İlham Əliyevə 92 faizlik etimad

Dövlət başçısı qarşıdakı prezident seçkilərinə alternativsiz və birmənalı ümummilli etimadla gedir

Azərbaycanda əhalinin 92 faizi hökumətə, yəni Prezident İlham Əliyevə, mövcud iqtidara inanır. Bu fikir yerli qurumların deyil, Avropa İttifaqı tərəfindən maliyyələşdirilən layihə çərçivəsində müəyyənləşib. Qeyd edək ki, 2012-ci ilin sonunda Azərbaycan üzrə "Avropa Qonşuluğu Barometri" çərçivəsində keçirilən sorğu Avropa Qonşuluq Siyasəti ölkələrində ictimai rəyin öyrənilməsi üzrə Avropa İttifaqı (Aİ) tərəfindən maliyyələşdirilən layihə çərçivəsində 2012-ci ilin noyabr-dekabr aylarında 1000 respondent arasında keçirilib.

"Avropa Qonşuluğu Barometri" (ictimai rəyin və media-monitorinqin tədqiqatı) Aİ tərəfindən maliyyələşdirilən regional informasiya proqramının bir hissəsidir və qonşuluq siyasətinin, Aİ əməkdaşlıq tədbirləri və proqramlarının məlumatlandırma və qəbuletmə səviyyəsinin qiymətləndirilməsinə istiqamətlənmişdir. Bu barədə Avropa Qonşuluğu İnformasiya Mərkəzinin yaydığı məlumatda bildirilir. Sorğuda iştirak edən azərbaycanlılar öz həyatlarından məmnundurlar (bu, region ölkələrindən daha çoxdur) - rəyi soruşulanların 65 faizi öz həyatlarından razıdırlar. Həyatdan məmnunluq səviyyəsi gənclər və təhsil alan respondentlər arasında daha yüksəkdir.

Rəyi soruşulanların böyük əksəriyyəti öz hökumətinə (92 faiz) və parlamentə (68 faiz) inanır. Həmçinin rəyi soruşulanlar Azərbaycanın inkişaf istiqamətindən razıdırlar: 48 faiz hesab edir ki, Azərbaycan düzgün istiqamətdə hərəkət edir və yalnız 17 faiz bununla razılaşmır. İqtisadi əhval-ruhiyyə indeksi də yüksəkdir: rəyi soruşulanların 69 faizi iqtisadi vəziyyətin yaxşı olduğunu hesab edir. 60 faiz isə ölkədə gedən demokratik proseslərin nəticələrindən razıdır.

Müstəqilliyinin bərpasından sonra keçən 22 ildə bütün sahələr üzrə uğurlarını gündən-günə daha da artıran Azərbaycan dünyanın qüdrətli dövlətləri sırasında özünə yer alıb. Sürətli iqtisadi inkişaf, sosial-iqtisadi layihələrin icrası və aparılan məqsədyönlü siyasət bu gün ölkəmizin bir çox sahələrdə uğur qazanması ilə nəticələnir. Bütün bunlar isə aparılan beynəlxalq sorğular, müsabiqələr və araşdırmalar nəticəsində bir daha özünü göstərir və dünya Azərbaycan reallığı ilə tanış olur. "Avropa Qonşuluğu Barometri" çərçivəsində keçirilən sorğu nə ilk, nə də sonuncu sorğu deyil. Bundan öncə də keçirilən beynəlxalq sorğularda Azərbaycan və dövlətimizin başçısı İlham Əliyev dəfələrlə qaliblər sırasında olub. Elə bu il aprel ayının 4-də Böyük Britaniyanın nüfuzlu "The Business Year" jurnalının Azərbaycan Prezidenti İlham Əliyevi dünyada "İlin Adamı" elan etməsi də buna əyani sübutdur. Dövlət başçısı "İlin Adamı" mükafatına son beş ildə Azərbaycanın dinamik inkişafına, dünyanın geosiyasi məkanında fəal iştirakına, BMT-nin Təhlükəsizlik Şurasının üzvü kimi qlobal arenada sülh və təhlükəsizliyin təmin olunmasına, "Azərspace" ilk telekommunikasiya peykinin orbitə buraxılması ilə Azərbaycanda, bölgədə və dünyada internetin, informasiya-kommunikasiya texnologiyaları sektorunun inkişafına verdiyi önəmli töhfələrə, Azərbaycanın mühüm beynəlxalq ictimai, siyasi, iqtisadi, humanitar forumların, konfransların, idman yarışlarının keçirildiyi mərkəzə çevrilməsindəki xidmətlərinə görə layiq görülüb. Mükafatın təqdimat mərasimində isə Prezident İlham Əliyev bildirib ki, Azərbaycanda əldə olunan bütün uğurların əsasında ölkənin sürətli iqtisadi inkişafı dayanır: "Bu gün iqtisadiyyatın şaxələndirilməsi nəticəsində neft-qaz amilindən asılılıq azalıb, neft gəlirlərinin şəffaf şəkildə insanların və ölkənin mənafeyi naminə istifadə olunması nəticəsində son 10 ildə yoxsulluğun səviyyəsi 50 faizdən 6 faizə qədər enib. İnformasiya-kommunikasiya texnologiyaları sektorunda sürətli inkişafa nail olunub. Azərbaycanın kosmik ailənin üzvü olması xüsusi önəm daşıyır. Bu il ölkəmizdə "İnformasiya-kommunikasiya texnologiyaları ili" elan edilib və bu sahədə qazanılan uğurlar çoxdur. Bir sözlə, ölkəmizin nüfuzu beynəlxalq aləmdə getdikcə möhkəmlənir".

Bütün bunlar beynəlxalq maliyyə təşkilatları, beynəlxalq fondlar tərəfindən hazırlanan hesabatlarda öz əksini tapıb. Dünya Bankının "Doing Business" hesabatında Azərbaycanın yüksək irəliləyişdə olduğu qeyd edilir. Dünya İqtisadi Forumu iqtisadiyyatın rəqabətə davamlılığı baxımından Azərbaycanı 46-cı yerdə göstərir. Maliyyə və iqtisadi böhran illərində "Standard & Poor's", "Fitch" və "Moody's" reytinq agentlikləri Azərbaycanın kredit reytinqini yaxşılaşdırıb. Bir vaxtlar borc alan ölkələr sırasında olan ölkəmiz hazırda donor ölkəyə çevrilib. İndi Azərbaycan öz hüdudlarından kənarda böyük sərmayələr yatırır. Bu gün Azərbaycan dünyada ən sürətli iqtisadi artıma malik ölkələrdən biridir. Təkcə son 5 il ərzində Azərbaycanın ümumi daxili məhsulu 4 milyard dollardan 25 milyard dollara çatıb. Cənubi Qafqazın iqtisadiyyatında Azərbaycan iqtisadiyyatının payı 80 faizdən artıqdır. Postsovet məkanında Azərbaycan əhalinin həyat səviyyəsinin yüksəkliyinə görə ən uğurlu ölkədir. İndi Azərbaycan ortagəlirli iqtisadiyyata malikdir. Qlobal maliyyə-iqtisadi böhran nəticəsində dünyanın aparıcı ölkələrində baş vermiş kəskin ressesiyaya baxmayaraq, Azərbaycanda makroiqtisadi sabitlik, iqtisadi artım, yoxsulluq səviyyəsinin azalması və əhalinin maddi rifah halının yüksəlməsi 2013-cu ildə də davam edib. Aprel ayında Dünya İqtisadi Forumunun (Davos Forumu) Azərbaycanda keçirilməsi isə beynəlxalq birliyin ölkəmizin iqtisadi inkişafını etiraf etməsi kimi qiymətləndirilir. Çünki Azərbaycanın iqtisadiyyatında, iqtisadi inkişafı sahəsində çox əhəmiyyətli nailiyyətlər əldə edilməsəydi, ölkəmizin timsalında iqtisadi inkişaf və tərəqqi mövzusunda diskussiyalar aparılması üçün kifayət qədər əsaslar olmasaydı, Davos Forumunun Bakıda keçirilməsi üçün də qərar qəbul edilməzdi. Belə bir qərarın qəbul edilməsi, hər şeydən əvvəl, Azərbaycanın iqtisadi inkişafının və ölkəmizin inkişaf modelinin etiraf olunması kimi qiymətləndirilir. Bu, bir daha onu göstərir ki, Azərbaycan dünya birliyində artıq özünü təsdiq edərək tanıtmış, ayrı-ayrı önəmli toplantıların keçirilməsinə ev sahibliyi etmək imkanında, qüdrətində olduğunu sübuta yetirən bir ölkədir.

Müstəqil dövlətimizin sürətli və ardıcıl inkişafına təkan verən bütün bu tədbirlər böyük uzaqgörənliklə hazırlanmış inkişaf strategiyasının uğurlu tətbiqinin praktik nəticələridir. Müasir Azərbaycan dövlətinin qurucusu, ümummilli lider Heydər Əliyevin müəyyənləşdirdiyi strategiyanın Prezident İlham Əliyev tərəfindən uğurla həyata keçirilməsi Azərbaycanın qarşısında böyük imkanlar açır. Bu gün müstəqil Azərbaycanın beynəlxalq aləmdə iqtisadi və siyasi mövqeyini daha da möhkəmləndirməsi, beynəlxalq qurumların hesabatlarında islahatçı ölkə kimi yer tutması, dünyanın nüfuzlu təşkilatlarının Azərbaycanın mövqeyini dəstəkləyən qərar və qətnamələr qəbul etməsi bir həqiqəti ortaya qoyur ki, ölkəmizin seçdiyi yol düzgündür və bu yol bizi daha uğurlu gələcəyə aparır. Azərbaycan Prezidenti İlham Əliyevin rəhbərliyi ilə həyata keçirilən strateji kurs özündə millətin, dövlətin mənafeyinə cavab verən ən ali prinsipləri və normaları ehtiva edir.

Bu gün tam cəsarətlə demək olar ki, ölkəmizdə aparılan müstəqil dövlət quruculuğu prosesində iqtisadi islahatların və inkişafın Azərbaycan modeli yaranıb. Bu model əsasında uğurla həyata keçirilən və yeni çalarlarla zənginləşdirilən sosial-iqtisadi siyasətin nəticələri Azərbaycanın həm də beynəlxalq imicinin və dövlət müstəqilliyinin daha da möhkəmləndirilməsinə gətirib çıxarıb.

Prezident İlham Əliyevin rəhbərliyi ilə reallaşdırılan strateji kurs daxili ictimai-siyasi sabitliyi və tərəqqini də ən yüksək səviyyədə təmin edib. Yerli və xarici analitiklərin yekdilliklə üzərində durduqları başlıca məsələlərdən biri də budur ki, Azərbaycanda hökm sürən ictimai-siyasi sabitliyin əsaslarını dövlət tərəfindən həyata keçirilən uğurlu islahatlar və tətbiq edilən yeniliklər, inkişaf modelləri təşkil edir. Ölkəmizdə insan və vətəndaş hüquq və azadlıqlarının ən yüksək səviyyədə təmin edilməsi, qanunvericilik bazasının zənginləşdirilməsi, sosial-siyasi təsisatların legitimləşdirilməsi, vətəndaşların siyasi həyatda iştirakına maksimum şəraitin yaradılması kimi göstəricilər və nəticələr deyilənləri bir daha təsdiq edir.

Bütün bunlar onu deməyə əsas verir ki, 2003-cü il oktyabrın 15-də keçirilən prezident seçkilərində seçicilərin 76 faiz, 2008-ci ilin oktyabrında keçirilən seçkilərdə seçicilərin 88,73 faiz səsini qazanan İlham Əliyev 2013-cü ilin oktyabrında keçiriləcək seçkilərə seçicilərin 90 faizdən artıq etimadı ilə qatılacaq. Bununla da deyə bilərik ki, İlham Əliyev qarşıdakı prezident seçkilərinə alternativsiz və birmənalı ümummilli etimadla gedir.

Rəşad BAXŞƏLİYEV

Azərbaycan.-2013.- 28 aprel.- S.4.