İsrail Dövlətinin milli bayramı şərəfinə

Aprelin 15-də İsrail Dövlətinin Azərbaycandakı səfirliyi ölkəsinin müstəqilliyinin 65-ci ildönümü münasibətilə rəsmi qəbul təşkil etmişdir.

İsrailin Azərbaycandakı səfiri Rafael Harpaz çıxış edərək tədbirin əhəmiyyətindən danışmışdır.

R.Harpaz ölkəsinin inkişaf yolundan söhbət açmış, iqtisadi və mədəni sahələrdə böyük tərəqqiyə nail olunduğunu vurğulamışdır.

Diplomat dost ölkələr olan İsrail və Azərbaycan arasında gündən-günə genişlənən əlaqələrdən məmnunluğunu bildirərək demişdir ki, qarşılıqlı səfərlər, yüksək səviyyəli görüşlər və danışıqlar ikitərəfli münasibətlərin daha sürətlə inkişafına əlverişli zəmin yaradır.

İsrail ilə Azərbaycan arasında əlaqələrin yüksək səviyyədə olduğu qeyd edilmişdir.

Tədbirdə çıxış edən Azərbaycan Respublikasının rabitə və informasiya texnologiyaları naziri Əli Abbasov qeyd etmişdir ki, son vaxtlar Azərbaycan və İsrail arasında müxtəlif sahələri əhatə edən münasibətlər yüksələn xətt üzrə inkişaf edir.

Ə.Abbasov əmin olduğunu bildirmişdir ki, ölkələrimiz arasında dostluq münasibətləri getdikcə daha da möhkəmlənəcək və dərinləşəcəkdir.

Milli Məclisin deputatları, xarici ölkələrin Bakıdakı səfirləri, beynəlxalq təşkilatların ölkəmizdəki təmsilçiləri, ictimaiyyət nümayəndələri qəbulda iştirak etmişlər.

AzərTAc

Azərbaycan.-2013.- 16 aprel.- S.10.