«Statoyl» Azərbaycanla əməkdaşlığını genişləndirir

Bakıda "Cənubi Qafqazın və Mərkəzi Asiyanın gələcəyi ilə bağlı strateji dialoq" mövzusunda Dünya İqtisadi Forumunun (Davos Forumu) keçirildiyi günlərdə Azərbaycan Respublikası Dövlət Neft Şirkəti və Norveçin "Statoyl" şirkəti qarşılıqlı anlaşma haqqında yeni bir memorandum imzaladılar. Bu addım "Statoyl"un Azərbaycanla tərəfdaşlığının davam etdiyini və getdikcə möhkəmləndiyini təsdiqləyir.

Mətbuatda xəbər verildiyi kimi, Qarşılıqlı Anlaşma haqqında Memorandumu ARDNŞ-in baş ofisində bu şirkətin prezidenti Rövnəq Abdullayev və "Statoyl"un baş idarəedici direktoru Helge Lund imzalayıblar. Memorandum Xəzərin Azərbaycan sektorundakı "Zəfər" və "Məşəl" perspektiv strukturlarının daxil olduğu blokun kəşfiyyatı və işlənməsi layihəsi ilə əlaqədardır.

Bu, Norveç şirkətinin Azərbaycanda qoşulduğu ilk layihə deyildir. "Statoyl" ölkəmizdə yaxından tanınmış bir şirkətdir. O, Xəzər regionunda 1992-ci ildən çalışır. Azərbaycanda ən iri neft-qaz yataqlarının işlənməsi və karbohidrogenlərin ixracı layihələrinin iştirakçısıdır.

"Statoyl" onlarca ölkədə işləyir. Çalışdığı hər bir ölkəyə özünün illərlə topladığı böyük səriştə və zəngin təcrübəsi ilə gəlir. Belə ki, o, dünyanın əsas neft-qaz istehsalçılarından və satıcılarından biridir.

Bununla belə, "Statoyl" yerində saymayan, ildən-ilə müasirləşən, genişlənən, zənginləşən bir şirkətdir.

Şirkətin beynəlxalq təbii qaz biznesi bu yanacağın boru kəmərləri vasitəsilə Norveç və Əlcəzairdən Avropaya qədər çatdırılmasından ibarətdir. O, eləcə də durulaşdırlmış təbii qazı Barens dənizindən İspaniyaya və ABŞ-a qədər ixrac edir. Azərbaycan qazının boru xətləri vasitəsilə Gürcüstana və Türkiyəyə çatdırılmasında fəal iştirak edən "Statoyl" gələcəkdə Avropaya uzanacaq bu yolların uğurlu olması üçün var qüvvə ilə çalışır.

Bütün bunlar təsadüfi deyil. Çünki "Statoyl" neft-qaz sahəsində bizim ən etibarlı tərəfdaşlarımızdandır. "Azəri-Çıraq-Günəşli" yataqlarının tammiqyaslı işlənməsi layihəsində şirkətin 8,56 faiz iştirak payı var. O, həmçinin Heydər Əliyev adına Bakı-Tbilisi-Ceyhan əsas ixrac neft kəmərinin 11 səhmdarından biridir. Şirkət bu layihədə 8,71 faiz iştirak payına malikdir.

"Şahdəniz" yatağının işlənməsi və bu yataqdan hasil olunan qazı nəql edən Cənubi Qafqaz Boru Kəməri (CQBK) layihələrinin hər birində isə "Statoyl" 25,5 faizlik payla iştirak edir. İkili operatorluğun həyata keçirildiyi CQBK-da "Statoyl" kommersiya əməliyyatçısıdır. Kəmərin texniki operatoru kimi BP çıxış edir.

Bu günlərdə ARDNŞ ilə "Statoyl" arasında imzalanan yeni sənəd norveçli şirkətin Azərbaycanda daha bir mühüm işə başlamaq əzmində olduğunu göstərdi. Yeni memoranduma müvafiq olaraq tərəflər onun imzalandığı və qüvvəyə mindiyi andan etibarən 12 ay ərzində danışıqlar aparmaq, İşlənmə Sazişinin əsas kommersiya prinsiplərini və şərtlərini razılaşdırmaq niyyətini bəyan etdilər.

Xatırladaq ki, Xəzərdəki "Zəfər" və "Məşəl" strukturları 1961-ci ildə seysmik kəşfiyyat işləri əsasında aşkar olunub. 1985-1987-ci illərdə bu sahələrin quruluşu dəqiqləşdirilib. 643 kvadratkilometr sahəni əhatə edən kəşfiyyat bloku Abşeron yarımadasından 120 kilometrlik məsafədə, cənub istiqamətində dənizin 600-750 metr dərinliyində yerləşir.

Bu struktura doğru dostluq, əməkdaşlıq və tərəfdaşlıqları artıq illərin sınağından keçmiş SOCAR və "Statoyl" birgə addımlayırlar. Qədəmləri uğurlu olsun!

Flora SADIQLI.

Azərbaycan.- 2013.- 11 aprel.- S. 9.