Beynəlxalq konfransın iştirakçıları ümummilli lider Heydər Əliyevin məzarını və Şəhidlər xiyabanını ziyarət etmişlər

Qafqaz Müsəlmanları İdarəsinin sədri şeyxülislam Allahşükür Paşazadənin başçılıq etdiyi MDB Müsəlmanları Məşvərət Şurasının ikinci iclası çərçivəsində Bakıda keçirilən "MDB müsəlmanları sülhün və sabitliyin tərəfdarlarıdır" mövzusunda beynəlxalq konfransın iştirakçıları aprelin 16-da Fəxri xiyabana gedərək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini anmış, onun məzarı önünə əklil qoymuşlar.

Görkəmli oftalmoloq-alim, akademik Zərifə xanım Əliyevanın da xatirəsi anılmış, məzarı önünə güllər qoyulmuşdur.

Sonra qonaqlar Şəhidlər xiyabanına gedərək ölkəmizin azadlığı və suverenliyi uğrunda canlarından keçmiş qəhrəman Vətən övladlarının xatirəsini anmış, məzarlarına tər çiçəklər düzmüşlər.

Bakının ən uca nöqtəsindən Azərbaycan paytaxtının mənzərəsini seyr edən qonaqlara Şəhidlər xiyabanının tarixi və şəhərdə aparılan quruculuq işləri barədə ətraflı məlumat verilmişdir.

AzərTAc

Azərbaycan.-2013.- 17 aprel.- S.7.