Azərbaycanda İxracın və İnvestisiyaların Təşviqi Fondu və Çinin Beynəlxalq Ticarətin Təşviqi Şurası arasında Anlaşma Memorandumu imzalanmışdır

Aprelin 18-də İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-Çin biznes forumu keçirilmişdir.

AzərTAc xəbər verir ki, tədbirdə hər iki tərəfdən rəsmi şəxslərlə yanaşı, qida, tikinti, yük avtomobillərinin istehsalı, İKT, infrastruktur, enerji, emal, logistika, turizm, daşınmaz əmlak və s. sahələrdə fəaliyyət göstərən şirkətlərin nümayəndələri iştirak etmişlər.

İqtisadi inkişaf nazirinin müavini Niyazi Səfərov Azərbaycan ilə Çin arasında əməkdaşlığın uğurla inkişaf etdiyini diqqətə çatdırmış, ölkələrimiz arasında əlaqələrin dostluq və tərəfdaşlıq prinsipləri üzərində qurulduğunu, yüksək səviyyəli dövlət rəsmilərinin qarşılıqlı səfərlərinin, aparılan danışıqların ikitərəfli münasibətlərin inkişafında mühüm əhəmiyyətini vurğulamışdır. Bildirilmişdir ki, indiyədək iki ölkə arasında 20-dən çox sənəd imzalanmışdır. Azərbaycan-Çin əlaqələrinin genişlənməsində indiyədək 4 iclası keçirilmiş Hökumətlərarası Komissiyanın fəaliyyəti də əhəmiyyətli rol oynayır.

Ölkələrimiz arasında iqtisadi əlaqələr barədə məlumat verən nazir müavini Niyazi Səfərov ticarət dövriyyəsinin iki ölkə arasındakı əməkdaşlığın mühüm istiqamətlərindən biri olduğunu, ticarət dövriyyəsinin əhəmiyyətli dərəcədə artdığını demişdir. Qeyd etmişdir ki, hazırda Azərbaycanda xidmət, ticarət, sənaye, rabitə, tikinti, bank və sığorta, kənd təsərrüfatı sahələrində 70-ə yaxın Çin kapitallı şirkət fəaliyyət göstərir.

Çinin Beynəlxalq Ticarətin Təşviqi Şurasının (SSPİT) sədr müavini Zhanq Vey ölkəsinin iqtisadiyyatından danışmışdır. Z.Vey hər iki ölkənin potensialından səmərəli istifadənin, iş adamları arasında əməkdaşlığın genişləndirilməsinin Çin-Azərbaycan iqtisadi-ticarət əlaqələrinin inkişafında əhəmiyyətli olacağını vurğulamışdır. Qonaq iqtisadi sahədə əməkdaşlıq istiqamətlərini qeyd edərək iqtisadiyyatın müxtəlif sahələrində əlaqələrin daha da inkişafı üçün böyük imkanların olduğunu demişdir.

Çin Xalq Respublikasının Azərbaycandakı səfiri Hong Jiu Yin iki ölkə arasındakı əlaqələr və əməkdaşlığın genişləndirilməsinin perspektivləri barədə məlumat vermişdir.

AZPROMO-nun rəhbəri Rüfət Məmmədov Azərbaycanın investisiya mühiti və biznes imkanlarına dair təqdimatla çıxış etmişdir.

Biznes forum çərçivəsində AZPROMO ilə SSPİT arasında qarşılıqlı əməkdaşlıq haqqında Anlaşma Memorandumu imzalanmışdır.

Tədbir iş adamları arasında ikitərəfli görüşlərlə başa çatmışdır.

Azərbaycan.-2013.- 19 aprel.- S.8.