«Roll Call» qəzeti keçmiş konqresmen Maykl MakMeyxonun Azərbaycanla əməkdaşlıq haqqında məqaləsini dərc etmişdir

Amerikanın siyasi həyatından bəhs edən "Roll Call" qəzetində Nyu-Yorkdan olan keçmiş konqresmen Maykl MakMeyxonun Azərbaycana münasibətdə ikili standartlar haqqında məqaləsi dərc edilmişdir.

Məqalənin müəllifi yazır ki, keçən il normal ikitərəfli ticarət münasibətlərinin yaradılmasına dair ABŞ ilə Rusiya arasında saziş imzalanması Prezident Obamanın nailiyyətlərindən biri olmuşdur. Belə ki, ABŞ ilə Rusiya arasında normal münasibətlər Rusiyada Amerikanın bir çox şirkəti üçün imkanlar açacaq və rus tərəfdaşlarının şəffaflığını təmin edəcəkdir. Lakin son 21 ildə ABŞ-ın Azərbaycanla bağlı xarici siyasəti iki ölkə arasında dərin ikitərəfli tərəfdaşlığı əks etdirmir.

M.MakMeyxon qeyd edir ki, SSRİ-nin tənəzzülündən sonra 1992-ci ildə ABŞ konqresi daxili siyasi seçicilərin məhdud mənafeyinə cavab olaraq azadlığı müdafiə aktına 907-ci düzəlişi qəbul etmişdir. Bunun da nəticəsində ABŞ-ın Azərbaycana birbaşa yardımı məhdudlaşdırılmışdır. 2001-ci ilin 11 sentyabr hadisələrinə cavab olaraq Azərbaycan dərhal kəşfiyyat informasiyası mübadiləsinə hazır olduğunu bildirmiş, Azərbaycan üzərində uçuşlara icazə vermiş, maddi-texniki və strateji yardımı təmin etmişdir. Bundan sonra ABŞ konqresi Prezidentə 907-ci düzəlişin fəaliyyətini müvəqqəti olaraq dayandırmaq imkanı vermişdir. Qanuna görə, düzəlişin tətbiqi formal olaraq hər il ABŞ Prezidenti tərəfindən ləğv edilməlidir. MakMeyxon bildirir ki, 2001-ci ildən ABŞ prezidentləri 907-ci düzəlişin müvəqqəti ləğv olunduğunu hər il imzalasalar da, düzəliş qəti şəkildə ləğv edilməlidir ki, Rusiya ilə daimi ticarət sazişinin imzalanması mümkün olsun.

Müəllif yazır ki, 1992-ci ildən Azərbaycan ABŞ-ın etibarlı tərəfdaşı olmuş və Əfqanıstanda beynəlxalq təhlükəsizliyə yardım qüvvələri komandanlığının (ISAF) əməliyyatlarında ABŞ-a kömək göstərmişdir və regionda ABŞ-ın missiyası üçün əsas strateji və logistik mərkəz olaraq qalır. Keçmiş konqresmen deyir: "ABŞ konqresinin Nümayəndələr Palatası xarici işlər komitəsinin və Azərbaycan kokusunun üzvü kimi mən ardıcıl surətdə 907-ci düzəlişi ləğv etməyə, Azərbaycan xalqı ilə diplomatik münasibətlərin daha yüksək səviyyəyə qaldırılması üçün geniş imkanlar açmağa çağırmışam. Birləşmiş Ştatlarla Azərbaycan arasında mədəni, iqtisadi, siyasi və strateji əlaqələrin inkişaf etdirilməsi və daha sıx tərəfdaşlığın qurulması üçün bir çox üsullar vardır. 907-ci düzəlişin ləğvi bu sinergetik effekti gücləndirəcəkdir.

Yusif BABANLI,

AzərTAc

Vaşinqton

Azərbaycan.-2013.- 19 aprel.- S.7.