Ailə, qadın və uşaq problemlərinin həlli sahəsində Azərbaycan və Kanada əməkdaşlığının perspektivləri müzakirə olunmuşdur

Aprelin 4-də Ailə, Qadın və Uşaq Problemləri üzrə Dövlət Komitəsində (AQUPDK) Bakıda səfərdə olan Kanada-Azərbaycan parlamentlərarası dostluq qrupunun nümayəndə heyəti ilə görüş keçirilmişdir.

AzərTAc xəbər verir ki, görüşdə ailə, qadın və uşaq problemlərinin həlli sahəsində Azərbaycan və Kanada əməkdaşlığının perspektivləri müzakirə olunmuşdur.

Rəhbərlik etdiyi qurumun fəaliyyəti barədə məlumat verən AQUPDK-nın sədri Hicran Hüseynova Azərbaycan dövlətinin siyasətində ailə, qadın, uşaq problemlərinin həllinin prioritet istiqamətlərdən biri olduğunu söyləmişdir.

Azərbaycanda məqsədyönlü gender siyasətinin aparıldığını vurğulayan H.Hüseynova Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın qadınların sosial rolunun daha da artırılmasına, onların müxtəlif sahələrdə bərabərhüquqlu fəaliyyət imkanlarının genişləndirilməsinə, uşaq hüquqlarının tam həcmdə həyata keçirilməsinə və ailə dəyərlərinin möhkəmləndirilməsinə yönəlmiş fəaliyyətini xüsusi vurğulamışdır.

AQUPDK sədri müvafiq istiqamətlər üzrə xarici ölkələr, o cümlədən Kanada ilə əməkdaşlığın inkişafının xüsusi əhəmiyyətini qeyd etmişdir.

Kanada-Azərbaycan parlamentlərarası dostluq qrupunun sədri Barri Devolin AQUPDK-nın fəaliyyətini və Azərbaycanda reallaşdırılan dövlət qadın siyasətini yüksək qiymətləndirmişdir.

Azərbaycan.-2013.- 5 aprel.- S.5.