Mənsum İBRAHİMOV: «Qəbələ Beynəlxalq Musiqi Festivalından zövq almamaq mümkün deyildir»

"Qəbələ Beynəlxalq Musiqi Festivalından zövq almamaq mümkün deyildir. Çünki bu möhtəşəm incəsənət bayramı ildən-ilə daha da təkmilləşmiş və ötən 5 il ərzində dünyada kifayət qədər tanınmışdır.

Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban xanım Əliyevanın təşəbbüsü, diqqət və qayğısı nəticəsində keçirilən bu möhtəşəm festival çərçivəsində bizim muğamlarımızın tanıdılması üçün də geniş imkanlar yaradılmışdır".

Bu sözləri Heydər Əliyev Fondunun təşkilatçılığı ilə uğurla davam edən V Qəbələ Beynəlxalq Musiqi Festivalının iştirakçısı, görkəmli xanəndə, xalq artisti Mənsum İbrahimov AzərTAc-a müsahibəsində demişdir.

Mənsum İbrahimov yerli və xarici qonaqların iştirakı ilə keçirilən bu konsert axşamında muğam və xalq mahnılarını təqdim etdiyini bildirmişdir. Qeyd etmişdir ki, biz həm öz tamaşaçılarımıza, həm də xaricdən gələn qonaqlara Azərbaycan muğamının hər zaman zənginliyi ilə insanları heyrətləndirdiyini göstərə bildik. Tamaşaçılar bir daha Azərbaycan muğamlarının dünyada özünəməxsusluğu ilə seçilməsinin şahidi oldular. Muğam axşamında gənc və istedadlı xanəndələr Aytən Məhərrəmova, Arzu Əliyeva, Azərbaycan Milli Konservatoriyasının dosentləri, əməkdar artistlər Elçin Həşimov (tar) və Elnur Əhmədov (kamança) və digər musiqiçilər iştirak etdilər.

Xalq artisti Mənsum İbrahimov bu musiqi festivalında muğama xüsusi yer verən, bu sahənin geniş təbliği və dünyada tanıdılması üçün daim mühüm işlər görən Azərbaycanın birinci xanımı Mehriban Əliyevaya dərin minnətdarlığını bildirmişdir.

Azərbaycan. - 2013.- 2 avqust.- S. 7.