Səbail rayonu məktəblilərinin yay istirahəti mənalı keçəcək

Yeniyetmə və gənclərin asudə vaxtlarının, onların istirahətinin səmərəli təşkili hər zaman Səbail Rayon İcra Hakimiyyətinin diqqət mərkəzində saxlanılır. Bu istiqamətdə həyata keçirilən işlərdən biri rayonun aztəminatlı ailələrindən olan yeniyetmələr üçün Quba rayonuda "Şahinlər" hərbi vətənpərvərlik təmayüllü yay istirahət düşərgəsinin yaradılmasıdır. Düşərgədə uşaqlar üçün hər cür şəraitin yaradılması və istirahətin ödənişsiz olması valideynlər tərəfindən razılıqla qarşılanmışdır.

Ümumiyyətlə, Səbail rayonunda gənc nəslin Vətənə məhəbbət, Azərbaycan dövlətçiliyinə sədaqət ruhunda tərbiyə olunması və layiqli vətəndaş kimi yetişməsi istiqamətində aparılan işlərə diqqət xeyli artırılmışdır. Şagirdlərin builki yay istirahətinin səmərəli təşkili ilə bağlı avqust ayında Daxili İşlər Nazirliyinin Daxili Qoşunları, "Çağ Öyrətim İşlətmələri" və "Azercell" şirkətlərinin birgə layihəsinə əsasən rayonun Qarabağ müharibəsi veteranları və əlillərinin, aztəminatlı ailələrin övladları, həmçinin "SOS-Azərbaycan" uşaq kəndində və müxtəlif uşaq evlərində tərbiyə alan 200 nəfər uşaq Quba şəhərinin mənzərəli guşəsində yerləşən hərbi vətənpərvərlik təmayüllü "Şahinlər" yay istirahət düşərgəsinə yola salınmışdır.

Düşərgənin hərbi vətənpərvərlik təmayüllü olması nəzərə alınaraq RİH tərəfindən əvvəlcədən bir sıra təşkilati işlər görülmüş, uşaqlar üçün xüsusi geyim və forma, lazımi idman ləvazimatları alınmış, Daxili Qoşunların Quba şəhərindəki "N" saylı hərbi hissəsi tərəfindən düşərgənin həyətində hərbi səhra çadırları, Milli Qəhrəman Mübariz İbrahimova və "Şahinlər" düşərgəsinin fəaliyyətinə həsr olunmuş stendlər quraşdırılmışdır. Daxili Qoşunlar və Bakı Türk Liseyinin Quba filialı tərəfindən bura tələb olunan bütün ləvazimatlarla təmin olunmuşdur.

Düşərgədə uşaqların istirahətinin daha da maraqlı və yaddaqalan edilməsi üçün məşğələləri rayonun orta məktəblərində çalışan idman və ibtidai-hərbi hazırlıq müəllimləri ilə yanaşı, Daxili Qoşunlar tərəfindən düşərgəyə təhkim olunmuş zabit və çavuşlar keçəcəklər.

Dünən keçirilən yolasalma mərasimində çıxış edən Səbail Rayon İcra Hakimiyyətinin başçısı Asif Əsgərov Prezident İlham Əliyevin yeniyetmə və gənclərin sağlam böyüməsi, gənc nəslin Vətənə məhəbbət, Azərbaycan dövlətçiliyinə sədaqət ruhunda tərbiyə olunması istiqamətində görülən işlərdən, yeniyetmələrə olan diqqət və qayğıdan danışmış, onlara şən istrahət arzulamışdır. Bildirilmişdir ki, düşərgənin fəaliyyəti Səbail RİH-in və rayonun digər təşkilatçıların daim diqqət mərkəzində olacaqdır.

Yola düşməzdən əvvəl gənc "Şahinlər" ulu öndər Heydər Əliyevin abidəsini ziyarət edərək önünə çiçək dəstələri düzmüş, xatirəsini ehtiramla yad etmişlər.

Rəşad BAXŞƏLİYEV

Azərbaycan. - 2013.- 2 avqust.- S. 7.