Mədəniyyət və Turizm Nazirliyində Rusiya Federasiyasının mədəniyyət naziri ilə örüş olmuşdur

Azərbaycan Mədəniyyət və Turizm Nazirliyində Moskva Dövlət Beynəlxalq Münasibətlər İnstitutu məzunlarının Birinci Ümumdünya Forumunda iştirak etmək üçün ölkəmizə gəlmiş, Rusiya Federasiyasının (RF) mədəniyyət naziri Vladimir Medinski ilə görüş olmuşdur.

AzərTAc xəbər verir ki, Azərbaycanın mədəniyyət və turizm naziri Əbülfəs Qarayev qonağı səmimi salamlamış, ona ölkənin mədəni həyatı haqqında məlumat vermişdir. Xüsusilə qeyd olunmuşdur ki, son illər ölkədə bir çox beynəlxalq mədəniyyət tədbirləri keçirilir.

Ə.Qarayev demişdir ki, Rusiyanın mədəniyyət müəssisələri ilə birbaşa sıx əlaqələrimiz yaranmışdır. Təcrübə bu cür əlaqələrin böyük fayda gətirdiyini göstərir. Son illər Azərbaycan Dövlət Rus Dram Teatrında Moskva teatrlarının qastrolları ənənəyə çevrilmişdir. Mayın 8-9-da burada Malı Teatrın qastrolları keçiriləcəkdir.

Rusiya Federasiyasının mədəniyyət naziri Vladimir Medinski qeyd etmişdir ki, Bakıya Prezident İlham Əliyevin dəvəti ilə Moskva Dövlət Beynəlxalq Münasibətlər İnstitutu məzunlarının Birinci Ümumdünya Forumunda iştirak etmək üçün gəlmişdir.

Rusiyalı nazir bu görüşün təşkilinə görə Prezident İlham Əliyevə minnətdarlığını bildirmişdir.

V.Medinski qeyd etmişdir ki, Moskva Dövlət Beynəlxalq Münasibətlər İnstitutu məzunlarının bir çoxu müxtəlif ölkələrin xarici işlər nazirliklərində işləyir. Onların birbaşa ünsiyyəti, şübhəsiz ki, ölkələr arasında əlaqələrin daha da möhkəmlənməsinə, qarşılıqlı anlaşmaya kömək edəcəkdir. Rusiya ilə Azərbaycan arasında mədəniyyət əlaqələrindən danışan RF-nin mədəniyyət naziri vurğulamışdır ki, hazırda bu əlaqələr yüksək səviyyədədir və müvəffəqiyyətlə inkişaf edir.

Azərbaycan.-2013.- 13 aprel.- S.9.