Qahirədə «Heydər Əliyev və Azərbaycanın siyasi və iqtisadi inkişaf modeli» mövzusunda seminar-simpozium

Azərbaycanın Misirdəki səfirliyi tərəfindən Qahirə şəhərində ümummilli lider Heydər Əliyevin 90 illik yubileyi ilə əlaqədar Qahirə Universitetinin iqtisadiyyat və siyasi elmlər fakültəsinin tələbələri üçün "Heydər Əliyev və Azərbaycanın siyasi və iqtisadi inkişaf modeli" mövzusunda seminar-simpozium keçirilmişdir.

Səfirliyin məlumatına görə, seminar çərçivəsində tələbələrə ulu öndər Heydər Əliyevin həyat və yaradıcılığı, müstəqilliyimizin ilk illərində Azərbaycanın üzləşdiyi çətinliklər və belə bir tarixi məqamda ümummilli liderin xalqın təkidli tələbi ilə siyasi hakimiyyətə qayıtması barədə məlumat verilmişdir.

Bildirilmişdir ki, ulu öndər Heydər Əliyevin hakimiyyətə gəlişi ilə qısa müddət ərzində ölkədə siyasi və makroiqtisadi sabitlik təmin olunmuş, Azərbaycanın uzunmüddətli inkişaf strategiyasının əsası qoyulmuş və insan hüquqları, demokratikləşdirmə, iqtisadi sahədə fundamental işlər görülmüş və köklü islahatlar aparılmış, xarici sərmayənin cəlb edilməsi üçün əlverişli mühit yaradılmışdır.

Seminar-simpoziumda 1993-cü ilə aid makroiqtisadi göstəricilər ilə 2013-cü ilin rəqəmləri arasında müqayisə aparılmış və Azərbaycanın əldə etdiyi nailiyyətlər iştirakçıların diqqətinə çatdırılmışdır.

Qısa müddət ərzində Azərbaycanda əldə olunmuş siyasi sabitlik və təhlükəsizlik, xalqın siyasi liderin ətrafında birləşməsi, iqtisadi inkişaf, sosial, elm-təhsil və humanitar sahədə qazanılmış nailiyyətlər və Azərbaycanın keçid dövrünü uğurla başa vuraraq orta səviyyəli gəlirli ölkələr sırasına çıxması və inkişaf etmiş dövlət statusunu əldə etməyi qarşısına məqsəd qoyması tələbələrin xüsusi marağına səbəb olmuşdur.

Simpozium çərçivəsində tələbələrin ulu öndər Heydər Əliyevin həyat və yaradıcılığı, Azərbaycanın siyasi və iqtisadi inkişaf modelinin müxtəlif aspektləri, Konstitusiyanın hazırlanması prosesi, demokratik islahatların aparılması və vətəndaşların həyat şəraitinin yaxşılaşdırılması kimi hazırda Misir üçün də aktual olan problemlər barədə sualları cavablandırılmış, ümummilli lider Heydər Əliyev və Azərbaycan haqqında sənədli film nümayiş etdirilmiş, tələbələrə kitablar və digər çap materialları verilmişdir.

Asya HACIZADƏ,

AzərTAc-ın xüsusi müxbiri

Qahirə

Azərbaycan.-2013.- 19 aprel.- S.9.