Mingəçevirin gələcək inkişafı sənayenin, turizmin inkişafı ilə bağlı olacaqdır

Prezident İlham Əliyevin bölgəyə səfəri zamanı bəyan etdiyi bu fikir nur şəhərində böyük razılıqla qarşılandı

Çölün, çəmənin zümrüd libasa büründüyü, meyvə ağacları başına əlvan çiçəklərdən çətir tutduğu bu yaz günlərində Boz dağın ətəyində qərar tutmuş Mingəçevirdə fərqli bir bahar yaşanır. Üzümüzə açılan bu baharı mingəçevirlilər üçün ikiqat sevimli edən özəl cəhətlər vardır. Respublika Prezidenti aprelin 16-da nur şəhərinə gerçəkləşən səfəri ilə sanki təbiətdə əlvan rəngləri ilə göz oxşayan, isti nəfəsi ilə xoş duyğular oyadan baharı könüllərə köçürdü. Dövlət başçısı şəhər ictimaiyyətinin nümayəndələri ilə görüşdə burada görülən genişmiqyaslı tikinti, abadlıq-quruculuq işlərinə yüksək qiymət verdi. Görüşdə xalqımızın ümummilli lideri Heydər Əliyevin diqqət və qayğısı, şəxsi təşəbbüsü və qətiyyətlə həyata keçirdiyi məqsədyönlü tədbirlər nəticəsində nəinki respublikamızın, eyni zamanda, bütün Qafqazın enerji nəhənginə çevrilən Mingəçevirin şöhrət çələnginə əsl dövlət məhəbbəti ilə bu gün də yeni naxışlar vurulduğu qürurla dönə-dönə vurğulandı.

Ulu öndər Heydər Əliyev deyirdi ki, Mingəçevirin tikilməsində, qurulmasında, inkişaf etməsində vaxtilə mən çox zəhmət çəkmişəm. İndi mən buraya gəlib bu hündür binaları, gözəl küçələri, gözəl meydanları, gözəl yaşıllıqları görəndə sevinirəm. Çünki 30 il bundan öncə mən Azərbaycanda rəhbərliyə başlayarkən biz Azərbaycanın hər bir yerində quruculuq işləri aparırdıq. Ancaq Mingəçevir gənc şəhər olduğuna görə buraya xüsusi fikir verirdik.

İllər keçir, zaman dəyişir. Amma Heydər Əliyevin müəyyən etdiyi yol dəyişmir. Xalqımızın ümummilli lideri Heydər Əliyevin yaratdığı qalib siyasi kursun bu gün Prezident İlham Əliyev tərəfindən müvəffəqiyyətlə və müasir dövrün spesifik xüsusiyyətlərinə uyğun yaradıcılıqla yerinə yetirildiyini bir daha təsdiq etmək üçün konkret olaraq nur şəhəri Mingəçevirin gündən-günə gözəlləşən simasına nəzər yetirmək kifayətdir. Azərbaycan Respublikası regionlarının sosial-iqtisadi inkişafına dair dövlət proqramlarının uğurla reallaşdırılması nəticəsində Mingəçevir şəhərində son illər böyük nailiyyətlərə imza atılmış, mühüm infrastruktur layihələri həyata keçirilmiş, yeni istehsal və emal müəssisələri yaradılmışdır. Məhz son illərdə burada "Kür" Olimpiya Tədris İdman Mərkəzi, dövlət dram teatrı yenidən qurulmuş, Heydər Əliyev Mərkəzi, Gənclər evi inşa edilmiş, "Sahil" və "Dostluq" parklarında göz oxşayan abadlıq-quruculuq işləri görülmüş, məcburi köçkün ailələri üçün 10 ədəd 9 mərtəbəli binalardan ibarət yaşayış məhəlləsi salınmışdır. Dövlətin qayğısından güc alan, qurub-yaratmaq həvəsli övladlarının odlu ürəyi, hərəkətli əlləri ilə hər gün bir boyda ucalan Mingəçevir yüksəliş, tərəqqi yolunda inamla addımlayır.

Dövlət başçısının Mingəçevirə səfərindən bir neçə gün keçir. Amma bu səfərin yaratdığı xoş ovqat energetiklər şəhərində bu gün də yaşanır. Prezidentlə səmimi görüşün xoş duyğuları könülləri tərk etməmiş nur şəhərini yeni sevinc dalğası bürümüşdür. Respublika Prezidenti İlham Əliyev aprelin 18-də, bölgəyə səfərindən iki gün sonra Mingəçevirin yüksəlişinə hesablanan üç sərəncam imzalamışdır. "Mingəçevir şəhərinin sosial-iqtisadi inkişafının sürətləndirilməsinə dair tədbirlər haqqında" sərancamla Mingəçevir Şəhər İcra Hakimiyyətinə Azərbaycan Respublikasının 2013-cü il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan 5 milyon manat, "Mingəçevir şəhərinin sosial-iqtisadi inkişafının sürətləndirilməsinə dair əlavə tədbirlər haqqında" sərəncamla Mingəçevir şəhəri ərazisində 40 min nəfərdən çox əhalinin istifadə etdiyi 13 kilometr avtomobil yollarının yenidən qurulması məqsədilə dövlət büdcəsindən 2 milyon manat ayırmışdır. "Mingəçevir Mərkəzi Şəhər Xəstəxanasının yenidən qurulması haqqında" dövlət başçısının imzaladığı sərəncam əsasında isə dövlət büdcəsindən ilkin olaraq 3 milyon manat ayrılmışdır.

Dövlətin sosial siyasətinin əsas hədəfləri, Prezidentin ölkə vətəndaşlarının həyat şəraitini hər vasitə ilə yaxşılaşdırmağa yönələn qayğı və diqqətinin konkret ifadəsi göz qabağındadır. Səmimi notlar üzərində keçən hərarətli görüşdən iki gün sonra dövlət başçısının imzaladığı sözü gedən üç sərəncam, sözün həqiqi mənasında, Mingəçevirdə rezonans doğurmuşdur. Küçədə qarşılaşan şəhər sakinləri bir-birini təbrik edir, göz aydınlığı verirdilər. Könüllərdə baş qaldıran misilsiz minnətdarlıq hissinin əsas ünvanı isə böyük humanizmi, qayğıkeşliyi, mehribanlığı ilə ürəklərdə sonsuz istək və məhəbbət yaratmış Prezident İlham Əliyevdir.

Ayrı-ayrı şəhər sakinlərinin ürək sözlərini eşidəndə bunun bir daha şahidi olduq..

Akif Hacıyev - şəhər Ağsaqqallar Şurasının sədri:

- Mingəçevir mənə doğma, anam qədər əziz şəhərdir. Onun xoş sorağı, indiki ağ günləri ömrümə ömür calayır. Azərbaycan gəncliyinin dünyaya səs salan hünəri biz yaşlı nəslə qürur verir. Mən respublika Prezidenti İlham Əliyevi Azərbaycan gəncliyinin simvolu hesab edirəm. Onun yeritdiyi müdrik və uzaqgörən siyasəti bizim Mingəçevir şəhərində hamı bəyənir və müdafiə edir. Dövlətimizin başçısı şəhər ictimaiyyətinin nümayəndələri ilə görüşdə Mingəçevirdə yeni müəssələr hesabına texnoparklar yaradılmasının artıq zərurətə çevrildiyini deyəndə onu doğma övladım kimi bağrıma basıb alnından öpmək istədim. Prezidentin səsləndirdiyi bu fikirlər bizim şəhər üçün taleyüklü bir məsələdir. Son illər şəhərimizdə yeni iş yerlərinin sayı sürətlə artsa da, hələ xeyli işsiz var. İşsiz varsa, deməli, o işsizin mənsub olduğu ailədə dolanışıq problemi də var. Bax, möhtərəm Prezidentin nəzərdə tutduğu tədbirlər bir tərəfdən ölkənin iqtisadi qüdrətini artırmağa hesablanırsa, az əhəmiyyət kəsb etməyən digər mühüm tərəfdən isə minlərlə yeni iş yerinin açılması ilə çox sayda ailələrin dolanışığını yaxşılaşdırmağı hədəfə alır.

Mən dünya görmüş insanam. Bəzən ağına-bozuna baxmadan keçmişi topa tutanlarla razılaşmıram. Sovetlər dövründə belə bir şüar vardı - kadrlar hər şeyi həll edir. Məncə, bu, çox doğru yanaşmadır və bu günümüz üçün də son dərəcə aktualdır. Sözümün canı var. Dövlətimizin başçısına bir də ona görə minnətdarıq ki, ölkə üçün strateji əhəmiyyətə malik Mingəçevirə qurucu, yaradıcı rəhbər təyin edib. 5-10 ilə görüləsi iş bir ildə görülüb. Əlbəttə, dövlətimizin qüdrəti sayəsində, bacarıqla səfərbər edilmiş mingəçevirlilərin əzmkarlığı ilə.

İlham Mayılov - şəhər mərkəzi xəstəxanasının baş həkiminin müavini:

- Həqiqətdir ki, bu gün Mingəçevir bayram əhval-ruhiyyəsindədir. Hamının üzü güldüyü, könlü açıldığı bu günlərdə bəlkə də daha çox sevinən tibb işçiləridir. Əlbəttə, bu, səbəbsiz deyil. Prezident İlham Əliyevin "Mingəçevir Mərkəzi Şəhər Xəstəxanasının yenidən qurulması haqqında" imzaladığı sərəncam çoxsaylı tibb işçilərinin üstünə gün kimi doğmuşdur. Mingəçevir səhiyyəsi vaxtilə bütün regionda böyük şöhrət qazanmışdı. Uzun illər boyu binaların təmir edilməməsi, müasir müayinə və müalicə avadanlıqlarının olmaması, xəstəxananın maddi-texniki bazasının zəifləməsi köhnə şöhrəti qoruyub saxlamağa imkan vermirdi.

Xəstəxana adamların daha çox müraciət etdiyi sosial ünvandır. Müayinə otaqlarının, laboratoriyaların, palataların vəziyyəti o həddə idi ki, biz xəcalət çəkməyə bilmirdik. Dövlət başçısının qayğı və diqqəti sayəsində illərdən bəri çəkdiyimiz bu sıxıntıdan qurtuluruq. Təsəvvür edin, xəstəxanada istilik sistemi yoxdur. Müasir tələblərə cavab verən müayinə və müalicə aparatları çatışmır. Böyük ehtiyac duyulan dializ aparatının olmaması şəhər sakinlərində narazılıq yaradır. Halbuki şəhərdə dializ olunası 36 nəfər xəstə var. İndi bu xəstələr Zaqatala, yaxud Bərdə rayonlarına getmək məcburiyyətində qalırlar.

Respublika Prezidenti İlham Əliyevin Mingəçevrə səfəri, iki gün sonra isə mərkəzi şəhər xəstəxanasının yenidən qurulması haqqında sərəncam imzalaması təkcə tibb işçilərinin deyil, bütün şəhər sakinlərinin böyük sevincinə səbəb olmuşdur. Dövlətin öz vətəndaşına sahib çıxması, hər kəsə çata biləcək qayğı və diqqətini əsirgəməməsi ruh yüksəkliyi yaratmaqla yanaşı, məsuliyyətimizi də artırır. Dövlət başçısının mingəçevirlilərin sağlamlığı qayğısına necə böyük həssaslıqla yanaşmasından məntiqi nəticə çıxaran həkimlərimizin fəaliyyətində artıq yeni dövr başlayır. Dərk edirik ki, səhiyyənin inkişafına artan dövlət qayğısının məntiqi davamı olaraq biz həkimlərdən nümunəvi xidmət tələb olunacaqdır. Biz fəaliyyətimizi yeni tələblər səviyyəsində qurmağa çalışırıq.

Səfər Cəfərov - səhər 1 saylı orta məktəbin direktoru:

- Dövlət başçısının şəhərimizə hər gəlişi bayrama çevrilir. Bu dəfəki səfərinin sevinci isə daha böyükdür. İllərdən bəri məktəblərimiz üçün müşkül olan bir məsələnin həllinə artıq start verilib. Şəhərimizin demək olar ki, bütün təhsil ocaqlarında çox sayda qaçqın və məcburi köçkün ailəsi məskunlaşırdı. Elə bizim 1 saylı şəhər orta məktəbində 29 sinif otağı qaçqınların istifadəsində idi. Əlbəttə, belə şəraitdə təhsildə qarşıya qoyulan müasir tələblərə cavab vermək çox çətindir. 20 ildir ki, məktəblərimiz belə ağır şəraitdə fəaliyyət göstərir. İndi isə üstümüzə gün doğub. Respublika Prezidenti İlham Əliyevin Mingəçevirə bu dəfəki səfəri şəhərimizin sosial-iqtisadi həyatının bütün sahələrində olduğu kimi, təhsildə də inkişafa güclü təkan verəcək. Qaçqın və məcburi köçkünlər üçün yeni salınan hər cür infrastruktura malik şəhərcik bir tərəfdən uzun illər boyu çətin şəraitdə yaşayan soydaşlarımızı məişət rahatlığına qovuşdurursa, digər tərəfdən təhsil müəssisələrinin normal fəaliyyətini təmin edəcəkdir. İllərlə arzu olaraq qalan və bu istəyi gerçəkləşdirən Prezident İlham Əliyevə şəhərin bütün pedaqoji işçiləri, şagirdləri, eləcə də valideynlər böyük təşəkkür və minnətdarlıqlarını çatdırırlar.

Səidə İbrahimova - Ağdam rayonundan məcburi köçkün, şəhid ailəsi:

- Bu günün gələcəyinə, arzularımın həyata keçəcəyinə inanırdım. Hər dəfə televiziyada yeni qaçqın şəhərciklərinin istifadəyə verildiyini, illər boyu ağır şəraitdə yaşayan ailələrin firavan həyata qovuşduğunu görandə öz-özümə pıçıldayırdım ki, bu bizə də nəsib olsun. İndi özümü xoşbəxt sayıram. Beş nəfərdən ibarət olan ailəmizin artıq öz evi var. Dördotaqlı mənzildə ailəmizin firavan yaşaması üçün hər cür şərait yaradılmışdır. Sevinən, bayram edən təkcə biz deyilik. Mingəçevirdə yeni tikilən çoxmərtəbəli yaşayış binalarında bizimlə bərabər 502 məcburi köçkün ailəsi də yeni mənzillərə köçmüşdür. Əlbəttə, bu sevinci bizə dövlətimizin başçısı İlham Əliyev bəxş etmişdir. Yeni mənzil alan ailələrin 471-i ağdamlıdır. Ağdamlılar bütün zamanlarda Prezident İlham Əliyevin siyasətini dəstəkləmişlər. Fəxr edirik ki, belə qayğıkeş rəhbərimiz var. Böyük Yaradanın nəzərləri həmişə onun üstündə olsun. Dövlət başçısının əvəzsiz qayğısı, diqqəti bizə ağrı-acılara üstün gəlməkdə güc-qüvvət, yaşamağa həvəs verir. Biz inanırıq ki, müdrik və qətiyyətli Prezidentimiz işğal altındakı torpaqlarımızı tezliklə azad edəcək, toy-bayramla Qarabağa, doğma Ağdama dönəcəyik.

Kamal Nəcəfli - şəhər gənclər və idman idarəsinin rəisi:

- Respublika Prezidenti İlham Əliyevin Mingəçevirə aprelin 16-da gerçəkləşən tarixi səfəri şəhərimizin gənclərinin həyatında çox əlamətdar hadisə ilə yaddaşlara yazılıb. Səfər zamanı dövlət başçısı Gənclər evinin açılış mərasimində iştirak etdi. Bütün regionda tayı-bərabəri olmayan bu möhtəşəm ocaq məhz Prezidentin təşəbbüsü ilə yaranmışdır. Ümumi sahəsi 380 kvadratmetr olan Gənclər evində şəhərimizin yeniyetmə və gənclərinin öz asudə vaxtlarını səmərəli keçirməsi, intellektual səviyyələrini artırmaları üçün hər cür şərait yaradılmışdır. Şəhər ictimaiyyətinin nümayəndələri ilə görüşdə dövlət başçısı digər quruculuq işləri ilə yanaşı, Mingəçevirdə Olimpiya İdman Mərkəzinin tikiləcəyini bəyan etdi. Dövlət başçısının qayğısı şəhərimizin gənclərini yeni uğurlara, müstəqil Azərbaycan dövlətinin fəal vətəndaşı olmağa ruhlandırır.

Dövlət başçısının Mingəçevirin sosial-iqtisadi inkişafında yeni dövrün başlandığı anlamına gətirən tarixi səfərindən bir neçə gün keçir. Amma bu bölgədə çox şeyin dəyişdiyi gerçək bir reallıqdır. Həmişə qaynar həyat yaşanan Mingəçevirdə indi fərqli bir durum var. Dövlət başçısının bu bölgənin yüksəlişinə artan qayğısı nur şəhərində formalaşan sağlam mənəvi-psixoloji mühitə yeni çalarlar verir. Şəhər rəhbərliyinin təşkilatçılıq bacarığı ilə adamların gücü aydın istiqamətə - ölkənin iqtisadi qüdrətinin artırılması, doğma diyarın cənnətə döndərilməsi uğrunda mübarizəyə səfərbər edilir. Mingəçevir Şəhər İcra Hakimiyyətinin başçısı Niyazi Bayramov söhbət zamanı dedi ki, Respublika Prezidenti İlham Əliyev bölgəyə səfəri zamanı burada görülən abadlıq-quruculuq işlərinə yüksək qiymət verməklə yanaşı, nur şəhərinin inkişafında mühüm rol oynayacaq yeni dövrün başlandığını bəyan etdi. Dövlət başçısı şəhər ictimaiyyətinin nümayəndələri ilə görüşdə demişdir:

"Mingəçevir Azərbaycanın çox böyük turizm mərkəzinə çevrilməlidir. Bunu etmək üçün bir daha demək istəyirəm ki, bütün imkanlar vardır. Artıq tikilən hotellər də turizm sektorunun inkişafına xidmət göstərəcəkdir. Eyni zamanda, biz gərək Mingəçeviri böyük sənaye mərkəzi kimi inkişaf etdirək. Mən Nazirlər Kabinetinin toplantısında bu məsələ ilə bağlı xüsusi göstəriş vermişəm... Biz Mingəçeviri yenidən böyük sənaye mərkəzinə çevirməliyik. Buna nail olmaq üçün artıq hökumətə müvafiq göstərişlər verilmişdir. İndi işlər gedir ki, Mingəçevirdə texnologiya parkı yaradılsın. Dövlətin dəstəyi ilə burada bir neçə iri müəssisə yaradılsın ki, iş yerləri çoxalsın".

Dövlət başçısı Mingəçevirin gələcək inkişafı sənayenin, turizmin inkişafı ilə bağlı olacaq fikrini bəyan etməklə nur şəhərinin üzünə yeni və daha işıqlı sabahlar açır. Bu qayğını yüksək dəyərləndirən mingəçevirlilər indi çox məmnundurlar. Onlar fəaliyyətinin əsas hədəfi insan amili olduğunu dəfələrlə bəyan edən dövlət başçısının yeritdiyi müdrik siyasəti birmənalı şəkildə müdafiə edir, həmişə öz prezidentlərinin ətrafında sıx cərgələrdə birləşdiklərini qürur və iftixarla dilə gətirirlər.

Lazım QULİYEV

Azərbaycan.-2013.- 24 aprel.- S.8.