Avropa Şurası Nazirlər Komitəsinin Demokratiya üzrə Məruzəçilər Qrupu Azərbaycan ilə əməkdaşlıqda maraqlıdır

Bakıda səfərdə olan Avropa Şurası Nazirlər Komitəsinin Demokratiya üzrə Məruzəçilər Qrupuna daxil olan bir neçə ölkənin səfirləri Milli Məclisdə Azərbaycanın Avropa Şurası Parlament Assambleyasındakı (AŞ PA) nümayəndə heyətinin üzvləri ilə görüşmüşlər.

AzərTAc xəbər verir ki, Azərbaycanın AŞ PA-dakı nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Avropa Şurasının Nazirlər Komitəsinin Demokratiya üzrə Məruzəçilər Qrupunun fəaliyyətinin əhəmiyyətindən danışmış və bildirmişdir ki, inkişaf edən Azərbaycan ilə işləyən hər bir qurumun obyektiv, şəffaf və qərəzsiz mövqeyi bizim üçün çox vacibdir. Azərbaycan qısa zamanda dünyada və regionda böyük nailiyyətlər əldə etmişdir. Paytaxt Bakı dünyanın siyasi liderlərinin, iqtisadiyyatı idarə edənlərin toplaşdığı beynəlxalq tədbirlərə ev sahibliyi edir. Bu günlərdə Dünya İqtisadi Forumunun Bakıda keçirilməsi buna əyani sübutdur.

Bildirilmişdir ki, Azərbaycanın müxtəlif sahələrdə əlaqələri daim genişlənir. Lakin, Avropa Şurasının tamhüquqlu üzvü olan Azərbaycanın torpaqlarının bu beynəlxalq təşkilatın digər üzvü Ermənistan tərəfindən işğal olunması, bu inkişafa ciddi mane olur və eyni zamanda bütöv bir regionda təhlükəsizliyə ciddi təhdiddir. Biz bu məsələdə Avropa Şurası Nazirlər Komitəsinin beynəlxalq hüququn aliliyinin təmin etməsini istəyirik. Bu istiqamətdə də əməkdaşlığa hazırıq.

Polşanın Avropa Şurası yanındakı daimi nümayəndəliyinin rəhbəri, səfir xanım Urszula Gaçek demişdir ki, Avropa Şurası Nazirlər Komitəsinin Demokratiya üzrə Məruzəçilər Qrupu Azərbaycan ilə əlaqələrin inkişafında və faydalı qarşılıqlı əməkdaşlıqda maraqlıdır. Nümayəndə heyətinin Bakıya səfərinin məqsədi Azərbaycandakı proseslərlə daha yaxından tanış olmaqdır. Səfirlər səfər çərçivəsində Bakıda bir neçə görüş keçirəcək və müzakirələr aparacaqlar. İnanırıq ki, Azərbaycan tərəfi ilə səmərəli əməkdaşlığımız daha da genişlənəcəkdir.

Sonra görüşdə Azərbaycan ilə Avropa Şurası arasında əlaqələrin inkişaf perspektivləri və digər məsələlər ətrafında fikir mübadiləsi aparılmışdır.

Azərbaycan.- 2013.- 11 aprel.- S. 6.