Rabitə və informasiya texnologiyaları naziri Gəncədə bu şəhərdən və ətraf rayonlardan olan vətəndaşları qəbul etmişdir

Aprelin 19-da rabitə və informasiya texnologiyaları naziri Əli Abbasov Gəncədə bu şəhərdən, həmçinin Tovuz, Qazax, Ağstafa, Samux, Göygöl, Daşkəsən, Şəmkir, Goranboy və Gədəbəy rayonlarından olan vətəndaşları qəbul etmişdir.

AzərTAc xəbər verir ki, Ə.Abbasov Azərbaycan Prezidenti İlham Əliyevin tapşırığı ilə keçirilən bu qəbulların səmərəsindən danışaraq demişdir ki, nazirlik bu görüşə bir ay əvvəldən hazırlaşmışdır. Bu müddət ərzində 100-dən artıq vətəndaş nazirliyə müraciət etmişdir. Onlardan 22-nin müraciəti müsbət həll olunmuş, 3-nün məhkəmə prosesi ilə əlaqədar həlli müvəqqəti dayandırılmış, 2-si isə struktura aid olmadığı üçün həll edilməmişdir. Nazirliyin saytına daxil olan müraciətlərin bir qismində problemlərin həlli ilə bağlı minnətdarlıqlar da ifadə edilmişdir.

Nazir Əli Abbasov respublikamızın rabitə və informasiya sistemində görülən və görülməsi nəzərdə tutulan məsələlərə toxunarkən qeyd etmişdir ki, Azərbaycan Respublikasının Dövlət Neft Fondu ilə Rabitə və İnformasiya Texnologiyaları Nazirliyi arasında bağlanmış müqaviləyə əsasən, ölkənin bütün ərazilərinin telefonlaşdırılması, davamlı və genişzolaqlı internet şəbəkəsi yaradılması üçün 400 milyon manat vəsait ayrılması nəzərdə tutulmuşdur. Bundan əlavə, dövlətimizin başçısı tərəfindən 2013-cü ilin "İnformasiya-kommunikasiya texnologiyaları ili" elan olunması ilə bağlı bu sahədə bir çox qlobal işlərin icrasına başlanılmışdır. Bu proqramda kadr hazırlığı, yeni texnologiyaların tətbiqi də nəzərdə tutulmuşdur.

Görüşdə vətəndaşların müraciəti dinlənilmiş, onlardan bəziləri yerindəcə həll edilmiş, bəziləri isə nəzarətə götürülmüşdür.

Azərbaycan.-2013.- 20 aprel.- S.6.