Dövlət Proqramına niyə əməl olunmur

Daşkəsən rayonu üzrə qazlaşdırma 17 faiz təşkil edir

Əvvəlcə Xoşbulaq kəndində olduq. Şikayətçilərlə görüşdük. Hamı xəbər alır ki, hələ 2011-ci ilin iyun ayının 14-də qaz xəttinin təntənəli açılışı keçirildiyi halda niyə indiyə kimi bu yerlərə qaz verilmir? El arasında hətta belə bir zərb-məsəl yaranıb. "Açdılar və..qaçdılar". Bu laqeydliyə nə vaxt son qoyulacaq? Haqlı sualdır.

Məsələni aydınlaşdırmaq üçün rayon mərkəzinə gəldik. Gəlişimiz yerinə düşdü. Altı aylığın yekunları müzakirə olunurdu. Məruzə və çıxışları dinlədik. Bəlli oldu ki, ölkənin hər yerində olduğu kimi, dağlar diyarında da genişmiqyaslı abadlıq, quruculuq işləri görülür. Dövlətin qayğısı və köməyi sayəsində "Yeni Daşkəsən" layihəsi uğurla yerinə yetirilir. Prezidentin məxsusi sərəncamı ilə Zağalı-Kollu-Çıraqlı avtomobil yolu çəkilir. Çovdarda qızıl zavodu, rayonun mərkəzində və Quşçu qəsəbəsində hərəsi 16 mənzilli iki yaşayış binası tikilir. Şəhər beş saylı uşaq bağçası tamamilə yenidən qurulur. İcra hakimiyyəti üçün çoxmərtəbəli bina ucaldılır. Hələ sovetlər dövründə 7 rayon arasında bölüşdürülmüş Daşkəsənin yay otlaqlarının geri qaytarılması problemi həll olunur. Səfalı guşədə avtovağzal tikilir və bununla da Bakı, Sumqayıt, Lənkəran, Qazax, Gəncə marşrutları müasir nəqliyyat vasitələri ilə təmin ediləcəkdir. Digər məsələlər də tədricən yoluna düşür.

Ancaq elə problem də var ki, neçə vaxtdır bütün Daşkəsəni ciddi narahat edir. Bu, rayonun qazlaşdırılması məsələsidir. Millət vəkili Rövşən Rzayevin də iştirak etdiyi toplantıda bu barədə çox kəskin çıxışlar oldu. Bununla da Xoşbulaqda və rayonun digər kəndlərində qazın yoxluğu barədə eşitdiyimiz şikayətlərin tamamilə haqlı olduğunu yəqin etdik. Azərbaycanın hər sahəsinin sürətlə inkişaf etdiyi bir dövrdə ucqar dağ kəndinə bu cür laqeyd münasibət yolverilməzdir!

Bəlli olduğu kimi, dövlət başçısı İlham Əliyev yerlərdə sosial problemlərin həllinə xüsusi diqqət yetirir. Nazirlər Kabinetinin 2013-cü ilin birinci yarısının yekunları müzakirə edilən iclasda Prezident İlham Əliyev demişdir: "Bu ilin sonuna qədər qarşıya vəzifə qoyulmuşdur ki, bütün yaşayış məntəqələrinin 90 faizi qazlaşdırılmalıdır. Xüsusilə indi bölgələrdə bu iş geniş vüsət almışdır. Elə etməliyik ki, biz qazlaşdırmanı maksimum dərəcədə təmin edək".

"Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nda məsələ məhz belə qoyulmuşdur. "Azəriqaz"a bir vəzifə olaraq tapşırılmışdır ki, Daşkəsən rayonunda kəndlər qazlaşdırılsın. Bəri başdan deyək ki, "Azəriqaz" nədənsə bu mühüm dövlət tapşırığına son dərəcə laqeyd münasibət bəsləyir! Bu işdə hətta yalan məlumatlara, gözdən pərdə asmaq hallarına da yol verilir. 2011-ci ilin iyun ayının 14-də Xoşbulaq kəndində təntənəli surətdə təbii qaz xəttinin açılışı oldu. Bakıdan da gələn var idi, rayon mərkəzindən də! Hamı sevinc, fərəh içində! Təbriklər, alqışlar ara vermirdi...

Sən demə, bütün bunlar əbəs imiş! Aradan iki il keçir. Xoşbulaq hələ də qaza həsrət qalıb.(?!)

Niyə belə oldu? Daşkəsən Qaz İsitismar Sahəsində dedilər ki, Xoşbulağın qazlaşdırılması ilə "Azəriqaz" İstehsalat Birliyinin sifarişinə əsasən "Kainat" adlı özəl bir müəssisə məşğul olurdu. Bir müddət pis işləmədilər, təqribən 23 kilometr uzunluğunda daxili xətlər çəkdilər. 90 evə sayğaclar qoyuldu. Qazın təntənəli açılışını təşkil etdilər. Sonra da nə oldusa, işləri yarımçıq qoyub getdilər. İndi bu yerlərdə qaz çəkilişi ilə başqa bir firma məşğul olur. Onun da işinin bir nəticəsi bilinmir.

Ölkə üzrə 90 faiz qazlaşdırmadan söhbət getdiyi bir dövrdə Daşkəsən rayonunda bu günə kimi 44 kənddən cəmi 4-nə qaz verilir. Başqa sözlə desək, rayonun qazlaşdırılmasına vur-tut 17 faiz əməl olunur. "Azərbaycanın Uralı" kimi tanınan çox mühüm metallurgiya mərkəzində niyə belə vəziyyət yaranıb? Dövlət Proqramına əməl etməyən "Azəriqaz"ın təqsiri göz qabağındadır. Görünür, bu işdə rayon icra hakimiyyəti ilə "Azəriqaz" arasında yaranmış mübahisə və münaqişələrin, qarşılıqlı ittihamların, məhkəmə çəkişmələrinin də təsiri az olmamışdır. Arada isə əhali əziyyət çəkir! Əlacsız qalan insanlar müvafiq təşkilatlara müraciət edir, kömək istəyirlər.

Dövlət Neft Şirkətinin Prezidenti Rövnəq Abdullayev 18 yanvar 2013-cü il tarixli məktubu ilə bildirmişdi ki, "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"na uyğun olaraq 2013-cü ildə Daşkəsən rayonunda təbii qazla təmin olunmayan 38 kənd və 3 qəsəbənin (41 yaşayış məntəqəsinin) mərhələlərlə qazlaşdırılması icra olunacaqdır".

Ondan bir qədər əvvəl 2012-ci ilin dekabr ayının 7-də "Azəriqaz" İstehsalat Birliyi baş direktorunun əsaslı tikinti üzrə müavini Qağaməli Seyfullayev əhalinin çoxsaylı məktublarına çox "ustalıqla", çox mətləbsiz cavab verib. Eyni gündə imzaladığı, eyni məzmunlu 12 məktubda müxtəlif ünvanlara, Zağalıya, Qazaxyolçulara, Bayana, Əmirvara, Quşçuya, Çovdara, Əhmədliyə, Kəmərqayaya, Gurbulağa, Muşavağa, Zəylik-Alonitə, Zinzahala eyni vədlər verilir: kəndinizin qazlaşdırılması növbəti ildə (yəni 2013-cü ildə) nəzərdə tutulmuşdur.

2013-cü il yarıdan ötüb. İkinci Dövlət Proqramının icra müddəti başa çatır. Dövlət Neft Şirkəti rəsmilərinin isə vədlərindən bir xəbər yoxdur! Daşkəsənlilər haqlı olaraq bilmək istəyirlər: Dövlət Proqramına niyə əməl edilmir?

"Azərbaycan" qəzeti Xoşbulaq kəndinə qaz çəkilişinin başa çatdırılıb əhaliyə təhvil verilməsindəki ciddi nöqsanlardan ikinci dəfədir ki yazır. Qəzetimizin 14 iyul 2013-ci il tarixli nömrəsində dərc olunmuş "Sevincimiz əbəs imiş" sərlövhəli yazıya "Azəriqaz" İstehsalat Birliyinin baş direktoru Əkbər Hacıyevin 30 iyul 2013-cü il tarixli cavab məktubunda Xoşbulaq kəndinə qaz çəkilişi ilə bağlı indiyədək çəkilən boru kəmərləri, fərdi evlərə ayrılan xətlər, qoyulan qaz sayğacları barədə ətraflı məlumat verilir. Amma nədənsə yenə də mavi qazın evlərə hansı səbəbdən bugünədək verilməməsi və qaz verilişinin dəqiq nə vaxt baş tutacağı barədə bir kəlmə də danışılmır. Cavab məktubundakı "...hal-hazırda bu istiqamətdə işlərin icrası mərhələlərlə davam etdirilir" müəmması isə ümiddən daha çox şübhələrə yol açır.

Xoşbulaq kənd sakinləri qaz kəmərlərinin çəkilişinə görə minnətdardırlar! Amma onlar mənzillərində mavi alovun şölələnməsini istəyirlər. Nə qədər ki, bu hadisə baş verməyib, kəndin qazlaşdırılması barədə danışıqlar məntiqsiz görünür. Biz də kənd camaatına qoşularaq eyni sualı bir daha "Azəriqaz" İstehsalat Birliyinin rəhbərliyinə ünvanlayırıq: "Xoşbulaq kəndundə mavi qaz nə vaxt alovlanacaq?"

Əhməd İSAYEV

Azərbaycan. - 2013.- 2 avqust.- S. 5.