Azərbaycanda mövcud potensialın dünya elmi bazasında özünəməxsus yeri vardır

Bu barədə AzərTAc-a mərkəzi qərargahı ABŞ-ın Filadelfiya şəhərində yerləşən beynəlxalq "Thomson Reuters" şirkətindən daxil olmuş məktubda məlumat verilir.

Şirkətin Yaxın Şərq, Afrika, Rusiya və MDB ölkələri üzrə departamentinin rəhbəri Şahruz Şarifrazinin və qurumun Mərkəzi və Şərqi Avropa üzrə meneceri Devid Horkinin imzaladıqları məktubda deyilir ki, aparılmış araşdırmanın nəticələrinə görə, 2012-ci ildə Azərbaycanda elmi nəşrlərin ümumi sayında 9 faiz azalma müşahidə olunsa da, ölkədəki mövcud elmi potensial dünya elmi bazasında öz yerini qorumaqdadır. Bunu hesabat dövründə elmi nəşrlərin sayının azalmasına baxmayaraq, Azərbaycan nəşrlərindən istifadə edilən sitatların sayının 61 faiz artması da sübut edir. Bu da Azərbaycanda mövcud elmi potensialın inkişafını və onun düzgün istiqamətləndirilməsi zərurətinin olduğunu göstərir.

Məktubda bildirilir ki, elmi sahədə beynəlxalq əməkdaşlıq Azərbaycanın inkişafında mühüm rol oynayır. Müasir qloballaşan dünyada inkişafa dəstək məqsədilə bütün ölkələr elmi və texnoloji mübadilə proqramları işləyib hazırlayırlar. Bundan əlavə, universitetlər və digər təhsil müəssisələri tədqiqat işləri aparmaq, konfranslar keçirmək, elmi kitablar və jurnallar nəşr etməklə bu sahənin inkişafına dəstək olurlar.

Fəxri redaktorunun Tamer Başar (ABŞ), baş redaktorlarının akademiklər Əli Abbasov, Fikrət Əliyev (Azərbaycan) və Vladimir Larinin (Ukrayna) olduqları "Tətbiq və hesablama riyaziyyatı" jurnalı sitat göstəricilərinə görə "Thomson Reuters" şirkətinin hesabatında "dünya miqyasında keyfiyyətli elmi jurnal" hesab olunmuş və bu təşkilatın siyahılarına salınmışdır.

Nəşr olunduğu 11 il müddətində bu jurnal 42 ölkədən 200 beynəlxalq müəssisə ilə elmi mübadilə həyata keçirmişdir.

"Tətbiq və hesablama riyaziyyatı" jurnalı "Thomson Reuters" agentliyinin hesabatına salınmış yeganə Azərbaycan jurnalıdır. Agentliyin genişləndirilmiş siyahısında Türkiyənin 77, Rusiyanın 150-dən artıq jurnalı vardır.

Daha keyfiyyətli jurnallarla və digər nəşrlərlə Azərbaycanın elmi bazasının inkişaf etdirilməsi vacibdir.

"Thomson Reuters" agentliyi Azərbaycanın elmi inkişafına dəstək məqsədilə "Web of Knowledge" ("Biliklər şəbəkəsi") mənbələrinin bu ölkənin elmi ictimaiyyətinə açılması üçün danışıqlar aparıldığını və tezliklə bu məqsədə nail olunacağına ümid etdiyini bəyan edir.

Azərbaycan.- 2013.- 11 aprel.- S. 5.