Gədəbəy işıqlı yol üstədir

Gədəbəyin öz iş üslubu var. Otaqlarda, bağlı qapılar arxasında oturmağı xoşlamırlar. Xüsusən də yay aylarında... Hamı çöldə-çəməndə, iş başında olur, hər kəsin konkret tapşırığı, iş yeri var. Kimi kartof sahələrinə gedir, kimi örüşdə mal-qaraya baş çəkir, kimi körpü, yol çəkilişində, kimi də tikinti-təmir sahəsində olur. Bütün bu işlər rayon icra hakimiyyəti başçısının sərəncamı ilə yaradılmış operativ qərargah tərəfindən tənzimlənir.

İcra hakimiyyətinin başçısı Ramiz Yediyarovla Söyüdlü kəndinin yanında, Çolpan çayı üzərində inşa edilən körpüdə görüşdük. Qaravəllər avtomobil yolunun çəkilişindən qayıdıb, mütəxəssislərlə, ustalarla söhbət edirdi.

Söyüdlü körpüsü Bakı-Şəmkir səmtindən Gədəbəyə yeganə giriş yolu, bu dağlar diyarının qapısıdır. Neçə vaxtdır ki, yararsız hala düşmüşdü. Dövlət başçısının göstərişi ilə kifayət qədər vəsait ayrıldı. İndi Gəncə 2 saylı körpü tikinti idarəsinin mütəxəssisləri tərəfindən yenidən qurulur. Böyük obyektdir. 84 metr uzunluğunda beş aşırımlıdır. İşin xeyli hissəsi başa çatıb. Son tamamlama işləri görülür. Ətrafda genişmiqyaslı abadlıq, quruculuq işləri aparılır. Ramiz Yediyarov obyektin rayon üçün vacibliyini xüsusi vurğuladı. İşlərin vaxtında və keyfiyyətlə başa çatdırılması üçün elə burada - iş başında, ayaqüstü operativ yığıncaq keçirilir.

Gədəbəy bir işıqlı yol üstədir. Prezidentin tapşırıqları, Regionların sosial-iqtisadi inkişafı Dövlət Proqramı sistemli surətdə yerinə yetirilir. Baxırsan, hər yanda qızğın iş gedir. Dağlar diyarı əsl tikinti meydanına bənzəyir. Müxtəlif obyektlər tikilir, içtimai binalar, fərdi evlər, ticarət mərkəzləri... hərəsi bir-birindən gözəl. Təzəlikcə statistika idarəsi binasının açılışı oldu. Fövqəladə Hallar Nazirliyi rayon şöbəsi və Baytarlıq idarəsi üçün tikilən inzibati binalarda və onlarca irili-xırdalı obyektlərdə son tamamlama işləri gedir. Ölkədə analoqu olmayan "Aşıq musiqi məktəbi", kartofsaxlama və çeşidləmə mərkəzi, süd emalı sexi, mineral sudoldurma zavodu, Samanlıq və Arıqıran kəndlərində məktəb binaları, ən ucqar kəndləri bürüyən yollar, körpülər, sərhəd bölgəsinə doğru uzanan qaz xətləri... Bunların hər biri dağlar diyarı üçün çox dəyərli obyektlər sayılır.

Ramiz Yediyarov deyir ki, körpülərin, keçidlərin və yolların təmiri bu yerlərin ən əsas problemidir. Dövlət başçısı İlham Əliyevə ürəkdən minnətdarıq ki, hər sahədə olduğu kimi, bu işdə də bizə kömək və qayğı göstərir. Prezidentin sərəncamı ilə Gədəbəy-Novosaratovka-Qaravəllər avtomobil yolu çəkilir. Uzunluğu 56 kilometrdir, 87 yaşayış məntəqəsini birləşdirəcək. Miskinli və Şınıx bölgəsində də yolların təmiri üzrə xeyli işlər görülüb. Düzyurd-Miskinli bölgəsində altı kilometr yola qum-çınqıl döşənib. Digər kəndlərdə də yollar sahmana salınır. Novosaratovka kəndindəki Findıqlı çayı üzərində 96 metr uzunluğunda beşaşırımlı körpü tikilib. Bu, onlarla kənd əhalisinin rahatlığı deməkdir.

Gədəbəyin daha önəmli bir problemi qazlaşma ilə bağlıdır. Dövlət başçısı İlham Əliyev bu yerlərə səfəri zamanı sərhəd bölgəsinin qazlaşdırılması üçün konkret tapşırıq vermişdi. Prezidentin bu göstərişinə də layiqincə əməl olunur. İndiyə kimi Novosaratovka-Böyük Qaramurad- Şınıx bölgəsində onlarca yaşayış məntəqəsinə mavi yanacaq verilib. Sərhəd zonasında qazlaşdırma işi davam edir. Hazırda rayonun üç müxtəlif istiqamətində on bir yaşayış məntəqəsinin - Söyüdlü, Moruqlu, Çanaqçı, Nərimankənd, Qoşabulaq, Samanlıq, Pərizamanlı, Totuğlu, Miskinli və Çalburun kəndlərinin qazlaşdırılması üçün tədbir görülür.

Rayonun hər sahəsində sistemli surətdə iş gedir. İqtisadiyyat yüksəlir, məhsul istehsalı artır, sosial problemlər ardıcıl həll olunur. Cari ilin altı ayının yekunları və qarşıda duran vəzifələr müzakirə olunarkən bu barədə geniş söhbət getdi. İcra hakimiyyətinin başçısı Ramiz Yediyarov Nazirlər Kabinetinin 2013-cü ilin birinci yarısının yekunlarına həsr olunmuş iclasda Prezident İlham Əliyevin qarşıya qoyduğu vəzifələr baxımından rayonun göstəricilərini ətraflı təhlil etdi, sonra ayrı-ayrı idarə və müəssisə nümayəndələrinin məlumatları dinlənildi. Yekdilliklə qeyd olundu ki, gədəbəylilər cari ilin altı ayını uğurla başa vurub. Ümumi məhsul istehsalının həcmi 115 milyon manat olmuşdur ki, bu da ötən ilin müvafiq dövründəkinə nisbətən 47 milyon manat çoxdur. Bir zaman rentabelsiz sayılan aqrar sahədə altı ay ərzində 2,2 dəfə artım qeydə alınmışdır. Bu il əvvəllər olduğundan xeyli çox kartof və taxıl gözlənilir. Maldarlıq sahəsində də uğurlar göz qabağındadır.

Gəlir, qazanc artdıqca Gədəbəy əsl tikinti meydanına bənzəyir. Rayonun mərkəzində qəsəbə və kəndlərində genişmiqyaslı abadlıq-quruculuq işləri görülür. "Yeniləşən Azərbaycana yeni məktəb" proqramına uyğun olaraq, tədris ocaqlarının böyük əksəriyyəti müasir binalarla təmin olunub. Qoşabulaq, Slavyanka, Novosaratovka kəndlərində və başqa yerlərdə təzə binalar istifadəyə verilib. Hazırda daha bir neçə kənddə məktəb binalarının inşası davam edir. Müasir görkəmli binaların inşası ilə əlaqədar olaraq gözəl bir ənənə yaranmışdır. Hər yerdə məktəb binalarının səliqəli saxlanılması və tədrisin keyfiyyətinin yüksəlməsi üçün baxış-müsabiqələr keçirilir.

Ümumən səliqə-sahmana və abadlığa Gədəbəy rayonunun hər yerində xüsusi diqqət yetirilir. Küçə və yolları bəzəyən istinad divarları gözoxşayan üzlük materialları ilə bəzədilir. Onlarca binanın fasadlarına milli memarlıq üslubunda naxışlar çəkilir. Küçələrə, yollara asfalt döşənir. Hər yerdə işıq sistemi təzələnir.

Rayonun mərkəzi bazarı darısqal bir sahədə yerləşir, antisanitariya hökm sürürdü. Hazırda səfalı bir guşədə yeni bazar kompleksinin inşası aparılır. Bundan əlavə, Heydər Əliyev parkında giriş hissəsi və "Ana" abidə kompleksi yenidən qurulur.

Bir sözlə, Gədəbəydə qızğın iş gedir. Dağlar diyarında bir-birindən gərəkli, bir-birindən yaraşıqlı binalar tikilir. Bu, hələ böyük işlərin başlanğıcıdır. Yaxın vaxtlarda Heydər Əliyev Mərkəzinin, Bayraq meydanının, gənclər evinin və digər obyektlərin inşası nəzərdə tutulub. Gədəbəydə böyükdən kiçiyə kimi hamı çox yaxşı bilir ki, bütün bunlar hər bir regionun inkişafına xüsusi önəm verən cənab İlham Əliyevin qayğı və diqqətinin bəhrəsidir. Elə buna görə də gədəbəylilər ulu öndər Heydər Əliyevin layiqli davamçısı olan Prezident İlham Əliyevin daxili və xarici siyasətini ürəkdən bəyənir və onu yekdilliklə dəstəkləyirlər.

Bəli, Gədəbəy işıqlı yol üstədir. Bu quruculuq yolu, yüksəliş yolu, Vətənə, torpağa məhəbbət yolu, dövlətə, dövlətçiliyə sədaqət yoludur.

Əhməd İSAYEV

Azərbaycan. - 2013.- 4 avqust.- S. 5.