İndiyədək Avropa Yenidənqurma və İnkişaf Bankı Azərbaycana 2,1 milyard ABŞ dolları kredit ayırmışdır

Bakı Biznes Mərkəzində ölkəmizdə səfərdə olan Avropa Yenidənqurma və İnkişaf Bankının (AYİB) Direktorlar Şurasının üzvləri ilə görüş keçirilmişdir.

Nazirliyin mətbuat xidmətindən AzərTAc-a bildirmişlər ki, görüşdən əvvəl AYİB nümayəndələri Bakı Biznes Mərkəzində Azərbaycanın sosial-iqtisadi uğurları barədə təqdimatla tanış olmuşlar.

Görüşdə iqtisadi inkişaf naziri Şahin Mustafayev AYİB-nin Direktorlar Şurasının ölkəmizə ikinci məsləhətləşmə səfərinin bank ilə Azərbaycan arasında uğurlu əməkdaşlığın göstəricisi olduğunu vurğulamışdır. Nazir Azərbaycanın bu əməkdaşlığa böyük önəm verdiyini və bank tərəfindən dövlət və özəl sektorun inkişafına göstərilən dəstəyin yüksək qiymətləndirildiyini qeyd etmişdir.

Bildirilmişdir ki, indiyədək 117 layihə çərçivəsində AYİB tərəfindən Azərbaycana 2,1 milyard ABŞ dolları kredit ayrılmışdır. AYİB-nin Azərbaycandakı kredit portfelinin şaxələndirilməsi üçün geniş potensialın olduğunu diqqətə çatdıran nazir Şahin Mustafayev bu baxımdan kənd təsərrüfatı, sənaye parklarının fəaliyyətinin dəstəklənməsi sahəsində bankın təcrübəsinin əhəmiyyətini vurğulamış və ölkəmizdə özəl sektorun inkişafına töhfə verən fəal maliyyə institutu kimi AYİB-ni özəl müəssisələrin birbaşa maliyyələşdirilməsi və səhm kapitalında iştirak üzrə fəaliyyətini daha da genişləndirməyə dəvət etmişdir.

Avropa Yenidənqurma və İnkişaf Bankının Direktorlar Şurasında Böyük Britaniya Birləşmiş Krallığından direktor Conatan Okenden Azərbaycanın qazandığı iqtisadi uğurların bankın diqqət mərkəzində olduğunu, AYİB və Azərbaycan arasında əlaqələrin bundan sonra da uğurla davam edəcəyinə əminliyini vurğulamışdır.

Görüşdə iqtisadi inkişaf naziri Şahin Mustafayev AYİB-nin Direktorlar Şurasının üzvlərinin Azərbaycan iqtisadiyyatına və ölkəmizin bankla əməkdaşlığına dair suallarını cavablandırmışdır.

Azərbaycan.- 2013.- 11 aprel.- S. 5.