Azərbaycanın xarici işlər naziri Elmar Məmmədyarov Yaxın Şərqə səfəri çərçivəsində bir sıra görüşlər keçirmişdir

Azərbaycanın xarici işlər naziri Elmar Məmmədyarov Yaxın Şərqə səfəri çərçivəsində Fələstinin Baş naziri Salam Fayad ilə görüşmüşdür.

Xarici İşlər Nazirliyinin mətbuat xidmətindən AzərTAc-a verilən məlumata görə, görüşdə S.Fayad Fələstinin Azərbaycan ilə münasibətlərə böyük əhəmiyyət verdiyini vurğulamışdır.

İkitərəfli münasibətlərin daha da inkişaf etdirilməsinin vacibliyini qeyd edən Fələstinin Baş naziri Azərbaycanı yaxın dost və qardaş ölkə adlandıraraq müxtəlif sahələrdə əməkdaşlığı genişləndirməkdə maraqlı olduqlarını bildirmişdir.

Azərbaycanın Fələstinə dəstəyini davam etdirəcəyini bildirən E.Məmmədyarov ölkəmizin Yaxın Şərq regionunda münaqişənin tezliklə həllini tapmasında maraqlı olduğunu vurğulamışdır. Nazir Azərbaycanın münaqişənin iki dövlət və Fələstinin paytaxtı Şərqi Qüdsün olması prinsipi ilə həllinin tərəfdarı olduğunu bildirmişdir.

Azərbaycanın Fələstin ilə bir çox istiqamətlərdə, o cümlədən humanitar sahədə əməkdaşlığın perspektivlərindən danışan E.Məmmədyarov fələstinli tələbələrin ölkəmizdə təhsil alması üçün tərəfimizdən lazımi dəstəyin verildiyini diqqətə çatdırmışdır. Nazir bu dəstəyin İslam Əməkdaşlıq Təşkilatı çərçivəsində də həyata keçirildiyini bildirmişdir.

Görüşdə Yaxın Şərq regionunda cərəyan edən proseslər barədə də fikir mübadiləsi aparılmışdır. E.Məmmədyarov Ermənistan-Azərbaycan, Dağlıq Qarabağ münaqişəsi barədə həmsöhbətinə məlumat vermiş, bu məsələnin ədalətli həllinin Azərbaycanın ərazi bütövlüyü çərçivəsində olacağını bildirmişdir.

* * *

Azərbaycanın xarici işlər naziri Elmar Məmmədyarov Yaxın Şərqə səfəri çərçivəsində Fələstinin xarici işlər naziri Riad əl-Maliki ilə görüşmüşdür.

Xarici İşlər Nazirliyinin mətbuat xidmətindən AzərTAc-a verilən məlumata görə, Azərbaycanı dost və qardaş ölkə adlandıran fələstinli nazir bu səfəri Azərbaycan ilə Fələstin arasında münasibətlərin inkişafında mühüm addım kimi qiymətləndirmişdir.

Tərəflər ölkələrimiz arasında müxtəlif sahələr üzrə münasibətlərin inkişaf etdirilməsi barədə razılığa gələrək əlaqələrin genişləndirilməsi üçün böyük potensialın olduğunu vurğulamışlar.

Azərbaycanın bu gün mötəbər beynəlxalq təşkilatlarda, xüsusilə BMT Təhlükəsizlik Şurasında, İslam Əməkdaşlıq Təşkilatında və Qoşulmama Hərəkatında böyük nüfuza malik olduğunu qeyd edən fələstinli nazir ölkəmiz tərəfindən Fələstinə göstərilən dəstəyə görə təşəkkürünü bildirmişdir.

Azərbaycanın regionda sülhün tezliklə bərqərar olmasının tərəfdarı olduğunu vurğulayan E.Məmmədyarov bildirmişdir ki, ölkəmiz Fələstinə dəstəyini davam etdirəcəkdir. Fələstinin beynəlxalq ictimaiyyətin tamhüquqlu üzvü olmağa haqqı vardır.

Ermənistan-Azərbaycan, Dağlıq Qarabağ münaqişəsi barədə məlumat verən E.Məmmədyarov Azərbaycanın sürətlə inkişaf etdiyini və gücləndiyini, gec-tez öz ərazi bütövlüyünü bərpa edəcəyini vurğulamışdır.

* * *

Azərbaycanın xarici işlər naziri Elmar Məmmədyarov İsrailə səfəri çərçivəsində Knessetin Xarici əlaqələr komitəsinin sədri Aviqdor Liberman ilə görüşmüşdür.

Xarici İşlər Nazirliyinin mətbuat xidmətindən AzərTAc-a verilən məlumata görə, görüşdə Azərbaycan ilə İsrail arasındakı münasibətlər, beynəlxalq təşkilatlar çərçivəsində əməkdaşlıq perspektivləri müzakirə olunmuşdur.

Tərəflər regionda cərəyan edən proseslər, xüsusilə Ermənistan-Azərbaycan, Dağlıq Qarabağ münaqişəsi barədə müzakirələr aparmışlar. E.Məmmədyarov məsələnin ədalətli həllinə nail olunacağına əminliyini bildirmiş və beynəlxalq ictimaiyyətin münaqişədə mövcud status-kvonun regionun inkişafına əngəl törətdiyini dərk etdiyini vurğulamışdır.

Bundan əlavə, görüşdə Yaxın Şərqdə gedən proseslər müzakirə olunmuşdur. E.Məmmədyarov Azərbaycanın BMT Təhlükəsizlik Şurasının üzvü kimi Yaxın Şərqdə gedən prosesləri yaxından izlədiyini qeyd etmişdir.

Azərbaycanın sabit və sürətlə inkişaf edən ölkə olduğunu vurğulayan A.Liberman bunun nəticəsində ölkəmizin beynəlxalq birliyin etibarlı tərəfdaşına çevrildiyini demişdir. İsrail rəsmisi bir çox sahələrdə Azərbaycan ilə əməkdaşlığın genişləndirilməsi üçün böyük potensialın olduğunu qeyd etmişdir.

Görüşdə həmçinin turizm sahəsində əməkdaşlıq və parlamentlərarası münasibətlərin perspektivləri müzakirə olunmuşdur. A.Liberman Azərbaycanın regionun inkişafında rolunu xüsusi vurğulamışdır.

Azərbaycan.-2013.- 23 aprel.- S.3.