Mübarək səfərlər, unudulmaz görüşlər

Sizin rayon bildiyiniz kimi, respublikamızın ərazisində təbiət etibarı ilə, iqlim etibarı ilə, torpaq etibarı ilə gözəl guşələrdən biridir və böyük tarixə, böyük ənənələrə malik olan bir rayondur... Əsrlərdən-əsrlərə keçmiş tarixi abidələr, arxitektura abidələri, həm Lahıc, həm Basqal kəndinin timsalında, bütün sizin rayonun ərazisində olan başqa tarixi abidələrin timsalında özünü göstərir.

Heydər ƏLİYEV

Haqqın dərgahında müqəddəslər məqamında olan ulu öndərin pak ruhu qarşısında məsuliyyətimi dərk edərək əlimə qələm aldım. Dünya dəyərli insanın, yenilməz, fenomen rəhbərin, milli taleyimizi öz şəxsi taleyi kimi yaşamış ümummilli liderimiz Heydər Əliyevin İsmayıllıya səfərlərini yenidən yaddaşımda canlandırdım. İstədim ki, oxucular da tariximizin şərəfli səhifələrini vərəqləsinlər. Ulu öndərin hər bir rayonun timsalında insanlara necə səmimi, qayğıkeş, rəhbərlikdə necə qətiyyətli və güzəştsiz, qüdrətli və əvəzedilməz olduğunu duysunlar, dərk etsinlər. Bir daha yəqin edək ki, yüksəlişimiz, beynəlxalq nüfuzumuz, müstəqilliyimizin əbədiliyi, milli səadətimiz yalnız Heydər Əliyev yolunun yaradıcılıqla, ləyaqətlə, dəyanətlə davamından qaynaqlanır. Milli taleyimiz, sabahkı daha xoşbəxt, firavan həyatımız ulu öndər Heydər Əliyevin özü qədər inandığı İlham Əliyevin şərəfli adı ilə bağlıdır.

Milli qürurumuz, xəlqi rəhbərimiz Heydər Əliyevin İsmayıllıya səfərlərindən danışmağa başlarkən, əvvəlcə onu qeyd edim ki, onun bölgələrə etdiyi səfərlər həmin yerlərə sürətli inkişaf, yüksək rifah, zəngin sosial həyat gətirirdi. Əmək adamları ondan layiq olduqları dəyərli qiyməti alırdılar. Ulu öndərin respublikamıza rəhbərliyi zamanında neçə-neçə pambıqçı, üzümçü, maldar, sağıcı Sosialist Əməyi Qəhrəmanı adına layiq görüldü. Səfərlər rayonların abadlaşmasına, tikinti-quruculuq işlərinin geniş vüsət almasına yeni təkan verdi. Hər bir bölgənin insanları Heydər Əliyevin gəlişini səbirsizliklə gözləyir, onunla görüşməyi arzulayırdılar.

İsmayıllı əhalisi bu arzusuna 23 iyul 1981-ci ildə çatdı. Xalqın ümidgahı olan Heydər Əliyev Gəraybəyli kəndinin yaxınlığında Ağsu-İsmayıllı sərhədində qarşılandı. Sonra Xəlilli kəndində üzüm bağının kənarında əhali ilə görüş oldu. Ümummilli lider hər bir əməkçi ilə səmimiyyətlə, hərarətlə görüşdü. Səfərbəredici, insana qayğı ilə zəngin çıxış etdi. Sovxoz direktoru Hüseyn Səfərovu, sağıcı Sosialist Əməyi Qəhrəmanı Gülüstan Həsənovanı, qabaqcıl üzümçülər Elmira Əliyevanı, İnnab Babayevanı dinlədi. Yüksək əmək nəticələrini təqdir edən xoş sözlər dedi. Gəraybəyli və Xəlilliyə qaz çəkilməsi və sosial obyektlərin tikilməsi barədə verilən tapşırıq çox qısa müddətdə icra olundu.

Səmimi söhbət zamanı Elmira Əliyeva el atasına dedi:

- Hörmətli yoldaş Əliyev, bilmirəm, Sizə necə təşəkkür edim?! Heç fikrimə gətirməzdim ki, Siz becərdiyim üzüm bağında olarsınız. 12 uşaq anasıyam. Böyük qızım bu il ali məktəbi bitirib, rus dilindən dərs deyəcək. Həyat yoldaşım da sovxozda çalışır. Əlimizin zəhmətinə güvənib firavan yaşayırıq.

Heydər Əliyev razılıqla bildirdi:

- Belə ailə sahibi olduğunuz üçün sağ olun. Siz həm ailədə qəhrəmansınız, həm tarlada.

Kürdmaşı 1980-ci illərdə İsmayıllı təsərrüfatlarının üzümçülükdə flaqmanı idi. Ulu öndər burada üzümçülərlə, ağsaqqallarla görüşdü. Qulamalı kişi ilə Heydər Əliyevin görüş şəkli yerlərdəki fotolövhələrdə öncül yerdən asılmışdı. Kürdmaşı kənd sovetinin sədri Sənubər Zeynalova, sovxoz direktoru Tofiq Yəhyayev və partiya təşkilat katibi Zeynal Rüstəmov da bu görüşdə çıxış etmişdilər.

Bu görüşlər insanları qurub-yaratmağa, yüksək istehsal nəticələri qazanmağa, mənəvi ucalığa, vahid məqsəd uğrunda mübarizəyə səfərbər edirdi. Əməyi qiymətləndirilən zəhmət adamları xüsusi fədakarlıqla çalışır, qarşıya qoyulmuş vəzifələrin öhdəsindən ləyaqətlə gəlirdilər. 80-ci illərin rəqəmlərinə diqqət yetirdikdə hər kəs deyilənlərin şahidinə çevrilir.

1981-ci ildə rayonda 40860 ton, 1983-cü ildə isə 41800 ton taxıl, 38-586 ton kartof, 576-609 ton tərəvəz, 133-572 ton meyvə istehsal olunmuşdu. Üzümçülüyün inkişafı ümummilli liderin diqqətində olmuş, regionlarda sənayenin inkişafı daha çox üzüm emalı sayəsində təşəkkül tapmışdı. İsmayıllıda 1981-ci ildə 49922 ton, 1982-ci ildə 55308 ton, 1984-cü ildə isə 80346 ton üzüm istehsal edilmişdi. Bu rəqəmlər təkcə şərab istehsalının artımı deyildi. İnsanların pul gəlirinin artımı, həyat səviyyəsinin yüksəlməsi idi, yeni-yeni evlərin tikintisi, çoxsaylı minik maşınlarının alınması idi. Buna görə də rifahı durmadan yüksələn İsmayıllı əhalisi ulu öndər Heydər Əliyevə minnətdar idi.

Həmin gün ölkə rəhbəri " Zəka" kitab evinin açılışını etmiş, indiki RİH, maliyyə idarəsi və sosial müdafiə mərkəzinin yerində olan, müasir üslubda tərtib edilmiş ticarət cərgəsinə baxmış, görülən işləri bəyənmişdi. Kitab evinin açılışı zamanı dərin zəka və qlobal düşüncə sahibi Heydər Əliyevin dediyi tarixi, elmi və siyasi əhəmiyyətli sözləri bütün xalqımız üçün dəyərini nəzərə alıb oxucuların diqqətinə çatdırmaq istərdim: "Yoldaşlar, yaraşıqlı, həm daxili, həm xarici gözəl olan, xüsusi zövqlə tikilmiş bu kitab evinin istifadəyə verilməsi münasibətilə inşaatçılara öz razılığımı bildirirəm. Düzdür, tikmişiniz, indiki işin xeyri və gələcək səmərəsi bu kitab evindən necə istifadə edəcəyinizdə özünü göstərəcək. Onu bilməlisiniz ki, bu, kitab sərgisi deyil, bu ev istifadə edilmək üçündür. Kitab evi siyasi ədəbiyyatı yaymaqda xüsusilə təşəbbüskar olmalı, bədii, elmi, texniki kitabların təbliğatı sahəsində çox iş görülməlidir. Mən arzu edərdim ki, bu kitab evi sizin mədəni həyatınızda , mənəvi dünyanızda böyük rol oynasın, sizi cəmiyyətimizin ən xeyirli adamı olmağa çağırsın, yaxşı işləməyə səsləsin."

Ulu öndərin o zamankı tapşırıqları bu gün də ismayıllılıların yolunu nurlandırır, milli-mənəvi dəyərlərə istinadən mədəni həyatını zənginləşdirir. Müdriklik zirvəsinin fatehi olan ulu öndərin siyasi-ideoloji irsi İsmayıllı sakinləri tərəfindən onun vəsiyyətlərinə uyğun öyrənilir, həyatda baş verən proseslərdən baş çıxarmaq üçün həmin zəngin irsə müraciət edilir.

Bir səmimi görüş barədə də yaddaşlara həkk olunanları qeyd etmək istərdim. Ticarət cərgəsinə baxandan sonra Heydər Əliyev indi abidəsi ucalan meydana gəldi, toplaşanlarla səmimi görüşdü. 97 yaşlı Məşədi Kərim kişi ilə daha mehriban salamlaşaraq soruşdu:

- Kişi, neçə yaşın var?

- 97 yaşım var, sağlığına hələ də işləyirəm.

- Yüz yaşına gələk. Dolanışığın necədir?

- Lap yaxşı. Sənin kimi kişi olan yerdə hər şey yaxşı olar! Sənin də 100 yaşın olsun!

Mehribanlığından sevdiyi xalqa həyat eşqi bəxş edən ulu öndərin Məşədi Kərim baba ilə söhbəti mənəvi xəzinə kimi onun yeni-yeni nəsillərinə ötürülür.

Muğanlı-İsmayıllı yolunun çəkilişində, xüsusilə, Girdiman çayı üzərində salınan körpüdə çalışan inşaatçılar ulu öndərlə, hərarətlə görüşdülər. Yol-nəqliyyat naziri R.Xələfov işlərin gedişi barədə Heydər Əliyevə məlumat vermişdi.

Heydər Əliyevin bir neçə yerdə Girdiman çayı üzərindən saldırdığı körpülər dağ zonasında yaşayan insanları sellərdən, sulardan xilas etmişdi. Həmin körpülər el arasında onun şərəfli adı ilə adlandırılır.

Körpüdə çalışan fəhlələrin bu gün də yaşamaqda davam edənləri əllərində ulu öndərin əllərinin hərarətini hiss edirlər. Çünki o, hər bir fəhlə, hər bir mühəndislə əl-ələ görüşmürdü. Ona gül verən gül balaları bağrına basmışdı! İnşaatçılara müraciət edərək demişdi: "Siz çox xeyirxah iş görürsünüz. Diqqət verin ki, tikdiyiniz körpüdən bütün illər uzunu milyonlarla insan keçəcəkdir. Gərək çalışasınız ki, işiniz keyfiyətli olsun. Tikdiyiniz körpüdən keçən hər kəs sizə "əhsən" desin!"

Körpülər tikildi, Girdiman çayı ram edildi, hamı rahatlıq tapdı. Qədirbilən insanlar bu xeyirxah əməl sahibinə, bu mərhəmətli insana, milli xilaskarımız olan Heydər Əliyevə rəhmət diləyirlər. Onun müəyyən etdiyi yolla yaşamağı, işləməyi, dövlətə xidmət etməyi özlərinə vətəndaşlıq borcu bilirlər.

24 iyul 1981-ci ildə rayon mədəniyyət evində fəallar yığıncağı olmuş, ümummilli lider Heydər Əliyev hər bir iştirakçıda daxili bir səfərbərlik yaradan, insanları daha böyük uğurlara yönəldən nitq söyləmiş, rayon rəhbəri Qəşəm Aslanovun timsalında İsmayıllıda gedən işləri təqdir etmiş, çox dəyərli tapşırıq və tövsiyələrini vermişdi. Təsərrüfat işləri ilə yanaşı, ümummilli liderimiz sosial problemlərin həlli yollarından, mədəniyyətimizin inkişafından, kəndlərin daha da abadlaşdırılması və yaxşı yaşamaq üçün bütün şəraitin yaradılması zəruriliyindən, Lahıc qəsəbəsinin tarix-mədəniyyət qoruğu elan olunmasından, tarixi abidələrə qayğılı münasibətin formalaşmasından elmi-təhlili səviyyədə danışaraq demişdi: "Mən bu gün yol-nəqliyyat naziri Rafiq Xələfova və yoldaş Aslanova ciddi göstəriş verdim ki, gələn ilin üçüncü kvartalda Lahıc yolu tamamilə tikilsin, bütün körpülər istifadəyə verilsin. Burada Lahıca getmək üçün, bütün nəqliyyat vasitələri ilə getmək üçün tam yaxşı şərait yaradılsın".

Yol çəkildi, dağ camaatı rahat həyata başladı, gediş-gəliş asanlaşdı. Artıq bu zaman milli iftixarımız, beynəlxalq təmsilçimiz Heydər Əliyev daha geniş miqyasda Azərbaycanı təmsil edirdi. Moskvada idi. Lahıc sakinləri minnətdarlıq teleqramlarını və məktublarını oraya ünvanlayırdı.

Ümummilli lider İsmayıllıya ilk səfəri zamanı turizmin perspektivini, respublikamızın tarixinin öyrənilməsi və təbliğini ideoloji işin ən vacib istiqaməti kimi çox aydın görürdü. Qeyd edirdi: "Vəzifələriniz ondan ibarətdir ki, rayonun ərazisində olan bütün tarixi abidələrin hamısını bərpa edəsiniz, yenidən qurub abadlaşdırasınız. Onları qoruyasınız və onlardan indi bizim gənc nəslin tərbiyəsi üçün, ümumiyyətlə, respublikamızın tarixini təbliğ etmək üçün səmərəli istifadə edəsiniz. Rayon təbiətcə çox gözəl rayondur. Gözəl meşələri, dağları, çayları, bulaqları var. Bunlar hamısı doğrudan da, istirahət üçün, turizm üçün çox yararlıdır".

İndi İsmayıllıya ildə 50 mindən çox turist gəlir. Lahıc beynəlxalq turizm marşrutuna daxil olur. Qədim qəsəbə memarlığı, məişət mədəniyyəti, mənəvi dəyərləri ilə birgə qorunur, rayonun hər bir tarixi abidəsi, tikilisi tanınır, tanıdılır. Bu onun nəticəsidir ki, fenomenliyi dünyaya bəlli olan ümummilli liderimizin vəsiyyətlərinə məsuliyyətlə əməl edilir.

Fəallar yığıncağındakı nitqinin başlanğıcında bölgəmizə böyük qiymət verən Heydər Əliyev demişdi: "Sizin rayon, bildiyiniz kimi, respublikamızın ərazisində təbiət etibarı ilə, iqlim etibarı ilə, torpaq etibarı ilə gözəl guşələrdən biridir və böyük tarixə, böyük ənənələrə malik olan rayondur". O həmin gün axşam rayonun daha gözəl bir məkanına - İvanovkaya getmiş, təntənəli yığıncaqda N.Nikitinin sədr olduğu kolxoza Qırmızı Əmək Bayrağı ordeni təqdim etmişdi. Yaxşılıq və xeyirxahlıq üçün yaranmış ulu öndər İsmayıllıda xalqa məhəbbət missiyasını davam etdirirdi.

25 iyul 1981-ci ildə İvanovkadakı Kalinin adına kolxozun təcrübəsi əsasında "Heyvandarlığı və yemçiliyi əsaslı surətdə yüksəltmək yolları" barədə respublika seminar-müşavirəsi keçirilmişdi. Bütün rayonların birinci katibləri, icraiyyə komitəsi sədrləri seminarda iştirak etmiş, ümummilli liderin yüksəlişin əsası olan tapşırıqlarını almışdılar. Seminara rəhbərlik edən Heydər Əliyev demişdi ki, məqsəd Kalinin adına kolxozda toplanmış təcrübəni öyrənmək və sonra geniş yaymaqdır. Seminar iştirakçıları, xüsusən, heyvandarlıq və yem istehsalı mütəxəssisləri müzakirəyə böyük maraq göstərmişdilər. Onlar yem tədarük edilən sahələrdə, heyvandarlıq kompleksində, qarışıq yem hazırlanan sexlərdə olmuş, mal-qaranın yemlənməsini və süd sağımını müşahidə etmiş, yüksək nəticəli zootexniki və baytarlıq xidmətinin nəticələrini görmüşlər. Heydər Əliyev yekunda demişdir ki, seminar-müşavirə heyvandarlığı və yem istehsalını inkişaf etdirmək sahəsində işimizin yeni mərhələsinin başlanğıcı olacaqdır.

İvanovkada qazanılan qabaqcıl təcrübədə rayonun fəal iştirakı olmuşdur. Rayon rəhbərliyi oradakı kolxozun fəaliyyəti üçün həmişə münbit şərait yaratmış, hər bir yaxşı işini təqdir etmiş, başqa təsərrüfatlara nümunə göstərmişdi. Respublika müşavirəsinədək bir neçə dəfə qabaqcıl təcrübəni öyrənmək məqsədilə rayon miqyaslı seminar keçirilmişdi. Sosial-iqtisadı inkişafın, aqrar sahənin bütün istiqamətləri üzrə kamil mütəxəssis kimi tanınan Heydər Əliyevin rəhbərliyi ilə keçirilən seminar ümumilikdə İsmayıllıda heyvandarlığın inkişafına böyük təkan vermişdi.

1981-82-83-cü illərdə ət istehsalı 4762-4927-5142 ton, süd istehsalı 21250-22272-23052 ton olmuşdu. Yun və yumurta istehsalı da əhəmiyyətli dərəcədə artmışdı. Heyvandarlığın digər sahələrində də inkişaf yüksələn xətt üzrə getmişdir.

Ümummilli lider Heydər Əliyev ən çətin anlarda, taleyüklü məsələlərin həllində həmişə ürəkdən sevdiyi xalqının yanında olmuşdur. 1981-ci il noyabr ayının 30-da baş verən güclü zəlzələ nəticəsində əhali arasında qorxu yaranmışdı. Hamı evindən kənarda gecələyirdi. Dekabr ayının 5-də respublikamızın rəhbəri, xalqımızın ümidgahı Heydər Əliyev İsmayıllıya gəldi. Indiki Mübariz Orucov küçəsində, Mican, Mücühəftəran, Ruşan kəndlərində oldu. Evlərə baxdı, hamıya təskinlik gətirən, ümid verən sözlər dedi. Onun göstərişi ilə Nazirlər Soveti sədrinin müavini Əliş Ləmbəranski və birinci katib Qəşəm Aslanovun başçılığı ilə dəymiş ziyanın aradan qaldırılması məqsədilə qərargah yaradıldı. Ümummilli liderin təkidi ilə İsmayıllı barədə Ümumittifaq qərarı qəbul olundu, 22 milyon rubl vəsait ayrıldı. Görmədən təsəvvür etmək olmazdı ki, İsmayıllıya nə qədər tikinti materialı daşınır. Təkcə Müsüslü stansiyasında gündə 50-54 vaqondan tikinti materialları boşaldılır və rayona daşınırdı.

Ulu öndərin səfəri, əhali ilə qayğılı görüşü sanki qorxunu da aradan götürdü. Hamı evində gecələməyə başladı. Zəlzələ elə böyük dağıntılara səbəb olmamışdı, elə böyük ziyan vurmamışdı. Lakin nəticədə İsmayıllı içərisində yeni bir İsmayıllı, çoxsaylı sosial və istehsal obyektləri tikildi. Hündür mərtəbəli evlərin tikintisinə zəlzələdən sonra başlandı. Heydər Əliyevin rəhbər qüdrəti və qayğısı, insani böyüklüyü, xalqa məhəbbəti, milli taleyimizi yaşamaq məsuliyyəti İsmayıllıya, ismayıllılılara nicat gətirdi. Xalqının dar günündə onunla olmağı, harayına yetməyi özünün atalıq, oğulluq, böyüklük borcu bilən Heydər Əliyevin İsmayıllıya səfəri çoxlarının diqqətini bu bölgəyə yönəltdi. Bakı, Mingəçevir, Sumqayıt, Gəncə, Dərbənd zəlzələnin vurduğu ziyanı aradan qaldırmaqda rayona dost əlini uzatdı.

Təkcə 1982-ci ildə 16 milyon manatlıq tikinti-quraşdırma işləri görüldü. Bu da 1980-ci ildəkindən 4 dəfə, 1975-ci ildəkindən 13 dəfə çox idi. Birtipli layihə əsasında 18 məktəb, inzibati-binalar, uşaq bağçaları, uşaq xəstəxanası və poliklinikası, uşaq idman məktəbi, uşaq yaradıcılıq mərkəzi, bir neçə sənaye obyekti tikildi. Fərdi evlərin isə sayı-hesabı yox idi. Ev tikmək, təmir etmək istəyən kimsə heç bir çətinliklə üzləşmirdi. Dövlət bütün resurslarını İsmayıllıya yönəltmişdi. Tapşırıq ulu öndərdən gəldiyinə görə!

Ümummilli lider Heydər Əliyevin Şəki şəhərinə səfər edəcəyi xəbərini eşidən İsmayıllı sakinləri təbii ki, onunla görüşmək fürsətini əldən verməzdi. 08 noyabr 2002-ci ildə heç bir çağırış olmadan böyük insan kütləsi öz qəlbinin çağırışı ilə Nizami küçəsinin başlanğıcındakı meydana toplaşmışdı. Coşqun məhəbbətli insanları görən Heydər Əliyev nəzərdə tutulmayan dayanacaq etdi, əhali ilə görüşdü, yenə də İsmayıllı barədə xoş sözlər dedi: "İsmayıllı çox gözəl rayondur, mən buranı yaxşı tanıyıram, əhalisi çox zəhmətkeşdir. Azərbaycana rəhbərlik etdiyim o illərdə mən bu rayondan bir dənə də olsun mənfi şey eşitməmişdim. Təbiəti yaxşıdır, bütün ətrafı gözəl meşələr çaylardır. Indi Allah sizə belə gözəl yer nəsib edibdir".

Hər gəlişi, hər görüşü el bayramına çevrilən Heydər Əliyev burada da insanların yaşayış tərzi ilə maraqlandı, taxılçılıq, maldarlıq və üzümçülüyün inkişafı, emal müəssələrinin yaradılması ilə əlaqədar tapşırıq və tövsiyələrini verdi. Sonra Şəkiyə yola düşdü.

2002-ci ildə yolüstü görüşü zamanı Heydər Əliyev onu qarşılayanların ünvanına xoş sözlər demişdi: "Mən sizin hamınıza can sağlığı, bütün işlərinizdə uğurlar arzu edirəm və ümidvaram ki, sizin də hər birinizin, hər bir ailənin işləri get-gedə yaxşı olacaqdır."

Ruhu şad olsun müstəqilliyimizə əbədilik xarakteri verən Heydər Əliyevin! Onun müəyyən etdiyi yolla İsmayıllı inamla, dəyanətlə, ləyaqətlə irəliləyir. Adını daşıyan mədəniyyət mərkəzi yenidən qurulur, prospektdə abadlıq işləri davam etdirilir. Yaşayış binaları, uşaq bağçaları tikilir. Enerji təchizatı sistemi yenidən qurulur. İdarəetmə təkmilləşdirilir. İnsanların işləyib-yaşaması, sosial həyatının zənginləşməsi üçün yeni layihələr həyata keçirilir. Qüvvələr, imkanlar bilavasitə xalqa xidmətə yönəlir.

Hər səfərindən yeni bir inkişaf tarixi, yeni bir yüksəliş mərhələsi yaranan Heydər Əliyev 1981-ci ilin iyul ayında İsmayıllıya insanlara nur paylayan, görmək sevinci bəxş edən görkəmli oftolmoloq, ömür gün yoldaşı Zərifə xanım Əliyeva ilə gəlmişdi. İki gecə İvanovkada M.V.Nikitinin qonağı olmuşdular.

Mariya Orlova o günləri belə xatırlayır: "Nikitin gələn qonaqları mehmanxanaya dəvət etdi. Biz Zərifə xanımla kəndə çıxdıq, küçələrdə gəzdik. Mən evimdə Zərifə Əliyevanı çaya qonaq etdim. Mehmanxanaya qayıdan zaman yolda hamı ilə görüşür, hal-əhval tuturdu. Zərifə xanım insanlarla görüşdən çox razı qalmışdı".

Rayon partiya komitəsinin ikinci katibi işləyən Gözəl Osmanova da Zərifə xanım Əliyeva ilə görüşmüş, onu müşayiət etmişdi. O günləri yenidən yaşamaq üçün yaddaşını vərəqləyən Gözəl xanım deyir: "Zərifə xanımı müşayiət etmək mənə həvalə olunmuşdu. Tanışlığımız çox sərbəst və səmimi oldu. Bu sadə, səmimi, mehriban insan məndə ən xoş duyğuları yaradırdı. Həmin gün İvanovkaya mükafat təqdim olunacaqdı. İclas salonuna getdik. Sadəliyi və təvazökarlığı alimliyi qədər yüksək olan Zərifə xanım Əliyeva birincidə deyil, yeddinci sırada əyləşdi. Onun geyimi də, bəzək əşyaları da, nitqi də sadə idi. İlk baxışdan bu keyfiyyətlərinə görə adam onun yanında özünü sərbəst hiss edirdi. Ümummilli liderin İsmayıllıya səfəri Zərifə xanımın iştirakı olduğuna görə daha zəngin idi".

Bəli, ənənələr bu gün daha yaradıcılıqla davam edir. Möhtərəm Prezident İlham Əliyev bölgələrdə gedən işlərlə bilavasitə tanış olur, əhali ilə görüşür, hər bir rayonun vacib problemlərinin həlli üçün öz ehtiyat fondundan vəsait ayırır. Cənab İlham Əliyev baş nazir olarkən 2003-cü ildə, Azərbaycan Respublikasının Prezidenti olarkən 19 avqust 2005-ci ildə və 29 oktyabr 2009-cu ildə İsmayıllıya səfər etmiş, nailiyyətlərdən razı qaldığını bildirmişdi.

Biz bu gün ümummilli liderimizin əbədiyyətə qovuşmasından kədərlənsək də, Tanrı tərəfindən Azərbaycan dünyasına bəxş edilməsindən həmişə sevinc duyuruq!

Fərman BƏŞİROV,

təhsil veteran

Azərbaycan.-2013.- 13 aprel.- S.3.