kazaxıstanskaya pravda” qəzetində ulu öndər Heydər Əliyevin 90 illiyi ilə əlaqədar böyük məqalə verilmişdir

Astanada rus dilində nəşr olunan "Kazaxıstanskaya pravda" qəzetində Qazaxıstanın birinci Prezidenti Muzeyinin direktoru Alma Saqınqalinin Azərbaycan xalqının ümummilli lideri Heydər Əliyevin 90 illiyi ilə əlaqədar böyük məqalə verilmişdir.

Məqalədə deyilir ki, 2013-cü il Azərbaycan xalqının dövlətçilik tarixində xüsusi yer tutur. Bu il ulu öndər Heydər Əliyevin anadan olmasının 90 ili tamam olur. Heydər Əliyevin adı Azərbaycanın və postsovet məkanının yeni tarixinə qızıl hərflərlə yazılmışdır. Heydər Əliyev müasir Azərbaycan dövlətçiliyinin möhkəm əsaslarını qoymuş, milli dirçəliş və müstəqilliyin möhkəmləndirilməsi siyasətinin əsasını qoymuşdur və bu gün onun layiqli davamçısı bu siyasəti uğurla davam etdirir.

Yazıda qeyd olunur ki, Heydər Əliyev mürəkkəb geosiyasi şəraitdə öz zəngin dövlətçilik və idarəçilik təcrübəsi, istedadı, yüksək təşkilatçılığı, peşəkarlığı və tələbkarlığı sayəsində Azərbaycanı sosial-siyasi böhrandan çıxarmağa nail olmuş, ölkədə sabitliyi təmin etmişdir.

Müəllif yazır ki, Qazaxıstan və Azərbaycan prezidentlərini möhkəm dostluq telləri bağlayırdı. Prezidentlərin 2000-ci, 2002-ci və 2003-cü illərdə keçirdikləri görüşlərdə Dağlıq Qarabağ probleminin həlli, Xəzər dənizinin hüquqi statusu, Bakı-Tbilisi-Ceyhan əsas ixrac neft kəməri layihəsinin həyata keçirilməsi, ölkələrimiz arasında ticarət-iqtisadi sahədə əlaqələrin dərinləşdirilməsi kimi mühüm məsələlər daim diqqət mərkəzində olmuşdur.

Qazaxıstan Prezidenti Nursultan Nazarbayev Heydər Əliyev haqqında belə demişdir: "Heydər Əlirza oğlu Azərbaycan və qazax xalqları arasında dostluğun möhkəmləndirilməsi, həmçinin Müstəqil Dövlətlər Birliyinin inkişafı istiqamətində böyük işlər görmüşdür".

Məqalədə deyilir ki, ekspertlər Heydər Əliyevi əfsanəvi Şarl de Qolla müqayisə edirlər. Bu böyük şəxsiyyətlərin hər ikisi general olmuş və hər ikisi vətənlərinin xilası naminə öz çiyinlərinə dövlətin və millətin azad olunması kimi ağır bir yük götürmüşlər.

Müəllif Heydər Əliyevi "Azərbaycanın neft strategiyasının memarı" adlandırır, bu barədə oxuculara geniş məlumat verir.

Məqalənin sonunda bildirilir ki, Heydər Əliyevin 90 illik yubileyi ilə əlaqədar Qazaxıstanın birinci Prezidenti Muzeyində tematik sərginin keçirilməsi də nəzərdə tutulmuşdur.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.- 2013.- 9 aprel.- S. 10.