Prezident İlham
ƏLİYEV: «Bu gün
bizim əsas hədəfimiz qeyri-neft sektorunu inkişaf etdirməkdən ibarətdir»
Cari ilin birinci yarısında qeyri-neft sektorunda məhsul
istehsalı 11 faiz artmışdır
Xüsusən
son illər ölkə
iqtisadiyyatının neft-qaz amilindən
asılılığını azaltmaq üçün qeyri-neft
sənayesinin inkişafı istiqamətində bir
sıra mühüm addımlar
atılır. İlk növbədə, mövcud qeyri-neft sənayesi
müəssisələrini dirçəltmək üçün kapital qoyuluşu artırılır. Bununla
yanaşı, müasir dövrün
tələbinə uyğun yeni müəssisələr də
yaradılır. Onu da
qeyd edək ki, qeyri-neft sənaye müəssisələrinin
yaradılması üç mənbə
- dövlət, xarici və yerli sahibkarların vəsaitləri hesabına
maliyyələşdirilir. Hazırda bu
istiqamətdə işlər daha böyük vüsət alıb.
Sənayeləşmənin
coğrafiyası da genişlənir. Belə
ki, əvvəllər yeni
istehsal sahələri əsasən
Bakıda yaradılırdısa, son bir neçə ilin
statistikası yeni sənaye müəssisələrinin
böyük əksəriyyətinin
bölgələrdə istifadəyə verildiyini
göstərir. Bunun da
xüsusi əhəmiyyəti var. Çünki regionlarda açılan sənaye müəssisələri
bölgələrin iqtisadiyyatının inkişafına təkan
verməklə bərabər, yüksək maaşlı yeni iş yerlərinin
açılmasına şərait yaradır. O da diqqətçəkən faktdır ki, regionlarda
açılan çoxsaylı sənaye müəssisələrində
istehsal olunan məhsullar
bu gün dünya bazarına da
çıxarılır və xaricdə analoji
məhsullarla uğurla rəqabət
aparır.
Hazırda dövlətin
ayırdığı güzəştli kreditlər
hesabına regionlarda qeyri-neft
sektorunun inkişafında önəmli rol oynayacaq müəssisələrin
inşası davam edir.
Bu sıraya 13 quşçuluq
fabriki, 2 heyvandarlıq kompleksi,
12 soyuducu və taxıl anbarı, 8 istixana kompleksi, 2 ət
emalı, 2 konserv, 7 çörək zavodu daxildir. Həmin
müəssisələri təyinatına görə həm aqrar, həm də qeyri-neft
sənaye sektoruna aid
etmək olar. Deməli, bölgələrdə
sənaye müəssisələrinin yaradılması eyni zamanda aqrar
sektorun inkişafına dəstək verir. Bu, həm də analoji məhsulların ölkəmizə
idxalının azalması deməkdir.
Bir sözlə, dövlət
10 il ərzində qeyri-neft
sektorunu 2 dəfə artırmaq barədə
qarşıya qoyduğu məqsədə
çatmaq üçün
mühüm işlər görməklə
qeyri-neft sektorunda məhsul
istehsalını ildən-ilə artırmağa nail olur. Bu
istiqamətdə həyata keçirilən layihələrin nəticəsidir
ki, cari ilin birinci yarısında qeyri-neft sektorunda iqtisadi artım 11 faizə çatıb. Dünyada qlobal maliyyə
böhranının hələ tam aradan qalxmadığı bir
şəraitdə belə göstərici yüksək nəticə
kimi qəbul olunmalıdır.
Sənaye sektorunun
inkişafında yeni texnoparkların
yaradılmasının böyük əhəmiyyəti
var. Sumqayıt Texnoparkı hazırda 20-dən
çox müəssisədən ibarətdir
və burada müxtəlif çeşiddə
məhsullar istehsal edilir.
Lakin dövlət bununla
kifayətlənmir və başqa regionlarda da belə
texnoparkların yaradılmasını qarşıya məqsəd
kimi qoyub. Prezident İlham Əliyev
Nazirlər Kabinetinin son
iclasında bu məsələyə toxunaraq demişdir: "Sənayeləşmə
ilə bağlı artıq bütün müvafiq göstərişlər verilmişdir. Sadəcə olaraq,
bir daha qeyd etmək istəyirəm ki,
bu sahə prioritet olaraq qalır. Sənaye parklarının
yaradılması prosesi gedir.
Yaxın aylarda biz bu parklarda artıq yeni müəssisələrin
açılışını qeyd edəcəyik.
Azərbaycanın sənaye potensialı böyüyür,
artır. Hazırda tikilməkdə olan böyük sənaye kompleksləri Azərbaycanda
çox güclü ixracyönümlü sənaye potensialı
yaradacaqdır. Bu məsələlər
diqqət mərkəzindədir. Bakı, Sumqayıt, Gəncə,
Mingəçevir əsas sənaye şəhərlərimizdir
və bu şəhərlərdə sənaye
komplekslərinin tikintisi planlı şəkildə
təmin ediləcəkdir".
Rəsmi statistika da təsdiqləyir
ki, cari ilin yanvar-iyun aylarında sənaye
sahələrində istehsal olunan malların və göstərilən xidmətlərin
həcmi əvvəlki ilin müvafiq
dövrünün səviyyəsini 0,3 faiz üstələyib və qeyri-neft
bölməsində 2,9 faizlik artım qeydə
alınıb.
Hesabat
dövründə özəl bölmədə istehsalın həcmi
sənaye məhsulunun 80,3 faizini təşkil
edib. Ümumi
istehsalın 93,1 faizi sənaye
mallarının (əmtəələrinin) istehsalı, 6,9 faizi sənaye xarakterli xidmətlərin göstərilməsi
hesabına yaradılıb.
Birinci yarımildə qida və içki
istehsalı müəssisələrində əvvəlki ilin eyni dövrü
ilə müqayisədə müvafiq olaraq 3,7 və 11,6 faiz
artım qeydə alınıb. Bu sahələrdə
məhsul artımı əsasən qənd və şəkər
tozu, üzlü süd, pendir və kəsmik,
cem və marmelad, pivə,
alkoqolsuz içkilər istehsalı sahələrində
daha yüksək olub.
Həmin dövrdə kompyuter,
elektron və optik məhsulların,
elektrik avadanlıqlarının
istehsalı sahəsində 123 milyon
manatlıq məhsul hazırlanıb. Əvvəlki ilin eyni dövrü
ilə müqayisədə kompyuter, elektron və optik məhsulların
istehsalı 53,3, elektrik
avadanlıqlarının istehsalı isə 4,7 faiz
artıb.
Sənaye sahələrində
yeni müəssisələrin fəaliyyətə
başlaması eyni zamanda
yeni iş yerlərinin
açılması deməkdır. Həm də yeni iş yerlərində
əməkhaqqı daha yüksəkdir. Bunun nəticəsidir
ki, cari ilin yanvar-may aylarında
ölkənin sənaye sahələrində
çalışan muzdlu işçilərin
sayı ötən illə müqayisədə 5,5 faiz artaraq 178,8 min nəfərə, onların orta
aylıq əməkhaqqı isə 7,8 faiz
yüksələrək 635,8 manata
çatıb.
Əməkhaqqının
daha çox
artımı emal sahəsinin elektrik avadanlıqlarının, dəri və
dəri məmulatlarının, nəqliyyat vasitələrinin,
geyim, tikinti
materiallarının, mebel, qida
məhsullarının, kağız və karton,
içki, ağac
emalı və ağac məmulatlarının
hazırlanması və
s. sahələrdə daha
yüksək olub. Bu
dövrdə qeyri-dövlət bölməsində
çalışan işçilərin orta
aylıq əməkhaqqı 6,4 faiz artaraq - 751,7 manat təşkil
edib.
Ölkəmizin iqtisadi tempinin yüksək
olması barədə Prezident İlham Əliyev Nazirlər Kabinetinin
2013-cü ilin birinci
yarısının sosial-iqtisadi
inkişafının yekunlarına və qarşıda duran vəzifələrə həsr olunmuş iclasında demişdir:
"Hesab edirəm ki,
Azərbaycanda iqtisadi artım bu il də dünya
miqyasında nümunə ola bilər. Ümumi daxili məhsul 5 faiz artmışdır və ən sevindirici hal ondan ibarətdir ki, qeyri-neft sektorumuz təxminən
11 faiz artmışdır. Bu,
son illər ərzində Azərbaycanda görülmüş işlərin, düzgün aparılan iqtisadi
islahatların nəticəsidir.
Bu
göstəricilər, deyə bilərəm ki,
dünya miqyasında ən yüksək səviyyədədir.
Çünki bizim əsas
hədəfimiz bu gün
qeyri-neft sektorunu inkişaf etdirməkdən ibarətdir və hesab edirəm ki, bu istiqamətdə çox
ciddi nailiyyətlər əldə edilib".
Rüstəm
KAMAL
Azərbaycan. - 2013.- 2 avqust.- S. 1.