Azərbaycan ilə beynəlxalq banklar arasında əməkdaşlıq əlaqələrinin perspektivləri müzakirə olunmuşdur

"Cənubi Qafqazın və Mərkəzi Asiyanın gələcəyi ilə bağlı strateji dialoq" mövzusunda Dünya İqtisadi Forumunda iştirak etmək üçün Bakıya gəlmiş Asiya İnkişaf Bankının (AİB) Mərkəzi və Qərbi Asiya Departamentinin direktoru Klaus Gerhauser aprelin 9-da Azərbaycan Respublikasının Maliyyə Nazirliyində olmuşdur.

Nazirliyin mətbuat xidmətindən AzərTAc-a bildirmişlər ki, maliyyə naziri Samir Şərifov görüşdə Azərbaycan ilə AİB arasında əməkdaşlığın uğurla inkişaf etdiyini vurğulamış, mövcud kredit portfelinin qiymətləndirilməsi, yeni ölkə tərəfdaşlıq strategiyası, o cümlədən ölkəmizin Bank ilə birgə həyata keçirdiyi su, nəqliyyat və digər infrastruktur layihələri barədə müzakirə aparılmışdır.

K.Gerhauser Bakıda keçirilən Dünya İqtisadi Forumunun Azərbaycan ilə dünya ölkələri arasında iqtisadi əlaqələrin daha da dərinləşməsi baxımından əhəmiyyətini vurğulamışdır.

Elə həmin gün Dünya İqtisadi Forumunda iştirak etmək üçün ölkəmizdə olan Avropa Yenidənqurma və İnkişaf Bankı (AYİB) idarə heyətinin üzvləri ilə keçirilən görüşdə maliyyə naziri S.Şərifov Azərbaycan ilə AYİB arasında əməkdaşlığın müxtəlif istiqamətlərindən danışmış, respublikamızda həyata keçirilən yol-nəqliyyat kompleksinin və infrastrukturunun yenidən qurulması və digər məsələlər ətrafında fikir mübadiləsi aparılmışdır.

Azərbaycan.- 2013.- 10 aprel.- S. 4.