Əli ƏHMƏDOV: Prezident seçkilərində İlham Əliyevin namizədliyinin irəli sürülməsi yalnız YAP-ın deyil, ümumilikdə Azərbaycan xalqının mütləq əksəriyyətinin təşəbbüsü və istəyidir

"Qarşıdan gələn prezident seçkilərində İlham Əliyevin namizədliyinin irəli sürülməsi yalnız Yeni Azərbaycan Partiyasının (YAP) deyil, ümumilikdə Azərbaycan xalqının mütləq əksəriyyətinin təşəbbüsü və istəyidir".

AzərTAc xəbər verir ki, bu sözləri jurnalistlərə YAP sədrinin müavini-icra katibi Əli Əhmədov söyləmişdir.

Ə.Əhmədov demişdir: "Ölkə vətəndaşları Prezident İlham Əliyevin növbəti dəfə namizədliyini birmənalı şəkildə dəstəkləyirlər. Düşünürəm ki, belə bir dəstək 10 il ərzində Prezident İlham Əliyevin rəhbərliyi ilə həyata keçirilən böyük quruculuq, inkişaf siyasəti ilə əlaqədardır. Bu illər ərzində Azərbaycan böyük bir inkişaf yolu keçmiş, modernləşmiş və müasirləşmişdir. Azərbaycanın dövlət olaraq gücünün və qüdrətinin artması insanların rifahının yüksəlməsində də özünü göstərir. Bütün bu uğurları hər bir vətəndaş öz həyatında görür və yüksək dəyərləndirir".

YAP sədrinin müavininin sözlərinə görə, insanlar rifah hallarının yüksəlməsini Prezident İlham Əliyevin həyata keçirdiyi siyasətlə bilavasitə əlaqələndirirlər. Dövlət başçısının həyata keçirdiyi siyasət nəticəsində Bakı şəhəri ilə yanaşı digər bölgələrimiz də tamamilə simasını dəyişir, insanların yaşaması üçün daha layiqli şərait yaradılır. İnsanlar üçün digər mühüm amil sabitlik, dinclik, əmin-amanlıqdır. Bunlar olmasaydı, insanın rifahının yüksəlməsi sahəsində atılan addımlar və nəticələr böyük dəyər kəsb etməzdi. Azərbaycanda insanın həyatının keyfiyyətinin vacib bir göstəricisi ondan ibarətdir ki, hər bir vətəndaş, ailə dinclik, əmin-amanlıq, rahatlıq şəraitində yaşayır, insanların təhlükəsizliyi təmin olunur. Bunları ümumiləşdirərək deyə bilərik ki, hər bir Azərbaycan vətəndaşı aydın şəkildə dərk edir ki, bu yüksək nemətlərin bundan sonra da davam etməsi Prezident İlham Əliyevin fəaliyyəti ilə bağlıdır. Ona görə də insanlar hesab edirlər ki, Prezident İlham Əliyevin növbəti beş ildə Azərbaycana rəhbərlik etməsi inkişaf, tərəqqi və yüksəliş prosesinin qarşıdakı illərdə də davam etməsinə zəmanət verir. Bu isə o deməkdir ki, qarşıdan gələn seçkilərdə Prezidentimizin namizədliyinin irəli sürülməsi Azərbaycan vətəndaşlarının bu gün və gələcəklə bağlı olan istək və arzuları ilə üst-üstə düşür.

Azərbaycan.-2013.- 26 aprel.- S.11.