Xarici İşlər Nazirliyində Azərbaycan - Rumıniya münasibətləri müzakirə edilmişdir

Aprelin 26-da Azərbaycanın xarici işlər naziri Elmar Məmmədyarovun Rumıniyanın xarici işlər naziri Titus Korlentsyanın başçılıq etdiyi nümayəndə heyəti ilə görüşü olmuşdur.

AzərTAc xəbər verir ki, görüşdə bütün sahələrdə ikitərəfli münasibətlərin yüksək səviyyəsi vurğulanmışdır. E.Məmmədyarov bildirmişdir ki, iki ölkə arasında siyasi, iqtisadi və enerji əməkdaşlığının genişləndirilməsi, habelə daha əvvəl dövlət başçılarının görüşü zamanı imzalanmış strateji əməkdaşlığa dair Sazişin icrası məsələləri nəzərdən keçirilmişdir. Azərbaycanda Rumıniya Mədəniyyəti günlərinin, Rumıniyada Azərbaycan Mədəniyyəti günlərinin keçirilməsi məsələləri də müzakirə edilmişdir.

Titus Korletsyan Bakıda keçirdiyi görüşlərdən söz açaraq əminliklə bildirmişdir ki, bu görüşlər ikitərəfli münasibətlərin inkişaf dinamikasında əhəmiyyətli rol oynayacaqdır. Nazir qeyd etmişdir ki, Rumıniya Azərbaycanın müstəqilliyini Türkiyədən sonra tanıyan ikinci ölkə olmuşdur və yaxın vaxtlarda iki ölkə arasında diplomatik münasibətlərin qurulmasının 20 illiyi qeyd ediləcəkdir. O bildirmişdir ki, strateji əməkdaşlığa dair Saziş ikitərəfli münasibətlərin yüksək səviyyəsinə dəlalət edir. T.Korletsyan daha sonra vurğulamışdır ki, Rumıniya Azərbaycandan investisiyaların həcminin artmasına maraq göstərir.

T.Korletsyan Avropaya qaz nəql etmək üçün Rumıniyanın Konstansa limanından istifadə olunması imkanı barədə jurnalistlərin suallarını cavablandırarkən demişdir ki, hazırda bu mövzuda danışıqlar davam etdirilir və həmin limandan istifadə olunması bütün tərəflər üçün çox faydalıdır, lakin istifadə barədə yalnız zəruri müqavilələr imzalandıqdan sonra danışmaq olar.

Azərbaycan.-2013.- 27 aprel.- S.9.