Qədim İçərişəhərlə tanışlıq Makedoniyanın Baş nazirində zəngin təəssürat yaratmışdır

Azərbaycanda rəsmi səfərdə olan Keçmiş Yuqoslaviya Respublikası Makedoniyanın Baş naziri Nikola Qruevski aprelin 19-da İçərişəhərlə tanış olmuşdur.

AzərTAc xəbər verir ki, Makedoniyanın Baş nazirinin İçərişəhərdə gəzintisi Qız qalası ilə tanışlıqdan başlamışdır. Qonağa Qız qalası abidəsinin qeyri-adi memarlıq özəllikləri barədə ətraflı məlumat verilmişdir. Bildirilmişdir ki, eramızdan əvvəl VII-VI əsrlərdə əsası qoyulmuş Qız qalası XII əsrdə bərpa edilmişdir. Hündürlüyü 28 metr, diametri 16-16,5 metr olan abidə silindr formalı əsl qaladan və cənub tərəfdən ona bitişən iri dayaq tikilidən ibarətdir. Hazırda Qız qalasında muzey konservasiyası işləri aparılır.

Yaxınlıqdakı Sıratağlı dini-memarlıq kompleksinin ərazisindəki ekspozisiya ilə tanışlıq da Makedoniyanın Baş nazirində böyük maraq doğurmuşdur.

Gəzinti Azərbaycanın geniş tarixi, iqtisadi və mədəni əlaqələrindən xəbər verən, ölkə əhəmiyyətli abidə - Buxara karvansarayı ilə tanışlıqla davam etdirilmişdir.

Elektromobillə gəzinti zamanı Baş nazir Nikola Qruevskiyə UNESCO-nun Dünya İrsi Siyahısına daxil edilmiş "İçərişəhər" Dövlət Tarix-Memarlıq Qoruğu, burada aparılan təmir, abadlaşdırma və bərpa işləri barədə ətraflı məlumat verilmişdir. Bildirilmişdir ki, İçərişəhər ərazisində müxtəlif əsrlərə aid nadir tarixi memarlıq abidələri vardır və bunlar qorunub saxlanılır.

Kiçik Qala küçəsi ilə davam edən gəzinti zamanı Makedoniyanın Baş naziri təndir çörəyinə qonaq edilmişdir.

Gəzinti zamanı Baş nazir Nikola Qruevski orta əsr Şərq memarlığının şah əsəri, dünya əhəmiyyətli tarixi-memarlıq abidəsi olan "Şirvanşahlar Sarayı Kompleksi" ilə tanış olmuşdur. Məlumat verilmişdir ki, XV əsrin əvvəllərində inşa olunmuş tarixi abidənin tikililəri İçərişəhərin təpələrindən birinin ən hündür nöqtəsində yerləşir. O, Xəzər dənizindən və şəhərin ətrafındakı yüksəkliklərdən aydın görünür. Kompleks bugünədək öz tarixi-memarlıq üstünlüyünü saxlamaqdadır.

Daha sonra Nikola Qruevski Kiçik karvansaradakı Azərbaycan təsviri və dekorativ-tətbiqi sənət mərkəzində - "İncəsənət bağı"ndakı sənət nümunələrini seyr etmişdir.

Keçmiş Yuqoslaviya Respublikası Makedoniyanın Baş naziri "İçərişəhər" Dövlət Tarix-Memarlıq Qoruğunun fəxri qonaqlar kitabına ürək sözlərini yazmışdır.

Azərbaycan paytaxtının qədim guşəsi ilə tanışlıqdan xatirə olaraq qonağa hədiyyə təqdim edilmişdir.

İçərişəhərlə tanışlıq Makedoniyanın Baş nazirində xoş təəssürat yaratmışdır.

Azərbaycan.-2013.- 20 aprel.- S.3.