Səbail rayonunda birinci rübün sosial-iqtisadi inkişafının yekunları müzakirə olunub

Azərbaycan Prezidenti İlham Əliyevin sədrliyi ilə Nazirlər Kabinetinin 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş geniş iclasındakı nitqindən irəli gələn vəzifələr Səbail Rayon İcra Hakimiyyətində ətraflı müzakirə olunub. Tədbirdə rayonun təhsil, səhiyyə müəssisələri, hüquq-mühafizə orqanları rəhbərləri, bələdiyyələrin, gənclər təşkilatlarının və rayon ictimaiyyətinin nümayəndələri iştirak ediblər.

İclası açan Səbail Rayon İcra Hakimiyyətinin başçısı Asif Əsgərov 2013-cü ilin ilk 3 ayı ərzində rayonda görülən işlər barədə ətraflı məlumat verib. O bildirib ki, rayonun sənaye müəssisələri tərəfindən 5,976,8 milyon manatlıq məhsul istehsal edilib. Nəqliyyat müəssisələri tərəfindən 153,4 milyon manatlıq və ya keçən illə müqayisədə 7,8 faiz çox, rabitə müəssisələri tərəfindən 144,5 milyon manatlıq və ya keçən ilin müavifq dövrünə nisbətən 1 faiz çox xidmətlər göstərilmişdir. Bütün maliyyə mənbələri hesabına əsas kapitala investisiya 899,6 milyon manat təşkil edib ki, bu da keçən ilin müvafiq dövrünə nisbətən 36,7 faiz çox olub. Tikinti-quraşdırma işlərinə yönəldilmiş investisiyanın həcmi 243,4 milyon manat təşkil edib. Əvvəlki ilin müvafiq dövrü ilə müqayisədə tikinti-quraşdırma işləri 3,4 dəfə artmışdır. 2013-cü ilin birinci rübü ərzində Səbail rayonu ərazisində 536 yeni iş yeri açılmışdır ki, bunların da hamısı daimi iş yerləridir. Ümumilikdə 2009-cu ildən 2013-cü ilin mart ayına kimi Səbail rayonunda 9030 daimi iş yeri açılmışdır.

"2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"na uyğun olaraq cari ilin ilk 3 ayı ərzində 3 saylı Vərəm Əleyhinə Dispanserdə, C.Hacıyev adına 3 saylı Uşaq Musiqi Məktəbində və A.H.Kazımov adına 1 saylı şəhər poliklinikasında, 44 saylı uşaq bağçasında aparılan əsaslı təmir-yenidənqurma işləri başa çatdırılmış, 20-ci yaşayış sahəsində 102 və 118 saylı 35 kilovoltluq 2 yeni yarımstansiya şəbəkəyə qoşulmuş, Bibiheybət qəsəbəsində poçt məntəqəsi açılmışdır.

A.Əsgərov əlavə etdi ki, hazırda rayon ərazisində Azərbaycan Xalçası və Xalq Tətbiqi Sənəti Dövlət Muzeyi üçün yeni binanın, "Alov qüllələri" kompleksinin, Badamdar qəsəbəsində Oksford məktəbi üçün yeni tədris korpusunun, "Cənub" mehmanxanasının sökülərək yerində 7 mərtəbəli yeni mehmanxananın tikintiləri, habelə Dənizkənarı Milli Bulvarın Bayraq Meydanı istiqamətində genişləndirilməsi və burada yeni istirahət guşələrinin yaradılması, "Qız qalası"nda bərpa və konservasiya işləri davam edir. Bu işlər çərçivəsində Azadlıq Meydanı ərazisinin tam şəkildə təmiri başa çatdırılmış, yola yeni asfalt örtüyü çəkilmişdir.

İclasda Səbail rayon MKTB-nin rəisi Elbrus Əhmədov, 1 saylı şəhər poliklinikasının baş həkimi Kübra Cabbarova, Səbail Rayon Gigiyena və Epidemiologiya Mərkəzinin direktoru Sara Həsənova, Milli Məclisin deputatı Fuad Muradov və başqaları çıxış etmişlər.

İclasda əldə olunmuş nailiyyətlərlə yanaşı, həm də həllini gözləyən problemlər, çatışmazlıqlar və onların aradan qaldırılması yolları, rayonda aparılması nəzərdə tutulan abadlıq işləri və vətəndaşların müraciətləri ilə bağlı görülən işlər də müzakirə olunub.

Elnur HACALIYEV

Azərbaycan.-2013.- 19 aprel.- S.8.