Naxçıvanda akademik Zərifə xanım Əliyevanın 90 illik yubileyi qeyd olunmuşdur

Aprelin 15-də Naxçıvan şəhərindəki Heydər Əliyev Muzeyində görkəmli oftalmoloq alim, akademik Zərifə xanım Əliyevanın 90 illik yubileyi qeyd olunmuşdur. Naxçıvan Muxtar Respublikası Ali Məclisinin Sədri Vasif Talıbov yubiley tədbirində çıxış etmişdir. Qeyd olunmuşdur ki, yaradıcı əməyi və böyük xidmətləri ilə Azərbaycan elminin və səhiyyəsinin tarixində silinməz izlər qoyan görkəmli alim, akademik Zərifə xanım Əliyevanın alim, həkim, pedaqoq və insan kimi yaşadığı mənalı ömrü, keçdiyi şərəfli həyat yolu nəsillərə mənəviyyat məktəbidir.

Ali Məclisin Sədri Vasif Talıbov bildirmişdir ki, bu böyük şəxsiyyətin keçdiyi həyat yoluna nəzər salarkən aydın görmək mümkündür ki, elmi tədqiqatların bacarıqlı təşkilatçılığı, dərin elmi düşüncə və parlaq pedaqoji istedad onun şəxsində üzvi surətdə qovuşmuşdur. Bu gün istisnasız olaraq demək mümkündür ki, Zərifə xanım Əliyeva həm həkimliyin, həm alimliyin, həm pedaqoqluğun, bunlarla yanaşı isə həm də insanlığın ali zirvəsinə yüksəlmişdir. Bütün bunlar nəyin hesabına qazanılmışdır? Şübhəsiz ki, şəxsiyyətin bütövlüyü əsas məsələdir. Zərifə xanımın həyat yolu işıqlı bir ailədən - böyük ziyalı və dövlət xadimi Əziz Əliyevin ailəsindən və ustad Cəlil Məmmədquluzadənin "Sahib - mənsəb ziyalıların məskəni" adlandırdığı Şahtaxtı kəndindən başlanmışdır. İstər dünyaya göz açdığı ailənin, istərsə də doğulduğu kəndin maarifçi mühitinin ənənələrindən faydalanan Zərifə xanım öz həyat yolunu insanlara işıq bəxş etmək kimi ali keyfiyyətlər üzərində qurmuşdur.

Peşə oftalmologiyası Zərifə xanımın yol açdığı yeganə elmi istiqamət deyildi. O, həm də o zaman ölkədə qəbul edilməyən alternativ təbabət sahəsi olan iridodiaqnostikanı bir elm kimi araşdıran ilk tədqiqatçı və "İridodiaqnostikanın əsasları" adlı fundamental elmi əsərin müəlliflərindən biri idi.

Qeyd olunmuşdur ki, akademik Zərifə xanım Əliyeva gənc həkimlərin peşə fəaliyyəti ilə bağlı problemlərinin öyrənilməsinə və həllinə xeyli zəhmət sərf etmişdir. Onun çoxsaylı məqalələri və çıxışları, məhz bu məsələyə həsr olunmuş "Yüksək etimad" kitabı cəmiyyətdə həkimin şəxsiyyət kimi formalaşması prosesinə dəyərli töhfədir. Zərifə xanımın - bu böyük alimin, həkimin, pedaqoqun, ictimai xadimin bütün həyatı və fəaliyyəti mənsub olduğu xalqa təmənnasız xidmət nümunəsidir. Onun Azərbaycan səhiyyəsi qarşısındakı xidmətlərini yüksək qiymətləndirən ümummilli liderimiz Heydər Əliyev demişdir: "Zərifə xanımın tibb elmi sahəsində xidmətlərindən biri də göz müalicəsi tədqiqatı idi. Mənə belə gəlir ki, onun iki dəyərli irsi vardır. Birincisi, Azərbaycanda ilk dəfə deontologiyanı bir elm kimi meydana atıbdır. İkincisi, Zərifə xanım çalışıb ki, bizim gələcək nəsilləri irsi xəstəliklərdən xilas etsin, sağlamlaşdırsın".

"Zərifə xanım Əliyeva Azərbaycanda elə bir oftalmologiya məktəbi yaratmışdır ki, bu məktəb bu gün də öz mövqeyini və əhəmiyyətini itirməyən sahələrdən biri olaraq qalır. Zərifə xanımın çoxistiqamətli elmi yaradıcılığı 12 monoqrafiya, dərslik və dərs vəsaitlərində, 160-dan çox elmi işdə, bir ixtira və 18 səmərələşdirici təklifdə öz əksini tapmışdır. Böyük alimin bütün mənalı ömrü boyu yaratdığı, lakin heç yerdə çap olunmayan bir kitabı da var: bu, heç bir dərsliyə, yaxud monoqrafiyaya sığmayan Zərifə xanım Əliyevanın həyat kitabıdır. Bu kitaba nəzər saldıqda gözlərimiz önündə əsl İnsanın obrazı canlanır. Yüksək səviyyəli peşəkar həkim kimi insanların gözünə nur verib, zülmətdən işığa, həyata qaytaran akademik Zərifə xanım Əliyeva həmişə himayəyə ehtiyacı olan tənha insanlara, kimsəsiz uşaqlara xüsusi qayğı ilə yanaşmışdır. Onun xatirəsini milyonlarla insanın yaddaşında böyük ehtiramla yaşadan cəhətlərdən biri də bu böyük şəxsiyyətə məxsus insani məhəbbət və şəfqətdir. Onun zəngin elmi irsi, tədqiqatları, qazandığı nailiyyətlər, fundamental əsərləri Azərbaycan tibb elminin parlaq səhifəsini təşkil edir. Xalqımızın yetişdirib dünya tibb elminə bəxş etdiyi görkəmli alimin və istedadlı həkimin şəxsiyyəti bu gün də ölkəmizin müstəqillik şəraitində yaşadığı dövrdə də hər bir alimin və Hippokrat andını içmiş hər bir həkimin cəmiyyətdə oynamalı olduğu rola parlaq nümunədir".

Ali Məclisin Sədri görkəmli alim, həkim, nurlu şəxsiyyət Zərifə xanım Əliyevanın işıqlı obrazının nəsillərin yaddaşında yüksək vətənpərvərlik və humanizm rəmzi kimi qalacağını bildirmişdir.

Sonra tədbirdə akademik Zərifə xanım Əliyevaya həsr olunan şeirlər oxunmuş, Naxçıvan Dövlət Televiziyasının hazırladığı "Zirvələrə yüksələn zərif insan ömrü" televiziya filmi göstərilmişdir.

Tədbir iştirakçıları görkəmli oftalmoloq alim Zərifə xanım Əliyevaya həsr olunmuş sərgiyə baxmışlar. Sərgidə görkəmli akademikin əsərləri, müxtəlif dövrlərdə onun haqqında yazılmış kitab, monoqrafiya və qəzet məqalələri, fotoşəkillər və rəsm əsərləri nümayiş olunmuşdur.

Yubiley tədbirinin sonunda Cəlil Məmmədquluzadə adına Naxçıvan Dövlət Musiqili Dram Teatrında görkəmli şair-dramaturq İslam Səfərlinin "Göz həkimi" pyesi əsasında hazırlanmış tamaşa göstərilmişdir.

Elxan MƏMMƏDOV

Azərbaycan.-2013.- 16 aprel.- S.8.