Tanınmış türkiyəli pianoçunun V Qəbələ Beynəlxalq Musiqi Festivalında çıxışı alqışlarla qarşılanmışdır

Heydər Əliyev Fondunun möhtəşəm mədəniyyət layihələrindən biri olan V Qəbələ Beynəlxalq Musiqi Festivalı uğurla davam edir.

AzərTAc xəbər verir ki, festivalın proqramına uyğun olaraq iyulun 31-də "Qafqaz Resort" hotelinin kamera zalında keçirilən növbəti kamera musiqisi axşamında tanınmış türkiyəli pianoçu xanım İdil Biret çıxış etmişdir.

Klassik Avropa bəstəkarlarının əsərlərini təqdim edən İdil Biret gözəl çıxışı ilə dinləyicilərin qəlbinə yol tapmışdır.

Musiqi axşamında L.Van Betxoven və Frederik Şopenin əsərləri ifa olunmuşdur.

Tanınmış pianoçunun çıxışı tamaşaçılar tərəfindən alqışlarla qarşılanmışdır.

Paris Konservatoriyasında təhsil almış İdil Biret 16 yaşından Boston, London, Drezden orkestrləri ilə geniş konsert proqramı ilə çıxış etmişdir.

İdil Biret dünya vətəndaşıdır. O, yorulmadan qastrol səfərlərinə çıxaraq musiqisini dünyanın, demək olar ki, hər bir guşəsində tanıtmışdır. Ötən əsrin 80-ci illərinin ortalarından başlayaraq məşhurlaşan İdil Biret əsasən caz-pop üslubunda ifa edən pianoçu kimi tanınır.

Milyon yarımdan artıq tirajla satılmış albomları və bütün dünya üzrə onlarla konsertləri ilə tanınan İdil Biret instrumental musiqinin ən parlaq ulduzlarından biridir. Azad ruhu və yaradıcılıq dühası ona tanınmış musiqiçilərlə, istedadlı sənətkarlarla eyni səhnədə çıxış etmək imkanı yaratmışdır.

Bir çox nüfuzlu beynəlxalq mükafatlara layiq görülən İdil Biret klassik musiqi, caz və yeni əsr musiqisinin qlobal ritmlərinin ahəngi və təsiri ilə dolu olan coşqun, emosional və ekzotik melodiyaların çox maraqlı kolleksiyasını tamaşaçılara təqdim edə bilmişdir.

Türk pianoçusu Şərqin musiqi mədəniyyətinə sədaqətini qoruyub saxlamış, orijinal bəstəkar, özünəməxsus ifaçı kimi ürəkləri fəth etmişdir.

Azərbaycan.-2013.- 1 avqust.- S.4.