Xarici İşlər Nazirliyində

Azərbaycanın xarici işlər naziri Elmar Məmmədyarov ATƏT-in fəaliyyətdə olan sədrinin xüsusi nümayəndəsi Andrey Deşitsanın başçılıq etdiyi nümayəndə heyəti ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə Ermənistan-Azərbaycan, Dağlıq Qarabağ münaqişəsinin həlli, ATƏT-in fəaliyyətdə olan sədrinin Azərbaycana nəzərdə tutulmuş səfəri və qurumun gündəliyində duran məsələlər ilə bağlı fikir mübadiləsi aparılmışdır.

E.Məmmədyarov vurğulamışdır ki, Ermənistan-Azərbaycan, Dağlıq Qarabağ münaqişəsinin həllinin uzanması regionda davamlı sülhün və sabitliyin bərqərar olmasına əsas əngəldir. Münaqişənin həlli üçün Ermənistan silahlı qüvvələrinin Azərbaycanın işğal olunmuş ərazilərindən çıxarılması vacibdir.

Ermənistan rəhbərliyinin danışıqlar prosesində qeyri-konstruktiv mövqe tutduğunu deyən nazir ATƏT-in Minsk qrupunun münaqişənin nizamlanması prosesində fəallığının artırılmasının vacibliyini vurğulamışdır.

Ermənistan tərəfinin Xocalı aeroportunun işə salınacağı ilə bağlı bəyanatlarına toxunan E.Məmmədyarov qeyd etmişdir ki, belə bir addım Çikaqo Konvensiyasının kobud surətdə pozulması deməkdir. Bütün beynəlxalq qanunvericilik Azərbaycanın bu məsələdə tutduğu mövqeyinin haqlı olduğunu əks etdirir.

* * *

Aprelin 16-da xarici işlər naziri Elmar Məmmədyarov Çexiya Parlamentinin Deputatlar Palatasının xarici əlaqələr komitəsinin sədrinin müavini Yan Hamaçekin başçılıq etdiyi nümayəndə heyəti ilə görüşmüşdür.

Xarici İşlər Nazirliyindən AzərTAc-a bildirmişlər ki, görüşdə nazir Azərbaycan-Çexiya münasibətlərinin yüksək səviyyədə olduğunu vurğulamışdır. E.Məmmədyarov ölkələrimiz arasında əməkdaşlığın bir çox istiqamətlərdə, xüsusilə turizm, mədəniyyət, enerji, infrastruktur sahələrdə genişləndirilməsi üçün böyük potensialın olduğunu bildirmişdir.

Parlament diplomatiyasının əhəmiyyətini qeyd edən nazir Çexiya-Azərbaycan dostluq qrupunun fəaliyyətinin və xüsusilə də bu səfərin bütövlükdə ölkələrimiz arasında münasibətlərin genişləndirilməsinə töhfəsini verəcəyini vurğulamışdır.

Ermənistan-Azərbaycan, Dağlıq Qarabağ münaqişəsindən danışan E.Məmmədyarov məsələnin həlli üçün ilk növbədə Ermənistan silahlı qüvvələrinin Azərbaycanın işğal olunmuş ərazilərindən çıxarılmasının vacibliyini qeyd etmiş və Azərbaycanın ərazi bütövlüyünü dəstəklədiyinə görə Çexiyaya təşəkkürünü bildirmişdir.

Azərbaycana səfər etməkdən məmnun olduqlarını deyən Y.Hamaçek ölkəmizin iqtisadi inkişaf sürətindən təsirləndiyini bildirmişdir. Ölkəsinin Azərbaycanı özünün strateji tərəfdaşı hesab etdiyini qeyd edən qonaq respublikamızın Çexiyanın və bütövlükdə Avropanın enerji təhlükəsizliyinə verdiyi töhfəni yüksək qiymətləndirmişdir.

Ölkələrimiz arasında əməkdaşlığın turizm, mədəniyyət və s. sahələrdə inkişafı üçün geniş potensialın olduğunu qeyd edən Y.Hamaçek Azərbaycan ilə Çexiya parlamentləri arasında əlaqələrin genişləndirilməsinin vacibliyini vurğulamışdır. Qonaq bu cür səfərlərin ölkələr arasında münasibətlərə mühüm töhfə verdiyini demişdir.

Görüşdə, həmçinin regional məsələlər, Azərbaycan-Avropa İttifaqı əməkdaşlığı və "Şərq tərəfdaşlığı" proqramı ilə bağlı fikir mübadiləsi aparılmışdır.

* * *

Aprelin 16-da Azərbaycanın xarici işlər naziri Elmar Məmmədyarov Argentinanın ölkəmizdə yeni təyin olunmuş səfiri Karlos Dante Riva ilə görüşmüşdür.

Xarici İşlər Nazirliyindən AzərTAc-a verilən məlumata görə, görüşdə E.Məmmədyarov argentinalı diplomatı ölkəmizdə səfir təyin olunması münasibətilə təbrik etmiş və onun fəaliyyətinin ölkələrimiz arasında münasibətlərin möhkəmlənməsinə töhfə verəcəyinə əminliyini bildirmişdir.

Ölkələrimiz arasında münasibətlərin genişlənməsindən məmnunluğunu bildirən nazir bir çox sahələrdə ikitərəfli əməkdaşlığın inkişaf etdirilməsi üçün imkanların olduğunu vurğulamışdır.

Ölkəsinin Azərbaycan ilə münasibətlərə mühüm önəm verdiyini qeyd edən argentinalı diplomat respublikamızda fəaliyyəti müddətində ikitərəfli əlaqələrin inkişafı istiqamətində əlindən gələni edəcəyini vurğulamışdır.

* * *

Aprelin 16-da xarici işlər naziri Elmar Məmmədyarov Çexiya Respublikası Deputatlar Palatasının sədri Yan Xamaçekin başçılıq etdiyi nümayəndə heyəti ilə görüşmüşdür.

AzərTAc xəbər verir ki, görüşdə bütün sahələrdə ikitərəfli münasibətlərin yüksək səviyyədə olduğu qeyd edilmişdir. Yan Xamaçek bildirmişdir ki, "görüşlər zamanı Azərbaycanla Çexiya arasında strateji münasibətlərin yüksək səviyyədə olmasından razılıq hissi ifadə edilmişdir".

Dağlıq Qarabağ münaqişəsi və Xocalı soyqırımı haqqında Çexiyanın xarici işlər naziri Karel Şvartsenberqin sözləri barədə Çexiyanın mövqeyinə dair jurnalistlərin sualına cavab verərkən Yan Xamaçek demişdir ki, Çexiya bu münaqişənin aktuallığını gözəl başa düşür və belə hesab edir ki, indiki status-kvo qeyri-məqbuldur, münaqişə dinc yolla, erməni silahlı qüvvələrinin Qarabağdan çıxarılması haqqında BMT qətnamələrini nəzərə almaqla həll edilməlidir. Yan Xamaçek həmçinin qeyd etmişdir ki, Xocalı soyqırımı barədə Karel Şvartsenberqin sözləri onu təəccübləndirmişdir və o, nazirin fikri ilə razı deyildir.

Azərbaycan.-2013.- 17 aprel.- S.7.