Bu il «Şahdəniz»ə 2,8 milyard dollardan çox vəsait xərclənəcək

Ötən il "Şahdəniz" yatağı üzrə məcmu əməliyyat xərcləri 269,3 milyon dollar, əsaslı xərclər 1,1 milyard dollar olmuşdur.

Cari ildə "Şahdəniz" yatağı üzrə əməliyyat işlərinə 222 milyon, əsaslı işlərə isə 2,67 milyard dollar vəsaitin xərclənməsi planlaşdırılır. Keçən ilin may ayında "Şahdəniz" yatağında ilk dəfə 5 quyudan hasilata başlanmışdır.

Ötən il "Şahdəniz" yatağından təxminən 7,73 milyard kubmetr qaz və 16,1 milyon barel kondensat hasil edilmişdir. Bu, gündə təxminən 21,1 milyon standart kubmetr qaza və 44 min 100 barel kondensata bərabərdir.

Ümumiyyətlə, 2006-cı ilin sonlarında "Şahdəniz" yatağından hasilat başlanandan 2012-ci ilin sonunadək yerli və beynəlxalq bazarlara 37,6 milyard kubmetr qaz və 80 milyon barel kondensat ixrac edilmişdir.

Xatırladaq ki, "Şahdəniz" qaz yatağı 1999-cu ildə kəşf edilmişdir. Onun rezervuar qalınlığı 1000 metrdən artıq, uzunluğu 22 kilometrdir. Yataq sahildən dənizə doğru 70 kilometr məsafədə, suyun dərinliyi 50-600 metr arasında dəyişdiyi bir ərazidə yerləşir. Geoloji baxımdan mürəkkəb olan "Şahdəniz" yatağı çox yüksək təzyiqə malikdir və onun çoxsaylı rezervuar "horizontları" var.

Azərbaycan. - 2013.- 3 avqust.- S. 5.