Dövlət Sosial Müdafiə Fondunun sədri ölkənin şimal bölgəsində yaşayan vətəndaşlarla görüşmüşdür

Azərbaycan Respublikasının Prezidenti İlham Əliyevin tapşırığına əsasən, Dövlət Sosial Müdafiə Fondunun (DSMF) sədri Səlim Müslümov aprelin 10-da Xaçmazda bu rayonun, həmçinin ölkənin şimal bölgəsinin əhatə etdiyi Quba, Qusar, Şabran və Siyəzən rayonlarının sakinləri ilə görüşmüşdür.

AzərTAc xəbər verir ki, görüşdə iştirak edən vətəndaşlar əsasən pensiyaların hesablanması, stajla bağlı məsələlərə görə müraciət etmişlər. Bəzi sakinlər müvafiq arxiv sənədlərinin olmaması səbəbindən keçmiş sovet dövründə kolxoz və sovxozlarda işlədikləri müddətin əmək stajlarına əlavə edilməməsindən narazılıqlarını bildirmişlər.

Görüşdə 40-dan artıq vətəndaşın müraciətləri dinlənilmiş, onların problemləri ilə bağlı dərhal müvafiq tədbirlərin görülməsi üçün tapşırıqlar verilmişdir.

Səlim Müslümov bildirmişdir ki, bu ilin ortasından pensiyaların təyinatında avtomatlaşdırma sisteminə keçiləcəkdir. Bu sistemə görə sakinlər hətta evlərindən zəng edərək öz şəxsiyyət vəsiqələrinin nömrəsini deməklə avtomatik olaraq pensiya təyinatının aparılmasını təmin edə biləcəklər. Diqqətə çatdırılmışdır ki, bu, dünyanın aparıcı dövlətlərində tətbiq olunan sistemdir.

DSMF-nin sədri bildirmişdir ki, pensiyaların baza hissəsinin artırılması ilə bağlı fondun göstəriciləri yüksəlmiş, pensiyaların gecikdirilməsi halları tamamilə aradan qaldırılmışdır. Sədr daha sonra demişdir: "Belə olan halda pensiya artımlarının maliyyələşdirilməsi üçün kifayət qədər məbləğimiz vardır və yaxın bir neçə ayda bu məbləğ tamamilə formalaşacaqdır. Bu da pensiyaların baza hissəsinin artırılması məqsədilə dövlət başçısına müraciət etmək üçün şərait yaradır. Bütün hesablamalar göstərir ki, bir neçə aya pensiyaların baza hissəsinin artırılması realdır".

Səlim Müslümov vətəndaşlarla növbəti görüşünü aprelin 11-də saat 10.00-da DSMF-nin Sumqayıt şəhər şöbəsində keçirəcəkdir. Həmin gün DSMF-nin sədri Sumqayıt şəhəri, Abşeron və Xızı rayonlarının sakinləri ilə görüşəcəkdir.

Azərbaycan.- 2013.- 11 aprel.- S. 5.