Ədliyyə orqanlarına qulluğa qəbulla bağlı sənəd qəbulu davam edir və namizədlər ilkin hazırlıq kursuna dəvət olunurlar

Məlumat verildiyi kimi, 2013-cü il fevral ayının 15-də ədliyyə orqanlarına qulluğa qəbulla bağlı növbəti açıq müsabiqə elan olunmuşdur və hazırda ərizələrin qəbulu davam edir.

Ədliyyə Nazirliyinin mətbuat xidmətindən AzərTAc-a bildirmişlər ki, müsabiqənin birinci mərhələsində - test imtahanında iştirak etmək üçün yalnız müvafiq ərizə ilə müraciət etmək kifayətdir. Əlavə məlumatları nazirliyin internet səhifəsindən (www.yustice.gov.az), eləcə də 538-01-62, 538-08-15 nömrəli telefonlar vasitəsilə almaq olar.

Nazirlik həmçinin bildirir ki, müsabiqədə iştirak edən hüquqşünasların test imtahanına və söhbət mərhələsinə mükəmməl hazırlaşmalarına, yüksək nəticələr əldə etmələrinə kömək məqsədilə Müsabiqə Komissiyası onlar üçün Ədliyyə Akademiyasında müvafiq hazırlıq kursu təşkil edir.

Cari il aprel ayının ikinci yarısından başlanacaq kursun tədris proqramı əvvəlki imtahanların təcrübəsi və namizədlər üçün zəruri olan sahələr nəzərə alınmaqla hazırlanmışdır.

Kursda iştirak etmək istəyən namizədlərin ərizələri Ədliyyə Akademiyasında (ünvan: Bakı şəhəri, Vidadi küçəsi, 158, telefon: 493-71-31) və ya Nazirliyin Kadrlar idarəsində qəbul olunur.

Test imtahanının vaxtı və yeri barədə əlavə məlumat veriləcəkdir.

Azərbaycan.-2013.-10 aprel.-S.7.