YAP Gəncə şəhər təşkilatının VIII konfransı keçirilmişdir

Yeni Azərbaycan Partiyası (YAP) Gəncə şəhər təşkilatının VIII konfransı keçirilmişdir. AzərTAc xəbər verir ki, tədbirdə Yeni Azərbaycan Partiyasının sədr müavini-icra katibi, Milli Məclisin deputatı Əli Əhmədov, şəhər icra hakimiyyətinin başçısı Elmar Vəliyev, YAP İdarə Heyətinin üzvü, Milli Məclisin Aqrar siyasət komitəsinin sədri Eldar İbrahimov, YAP şəhər təşkilatının fəalları iştirak etmişlər.

Konfrans iştirakçıları əvvəlcə ulu öndər Heydər Əliyevin Gəncə şəhərində ucaldılmış abidəsini ziyarət etmiş, önünə gül dəstələri düzmüşlər.

Tədbirdə çıxış edən YAP-ın sədr müavini-icra katibi Əli Əhmədov demişdir ki, bu gün ölkənin hər yerində olduğu kimi, Gəncə şəhərində də ulu öndər Heydər Əliyevin siyasi kursunu yaşadan Yeni Azərbaycan Partiyasına əhalinin inamı olduqca böyükdür. Ölkəmizdə yeni iş yerlərinin yaradılması, əhalinin həyat şəraitinin yaxşılaşdırılması bölgələrdə də əhalinin ölkənin əsas siyasi qüvvəsi olan YAP ətrafında sıx birləşməsinə zəmin yaratmışdır.

Bildirilmişdir ki, qarşıdan gələn prezident seçkilərində partiyanın Gəncə şəhər təşkilatının malik olduğu əzəmətli resurs səmərəli şəkildə istifadə ediləcəkdir. Gəncəlilərin əhvali-ruhiyyəsi, ovqatı qarşıdan gələn prezident seçkiləri kampaniyasının kifayət qədər səmərəli keçirilməsi üçün ciddi əsaslar yaradır. Gəncədə gördüklərimiz, bu qədim şəhərin simasının dəyişməsi, müasirləşməsi, yeniləşməsi Prezident İlham Əliyevin həyata keçirdiyi Azərbaycanın bütövlüyü, müasirləşməsi, yenilənməsi strategiyasının bu gözəl diyarın timsalında özünün bariz ifadəsini bilavasitə göstərir. Bu, insanların ovqatının formalaşmasına təsir göstərir. Buradakı yenidənqurma, şəhərin simasının gündən-günə dəyişməsi hər şeydən əvvəl bir şəhər olaraq Gəncənin həyatında yeni bir başlanğıc deməkdir. Bu, Gəncədə insanların yaşaması üçün daha rahat şəraitin yaradılması deməkdir.

Konfransda şəhər icra hakimiyyətinin başçısı Elmar Vəliyev çıxış edərək bildirmişdir ki, Gəncədə görkəmli siyasi xadim Heydər Əliyevin yaratdığı partiyaya və bu gün onun siyasi kursunu layiqincə davam etdirən Prezident İlham Əliyevə xalqın böyük inamı və məhəbbəti vardır.

Qeyd olunmuşdur ki, xalqın iqtidar partiyasına olan inamı getdikcə daha da möhkəmlənir. Əgər 2007-ci ildə YAP Gəncə şəhər təşkilatının sıralarında 21 min 201 nəfər var idisə, bu gün bu rəqəm 26 min 780 nəfər təşkil edir. Ümumilikdə, bu şəhərdən partiyanın sıralarında olanların 58 faizi qadınlar, 55 faizini isə gənclərdir.

Çıxışlardan sonra təşkilati məsələlər müzakirə edilmişdir. Naqif Həmzəyev YAP Gəncə şəhər təşkilatının sədri seçilmişdir.

Konfransda həmçinin təşkilatın şura və idarə heyətinin tərkibi müəyyənləşmişdir.

Azərbaycan. - 2013.- 2 avqust.- S. 2.