Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının beşillik fəaliyyəti müzakirə edilmişdir

Aprelin 11-də Beynəlxalq Mətbuat Mərkəzində QHT Əməkdaşlıq Alyansının təşkilatçılığı ilə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 5 illik fəaliyyətinə həsr olunmuş ictimai müzakirə keçirilmişdir.

AzərTAc xəbər verir ki, tədbirdə toplantının məqsədinin ölkəmizdə demokratik təsisatların və vətəndaş cəmiyyətinin inkişafında mühüm rol oynayan QHT-lərə Dövlət Dəstəyi Şurasının yaranmasının 5 illik fəaliyyətinə bir daha nəzər salmaq, milli QHT-lərin daha da geniş təşəkkül tapdığı bu dövrdə qazanılan nailiyyətlər, bundan sonra görüləcək işlərlə bağlı geniş ictimai müzakirə açmaq olduğu bildirilmişdir.

Qeyd edilmişdir ki, Prezident İlham Əliyevin 2008-ci il 16 aprel tarixli sərəncamı ilə yaradılan Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası ötən 5 il müddətində vətəndaş cəmiyyətinin inkişafı istiqamətində mühüm işlərə imza atmışdır. Şuranın fəaliyyəti bütün qeyri-hökumət təşkilatları və vətəndaş cəmiyyətləri üçün önəmli bir hala çevrilmişdir.

Tədbirdə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 5 illik fəaliyyəti ilə bağlı hesabat məruzəsi dinlənilmişdir.

Məruzədə qeyd edilmişdir ki, QHT-lərə Dövlət dəstəyi Şurası bu illər ərzində milli maraqların qorunması, Konstitusiya və qanunlara, dövlət rəmzlərinə hörmətin formalaşdırılması, eləcə də Azərbaycanın ərazi bütövlüyünün bərpası, Ermənistan-Azərbaycan, Dağlıq Qarabağ münaqişəsi ilə bağlı ölkəmizin mövqeyinin dünyada fəal şəkildə təqdim edilməsi, qaçqın və məcburi köçkünlərin hüquqlarının müdafiəsi, azərbaycançılıq ideyasının təbliği, ümumiyyətlə, dövlət və cəmiyyətin inkişafı üçün əhəmiyyət kəsb edən problemlərin həllinə qeyri-hökumət təşkilatlarının cəlb olunması və onlara məlumat, metodiki, təşkilati-texniki, maliyyə yardımının göstərilməsinə dair yüzlərlə layihənin maliyyələşdirilməsini həyata keçirmişdir.

Tədbirdə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası katibliyinin icraçı direktoru Fərasət Qurbanov çıxış edərək təmsil etdiyi qurumun milli donor institutunun ilk məktəbi olduğunu və indiyədək təkcə Azərbaycanda deyil, bütövlükdə keçmiş Sovetlər Birliyi və indiki MDB məkanı ölkələrində belə bir təcrübənin olmadığını diqqətə çatdırmışdır.

F.Qurbanov vurğulamışdır ki, qısa müddətdə qurumun əldə etdiyi uğurlar sevindiricidir. QHT-lərə dövlət dəstəyini həyata keçirən, eyni zamanda, donorluq fəaliyyəti ilə məşğul olan beynəlxalq təşkilatların, inkişaf etmiş ölkələrin yüz illərlə əldə etdikləri təcrübələri vardır. Azərbaycanın bu prosesə 5 ildir ki, qoşulmasına baxmayaraq, əldə olunan əhəmiyyətli uğurlar göz qarşısındadır. Bütün bu uğurlar Azərbaycan Prezidenti İlham Əliyevin ölkəmizdə vətəndaş cəmiyyətinə dəstəyini əsirgəməməsi sayəsində mümkün olmuşdur.

Şuranın fəaliyyətinin müzakirəyə çıxarılmasına görə minnətdarlığını bildirən F.Qurbanov qurumun fəaliyyəti ilə bağlı müzakirələrin, söylənilən tənqidi fikirlərin ümumi işin xeyrinə olacağını söyləmişdir.

Azərbaycan Respublikasının Prezidenti Administrasiyasının İctimai-siyasi məsələlər şöbəsinin məsul əməkdaşı Vüsal Quliyev bildirmişdir ki, qeyri-hökumət təşkilatları ilə Azərbaycan hökuməti arasındakı münasibətlərin yeni mərhələsi 2007-ci ildə Azərbaycanda Qeyri-Hökumət Təşkilatlarına Dövlət Dəstəyi Konsepsiyasının qəbul olunması ilə başlanmışdır. Həmin ilin sonunda bu konsepsiyanın reallaşdırılması ilə bağlı zəruri təşkilati tədbirlər görülmüş, 2008-ci ildən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası fəaliyyətə başlamışdır.

Qeyd edilmişdir ki, bu gün Şura hakimiyyətin QHT-lərə dövlət dəstəyi konsepsiyasını uğurla icra edir. Azərbaycan hakimiyyəti artıq QHT-lərə sadəcə tərəfdaş kimi deyil, bilavasitə ölkə vətəndaşlarının təmsil olunduqları kütləvi təşkilatlar kimi baxır, onların bu və ya digər təşəbbüslərini həyata keçirmələrinə maddi dəstək vermək iradəsini ortaya qoyur.

Tədbirdə Milli Məclisin deputatlarından Adil Əliyev, Əli Məsimli, Yevda Abramov və QHT-lərin rəhbərləri qeyri-hökumət təşkilatlarının inkişaf problemlərinin həlli, müvafiq qanunvericilik bazasının təkmilləşdirilməsi, dövlət orqanları ilə vətəndaş cəmiyyəti institutları arasında əməkdaşlıq münasibətlərinin sabit və səmərəli sisteminin yaradılması və s. məsələlər barədə geniş müzakirələr aparmışlar.

Sonda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının beşillik fəaliyyəti ilə bağlı QHT Əməkdaşlıq Alyansının təhlil-açıqlaması toplantı iştirakçılarının rəylərini özündə əks etdirən yekun sənəd kimi qəbul edilmişdir.

Azərbaycan.- 2013.- 12 aprel.- S. 7.