«TOUR D`AZERBAIDJAN» beynəlxalq velosiped turuna həsr olunan mətbuat konfransı keçirilmişdir

Mətbuat konfransında çıxış edən Azərbaycan Velosiped İdmanı Federasiyasının vitse-prezidenti, təşkilat komitəsinin sədri Sahib Ələkbərov "TOUR D`AZERBAIDJAN" beynəlxalq velosiped turu, onun marşrutları, habelə tura hazırlıq işlərinin mövcud vəziyyəti barədə media nümayəndələrini məlumatlandırmışdır.

Qeyd edilmişdir ki, ümummilli lider Heydər Əliyevin 90 illik yubileyinə həsr olunan beynəlxalq velosiped turu 5 mərhələdən ibarət olmaqla may ayının 1-dən 5-dək Bakı şəhəri, Abşeron, Qobustan, Şamaxı, İsmayıllı, Qəbələ, Oğuz, Şəki rayonlarının ərazisində keçiriləcək. Veloturda 24 ölkədən, o cümlədən ABŞ, İtaliya, Almaniya, Türkiyə, Rusiya, Avstriya, Niderland, Norveç, İsveçrə, Portuqaliya, Belçika, Danimarka, Avstraliya, Əlcəzair, Latviya, Ukrayna, Belarus, Qazaxıstan və digər xarici ölkələrdən 500 nəfərdən çox iştirakçının və fəxri qonaqların, o cümlədən Beynəlxalq Velosipedçilər İttifaqının rəhbərliyinin, dünyanın tanınmış velosipedçilərinin, eləcə də XXX London Yay Olimpiadasının qalibi, Qazaxıstan velosipedçisi Aleksandr Vinokurovun iştirakı gözlənilir.

Veloturda ümumilikdə 25 komanda çıxış edəcək ki, bunların da 17-si kontinental, 6-sı milli komandalardır. Hər komandanın tərkibində 6 velosipedçi yarışacaq. Bütövlükdə velotura 41 ölkədən velosipedçi qatılacaq.

Veloturun təşkilat komitəsinin üzvü Albrext Röder qeyd etmişdir ki, turda iştirak edən komandalardan 20-si təxminən eyni qüvvəyə malikdir ki, bu da yarışın ciddi rəqabət şəraitində keçəcəyini söyləməyə əsas verir. Bu il Minskdə keçirilmiş trek yarışları üzrə dünya çempionatının qalibləri olan 2 velosipedçi də Avstraliya komandasının tərkibində "Tour d`Azerbaıdjan"a qatılacaq. Turda iştirak edən velosipedçilər arasında "Tour d'France" yarışlarının mükafatçıları da var.

A.Röder "Baku Synergy Cycling Project" komandasının əsas rəqibləri kimi "Rabobank Development Team" (Hollandiya), "Leopard - Trek Continental Team" (Lüksemburq) və "Continental Team Astana" (Qazaxıstan) komandalarını gördüklərini bildirmişdir.

S.Ələkbərov tur çərçivəsində hazırlıq işlərinin artıq yekunlaşdığnı bildirmiş və qeyd etmişdir ki, turun 1-ci və 5-ci mərhələləri çərçivəsində Bakı şəhərində bir sıra prospektlər və yollarda nəqliyyatın hərəkəti dayandırılacaq və ya məhdudlaşdırılacaq. Turun ilk günü - may ayının 1-də Heydər Əliyev prospektinin saat 10.30-dan 14.00-dək nəqliyyatın hərəkəti üçün bağlanacağı gözlənilir: "Böyük velosiped yarışları zamanı nəqliyyatın hərəkətinin məhdudlaşdırılması dünyanın bütün ölkələrində tətbiq olunur. Məsələn, Fransada velosiped yarışları zamanı Parisin mərkəzi yolu olan "Yelisey çölləri", İstanbulda şəhərin Asiya və Avropa hissəsini bir-birinə bağlayan başlıca hərəkət qovşağı olan körpü bağlanır".

Sonra media nümayəndələrinin sualları cavablandırılmışdır.

Azərbaycan.-2013.- 30 aprel.- S.11.