Konstitusiya Məhkəməsində Türkiyə Yüksək Yurisdiksiya Məhkəməsinin nümayəndə heyəti ilə görüş olmuşdur

Aprelin 16-da Azərbaycan Respublikası Konstitusiya Məhkəməsində ölkəmizdə səfərdə olan Türkiyə Yüksək Yurisdiksiya Məhkəməsinin sədri Sərdar Özgüldürün rəhbərlik etdiyi nümayəndə heyəti ilə görüş olmuşdur.

Görüşdən əvvəl türkiyəli qonaqlar Fəxri xiyabana gələrək ulu öndər Heydər Əliyevin xatirəsini anmış, məzarı önünə əklil qoymuşlar. Görkəmli oftalmoloq alim, akademik Zərifə xanım Əliyevanın xatirəsi yad olunmuş, məzarı üzərinə gül dəstəsi qoyulmuşdur.

Qonaqlar, həmçinin Şəhidlər xiyabanını ziyarət etmiş, Azərbaycanın müstəqilliyi və ərazi bütövlüyü uğrunda mübarizədə həlak olmuş qəhrəman vətən övladlarının xatirəsini yad etmişlər. Sədr F.Abdullayev Konstitusiya Məhkəməsində görüşün səmimi və dostluq şəraitində keçəcəyini, türkiyəli həmkarının səfər çərçivəsində müstəqil Azərbaycanın uğurları ilə yaxından tanış olmaq imkanı əldə ediləcəyini bildirmişdir.

Azərbaycan ilə Türkiyəni dərin tarixi köklərin bağladığını qeyd edən F.Abdullayev hər iki ölkənin dostluq və qardaşlıq münasibətlərinin daim davam edəcəyinə əmin olduğunu demişdir. Konstitusiya Məhkəməsinin sədri Azərbaycan ilə Türkiyə arasında məhkəmə-hüquq əməkdaşlığının uğurla inkişaf etdiyini bildirmiş, bu əlaqələrin getdikcə daha genişlənəcəyini vurğulamışdır.

Azərbaycanda gedən sürətli inkişaf prosesindən, bütün sahələrdə həyata keçirilən islahatlardan danışan F.Abdullayev bütün bu müvəffəqiyyətlərin Prezident İlham Əliyevin uğurlu daxili və xarici siyasəti nəticəsində əldə olunduğunu diqqətə çatdırmışdır.

Konstitusiya Məhkəməsinin fəaliyyətindən danışan sədr Konstitusiya Məhkəməsinin qəbul etdiyi qərarlar haqqında ətraflı məlumat vermişdir.

Türkiyə Yüksək Yurisdiksiya Məhkəməsinin sədri Sərdar Özgüldür səmimi şəraitdə keçən görüşə və ətraflı məlumata görə təşəkkür etmişdir. S.Özgüldür iki ölkənin məhkəmə orqanlarının bütün görüşlərinin hər zaman dostluq münasibətləri çərçivəsində keçdiyini vurğulamışdır.

Xalqlarımız arasında tarixən qardaşlıq əlaqələrinin olduğunu qeyd edən Yüksək Yurisdiksiya Məhkəməsinin sədri bildirmişdir ki, ümummilli lider Heydər Əliyevin unudulmaz sözləri ilə desək, biz "bir millət, iki dövlət"ik.

Türkiyəli qonaq iki ölkə məhkəmələri arasında əməkdaşlığın daha da inkişaf etdiriləcəyinə əminliyini bildirmişdir. Görüşdə qarşılıqlı maraq doğuran bir sıra hüquqi məsələlər də müzakirə olunmuşdur.

Azərbaycana səfər çərçivəsində türkiyəli qonaqlar Gəncə şəhərinin qədim tarixi abidələri və görməli yerləri ilə də tanış olacaqlar.

AzərTAc

Azərbaycan.-2013.- 18 aprel.- S.8.