«Heydər Əliyev və müstəqil Azərbaycanda insan hüquqlarının inkişafı» mövzusunda elmi-praktiki konfrans keçirilmişdir

Aprelin 19-da Azərbaycan Respublikasının İnsan Hüquqları üzrə Müvəkkilinin (Ombudsman) Aparatında "Heydər Əliyev və müstəqil Azərbaycanda insan hüquqlarının inkişafı" mövzusunda elmi-praktiki konfrans keçirilmişdir.

AzərTAc xəbər verir ki, konfransda çıxış edən insan hüquqları üzrə müvəkkil Elmira Süleymanova bildirmişdir ki, ulu öndər Heydər Əliyevin 1993-cü ildə hakimiyyətə qayıdışı xalqımıza və dövlətimizə müstəsna uğurlar gətirmişdir. E.Süleymanova ölkəmizdə insan hüquqları sahəsində üç strateji əhəmiyyətli sənədin qəbul olunaraq həyata keçirildiyini vurğulamış, "İnsan hüquqlarının müdafiəsinə dair Dövlət Proqramı"nı ümummilli lider Heydər Əliyevin hələ 1998-ci il 18 iyun tarixli Sərəncamı ilə təsdiq etdiyini demişdir.

Qeyd olunmuşdur ki, dövlətimizin başçısının 2011-ci il 27 dekabr tarixli sərəncamı ilə təsdiq edilmiş "Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı" (MFP) 2006-cı ildən uğurla həyata keçirilir. İnsan Hüquqlarının Müdafiəsi üzrə Milli Fəaliyyət Planının məntiqi davamı olaraq, yeni prioritetlərə uyğun konkret istiqamətlər, tədbirlər müəyyən edilmişdir.

Milli Məclisin İqtisadi siyasət komitəsinin sədri Ziyad Səmədzadə Azərbaycan dövlətinin uzunmüddətli inkişafında Heydər Əliyevin xidmətlərindən danışmışdır. Bildirmişdir ki, 1969-cu ildə görkəmli siyasi xadim Heydər Əliyev tərəfindən müəyyən edilən inkişaf strategiyasının uğurlu nəticəsi bu gün özünü göstərir. Ümummilli lider Heydər Əliyevin qurduğu dövlət Azərbaycan xalqının müstəqil yaşamasının qarantı olmuşdur.

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev Heydər Əliyevin vətəndaş cəmiyyəti quruculuğu istiqamətində həyata keçirdiyi siyasətdən danışmışdır.

Bildirmişdir ki, ulu öndər vətəndaş cəmiyyətinin fəallarının dövlətin ətrafında birləşməsi üçün çox ciddi bir özül yaratmış, Gənclər və İdman Nazirliyi, Gənclər Təşkilatlarının Milli Şurası kimi vətəndaş cəmiyyətinin əsası olan təşkilatlar quruculuq prosesində yaxından iştirak etmişlər. Həmin dövrdə formalaşmış gənclik bu gün dövlət idarəçiliyində fəaliyyət göstərir.

Milli Məclisin deputatı Elmira Axundova "Heydər Əliyev: liderliyin fenomeni" mövzusunda məruzə etmişdir.

Konfransda ümummilli lider Heydər Əliyevin Azərbaycan ədliyyəsinin təşəkkülündə, daxili işlər orqanlarının formalaşmasında, prokurorluğun inkişafında müstəsna rolundan bəhs olunmuş, qaçqın və məcburi köçkünlərə diqqət və qayğısından danışılmışdır.

Sonda mövzu ilə bağlı müzakirələr aparılmışdır.

Azərbaycan.-2013.- 20 aprel.- S.9.