Azərbaycanın və Çinin prokurorluq orqanları arasında Anlaşma Memorandumu imzalanmışdır

Aprelin 12-də Azərbaycan Respublikasının Baş Prokurorluğunda ölkəmizdə rəsmi səfərdə olan Çin Xalq Respublikasının Ali Xalq Prokurorluğunun baş prokuroru, Beynəlxalq Antikorrupsiya Qurumları Assosiasiyasının (İAACA) prezidenti Çao Cianminqin rəhbərlik etdiyi nümayəndə heyəti ilə ikitərəfli görüş keçirilmiş və müzakirələrin nəticəsi olaraq ölkələrimizin prokurorluq orqanları arasında əməkdaşlıq əlaqələrinin perspektivlərini müəyyənləşdirən Anlaşma Memorandumu imzalanmışdır.

Qonaqları salamlayan baş prokuror Zakir Qaralov xalqlarımız arasında formalaşmış zəngin tarixə malik və ildən-ilə daha da genişlənməklə dərinləşən ikitərəfli münasibətlərin inkişafında Azərbaycan və Cin xalqlarının sınanmış liderləri Heydər Əliyev və Tszyan Tszemin, sonrakı illər ərzində isə dövlət başçıları İlham Əliyev və Hu Cintaonun misilsiz xidmətlərini xüsusi qeyd etmişdir.

Diqqətə çatdırılmışdır ki, Çin Xalq Respublikası Azərbaycanın müstəqilliyini tanıyan ilk dövlətlərdən biri olmaqla Ermənistan-Azərbaycan, Dağlıq Qarabağ münaqişəsinin ölkəmizin ərazi bütövlüyü çərçivəsində beynəlxalq hüququn norma və prinsipləri əsasında həllinə tərəfdar olduğunu dəfələrlə bəyan etmiş, öz mövqeyini beynəlxalq qurumlarda bildirmiş, Azərbaycanın BMT-nin Təhlükəsizlik Şurasına üzv seçilməsini qətiyyətlə dəstəkləmişdir.

Azərbaycan Prokurorluğu və Çin Xalq Respublikasının Ali Xalq Prokurorluğu arasında Beynəlxalq Prokurorlar Assosiasiyası və İAACA çərçivəsində həyata keçirilən əməkdaşlığın əhəmiyyəti vurğulanmışdır. Xüsusi olaraq diqqətə çatdırılmışdır ki, Prezident İlham Əliyevin siyasi iradəsinə müvafiq olaraq ölkəmizdə korrupsiyaya qarşı mübarizənin səmərəliliyinin artırılması və bu sahədə beynəlxalq əməkdaşlığın genişləndirilməsi məqsədi ilə, 2006-cı ildə İAACA-nın yaradılması zamanı Azərbaycan bu təşəbbüsü fəal surətdə dəstəkləmiş və bu gün də ölkəmiz həmin təşkilatın işində fəal iştirak edir. 2008-ci ilin martında İAACA-nın İcraiyyə Komitəsinin iclasının və beynəlxalq konfransın Bakıda keçirilməsi və həmin təşkilatın vitse-prezidenti Azərbaycanın ədliyyə naziri Fikrət Məmmədov olması müsbət hal kimi dəyərləndirilmişdir. Azərbaycan Prokurorluğunun strukturunda Korrupsiyaya qarşı Mübarizə İdarəsinin yaradılmasını və son illər ərzində bu sosial bəlaya qarşı mübarizə sahəsində həmin qurum tərəfindən görülən işləri diqqətə çatdıran baş prokuror bu sahədə zəruri məlumatları özündə əks etdirən sənədləri qonaqlara təqdim etmişdir.

Azərbaycan və Çin Xalq Respublikası arasında 1999-cu ildə "Əməkdaşlıq haqqında" Sazişin imzalanması ilə təməli qoyulan və bu gün imzalanan Anlaşma Memorandumu ilə keyfiyyətcə yeni müstəviyə qaldırılan ikitərəfli əlaqələrin bundan sonra da yüksələn xətlə inkişaf edəcəyi və tərəflərə öz səmərəsini verəcəyinə inam ifadə olunmuşdur.

Görüşdə Çin Xalq Respublikasının Ali Xalq Prokurorluğunun baş prokuroru Çao Cianminq çıxış edərək göstərilən yüksək qonaqpərvərliyə görə dərin minnətdarlığını bildirmiş, ölkəmizin prokurorluq orqanları ilə sıx əməkdaşlıq əlaqələrinin yaradılmasında böyük maraqlarının olmasını diqqətə çatdırmışdır. Azərbaycan və Çin arasında əlaqələrin sıx olduğunu bildirən qonaq respublikamızın çox qısa zamanda yüksək nailiyyətlər əldə etməsini xüsusi qeyd edərək məhkəmə sisteminin müasirləşdirilməsi istiqamətində həyata keçirilən tədbirləri yüksək qiymətləndirmişdir.

Görüşdə hüquqi sahədə əməkdaşlıq üzrə faydalı fikir mübadiləsi aparılmış, beynəlxalq təşkilatlar çərçivəsində qarşılıqlı fəaliyyətin səmərəliliyindən, hüquqi əməkdaşlıq sahəsində mövcud müqavilə bazasının təkmilləşdirilməsindən danışılmış, tərəfləri maraqlandıran məsələlər müzakirə edilərək, iki ölkənin prokurorluq orqanları arasında qarşılıqlı münasibətlərin bundan sonra da uğurla davam etdiriləcəyinə əminlik ifadə edilmişdir.

Qonaqlar daha sonra Azərbaycan Respublikası Prokurorluğunun Tarix muzeyi ilə tanış olmuşlar.

AzərTAc

Azərbaycan.-2013.- 13 aprel.- S.8.