Bakıda «Metallurgiya və materialşünaslığın problemləri» mövzusunda birinci Beynəlxalq konfrans işə başlamışdır

Aprelin 29-da Azərbaycan Texniki Universitetində (AzTU) bu ali təhsil müəssisəsinin, Təhsil Nazirliyi və "Baku Steel Company" şirkətinin birgə təşkilatçılığı ilə "Metallurgiya və materialşünaslığın problemləri" mövzusunda birinci Beynəlxalq elmi-praktik konfrans işə başlamışdır.

AzərTAc xəbər verir ki, ümummilli lider Heydər Əliyevin 90 illik yubileyinə həsr edilmiş tədbirdə Azərbaycan Milli Elmlər Akademiyasının vitse-prezidenti, akademik Akif Hacıyev, doktorantlar, ali məktəblərin müəllimləri, sənaye müəssisələrinin mütəxəssisləri, xarici ölkələrdən gəlmiş alimlər iştirak etmişlər.

Əvvəlcə iştirakçılar universitetin foyesində ulu öndər Heydər Əliyevin büstü önünə qızılgüllər düzmüş, xatirəsini ehtiramla yad etmişlər.

Universitetin akt zalında davam etdirilən tədbirdə AzTU-nun rektoru, professor Havar Məmmədov Azərbaycanda metallurgiya sənayesinin təşəkkül tapmasında və inkişafında ümummilli lider Heydər Əliyevin müstəsna rolunu qeyd etmişdir. Bildirmişdir ki, metallurgiya və sənayenin digər yeni sahələri üçün kadr hazırlığı, xaricdə təhsil alaraq respublikaya qayıdan gənc mütəxəssislərin sənayenin müxtəlif sahələrinin inkişafına cəlb edilməsi daim ulu öndər Heydər Əliyevin diqqət mərkəzində olmuşdur. Ulu öndərin bu siyasəti hazırda Prezident İlham Əliyev tərəfindən müvəffəqiyyətlə davam etdirilir. Rektor Prezident İlham Əliyevin "Azərbaycan Polad İstehsalı Kompleksinin yaradılması haqqında" 2013-cü il 23 aprel tarixli sərəncamının əhəmiyyətini xüsusi vurğulamışdır.

H.Məmmədov bildirmişdir ki, tədbirin əsas məqsədi metallurgiya və materialşünaslığın müasir problemlərinin müzakirə edilməsi, bu sahədə aparılan elmi-tədqiqat işlərinin ümumiləşdirilməsi, mütərəqqi texnologiyaların istehsalata tətbiqinin genişləndirilməsi, səmərəli təcrübə mübadiləsinin aparılması və işgüzar əlaqələrin qurulmasıdır.

Konfransda 10-dan çox ölkədən, o cümlədən Türkiyə, Rusiya, Ukrayna, Belarus, Qazaxıstan, Özbəkistan, Almaniya və digər ölkələrdən tanınmış alimlər məruzələrlə çıxış edəcəklər.

Yerli və xarici ölkə mütəxəssislərinin iştirakı ilə keçirilən tədbirin aktuallığını və qarşılıqlı əlaqələrin qurulmasında əhəmiyyətini qeyd edən rektor konfransın işinə uğurlar arzulamışdır.

Plenar iclasda AzTU-nun metallurgiya və metalşünaslıq kafedrasının müdiri, professor Sübhan Namazovun "Heydər Əliyevin Azərbaycan metallurgiyasının inkişafında rolu və perspektivlər" mövzusunda məruzəsi dinlənilmişdir. Qeyd olunmuşdur ki, iqtisadiyyatın digər sahələrinin inkişafında metallurgiyanın rolunu yaxşı bilən ümummilli lider Heydər Əliyev metallurgiya sənayesinin inkişafına xüsusi diqqət yetirmişdir. Məhz bu diqqət və qayğının nəticəsində Azərbaycan Filizsaflaşdırma Kombinatı keçmiş SSRİ məkanında qara metallurgiya sənayesinin ən qabaqcıl müəssisələrindən birinə çevrilmişdi. Burada neft sənayesi üçün istehsal olunan müxtəlif çeşidli yüksək keyfiyyətli borulardan xarici ölkələrdə geniş istifadə olunurdu.

Ötən əsrin 70-ci illərində ümummilli liderin uzaqgörən siyasəti nəticəsində çoxlu sayda metallurq, maşınqayırma sahəsinin alim və mühəndisləri Rusiyanın və SSRİ-nin digər respublikalarında elm mərkəzlərinin aspirantura və doktoranturalarına göndərilmişlər. Sonradan bu mütəxəssislərin hesabına Azərbaycan Texniki Universitetində və istehsalat sahələrində güclü kadr potensialı formalaşmışdır. S.Namazov vurğulamışdır ki, hazırda ulu öndərin bütün sahələrdə siyasətini uğurla davam etdirən Prezident İlham Əliyev eyni zamanda sənaye siyasətini də müvəffəqiyyətlə həyata keçirir, metallurgiya sənayesinin inkişafına müstəsna əhəmiyyət verir, böyük qayğı göstərir. Bu gün Prezident İlham Əliyevin rəhbərliyi altında metallurgiya sənayesinin inkişafı məqsədi ilə ciddi işlər görülür, respublikamızın inkişafına yönəlmiş mühüm layihələr həyata keçirilir.

Konfransda Fransanın Pyer və Mariya Küri Universitetinin professoru Filip Vermaut və Tomsk Politexnik Universitetinin prorektoru, professor Dmitri Çinaxovun mövzuya dair məruzələri dinlənilmişdir.

Sonra konfrans işini "Qara və əlvan metallurgiya", "Materialşünaslıq və nanomateriallar", "Maşınqayırmada tribotexnika", "Metallurgiya və materialşünaslıqda innovasiyalar" bölmələrində davam etdirmişdir. Bölmə iclaslarında ölkədə metallurgiya və materialşünaslığın problemləri və perspektivlərinə dair məruzələr dinlənilmiş, işgüzar müzakirələr aparılmışdır.

Tədbir çərçivəsində metallurgiya sahəsinə həsr olunmuş kitablardan ibarət sərgi nümayiş etdirilmişdir.

Konfransın işi aprelin 30-da bölmə iclaslarında davam etdiriləcəkdir.

Azərbaycan.-2013.- 30 aprel.- S.3.