Ailə, Qadın və Uşaq Problemləri üzrə Dövlət Komitəsinin sədri Monqolustanda keçirilən Demokratiya Birliyi naminə VII Nazirlər Konfransında iştirak etmişdir

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova aprelin 27-dən 29-dək Monqolustanda keçirilən Demokratiya Birliyi naminə VII Nazirlər Konfransında iştirak etmişdir.

Konfransda 70-dən artıq ölkənin yüksək səviyyəli nümayəndə heyəti təmsil olunmuşdur. Komitənin mətbuat xidmətindən AzərTAc-a bildirmişlər ki, konfransın birinci günü "Demokratiya və Minilliyin İnkişaf Məqsədləri", "Vətəndaş cəmiyyətinin inkişafı" mövzularında müzakirələr keçirilmişdir.

H.Hüseynova "Qadınların gücləndirilməsi demokratiyanın möhkəmlənməsidir" mövzusunda təşkil olunmuş paneldə çıxış etmişdir. O, Azərbaycanda qadın hüquqlarının müdafiəsi və onların ictimai həyatda fəallıqlarının artırılmasının dövlətimizin siyasətinin prioritet sahələrindən biri olduğunu vurğulamışdır.

Komitə sədri qadın hüquqlarının müdafiəsi sahəsində ölkəmizdə qəbul olunan müvafiq qanunlar və onların implementasiyası haqqında məlumat vermişdir.

Əhalinin inkişafı və rifah naziri ilə görüşdə əlaqələrin genişləndirilməsi məqsədi ilə memorandumun imzalanması qərara alınmışdır.

H.Hüseynova Monqolustan Respublikasının yerli televiziya kanallarına respublikamızda həyata keçirilən işlər və uğurlu islahatlar haqqında məlumat vermişdir. Konfransın yekunu olaraq Ulan-Bator Bəyannaməsi qəbul olunmuşdur.

Azərbaycan.-2013.- 30 aprel.- S.3.