Şəkinin kəndləri
sürətlə abadlaşır
Dövlət dəstəyi
sayəsində bölgələrdə həyata keçirilən
abadlıq-quruculuq, yenidənqurma işlərinin miqyası
getdikcə genişlənir. İndi təkcə
rayon mərkəzlərinin deyil, kəndlərin də siması dəyişir.
Müasir dövrün
tələblərinə uyğun infrastruktur yaradılır, yollar
çəkilir, körpülər salınır. Əhalinin qaz, su, işıqla təminatının
yaxşılaşdırılması ilə əlaqədar müvafiq tədbirlər həyata keçirilir.
Şəki və onun kəndlərində də əsaslı
işlər görülür. İndi Şəkinin mərkəzindən istənilən
kəndə rahat gedə bilərsən - yollar abadlaşdırılıb, körpülər
salınıb. Onu da qeyd etmək lazımdır ki,
kənd yollarının asfaltlaşdırılması yerli sakinlərin həyat şəraitinin
yaxşılaşdırılmasında əhəmiyyətli rol oynayır.
İbrahimkənd Kənd İcra Nümayəndəliyi Fazıl və
İbrahimkənd kəndlərini əhatə edir.
Fazıl kəndinin 386 nəfər əhalisi, 115 təsərrüfatı
var. 186 təsərrüfatı olan İbrahimkənddə isə 716 nəfər
yaşayır. Kənd sakinləri əsasən
taxılçılıq və heyvandarlıqla məşğul
olurlar. Verilən subsidiyalar
əhalinin əkinçiliyə olan
marağını daha da
artırır. Hər kəs çalışır ki, pay torpaqları ilə
kifayətlənməsin, əlavə sahələr əksin. Söhbət etdiyimiz kənd
sakinlərindən Fərman Məmmədov, Nurməmməd Orucov, İsmayıl Rüstəmov və digərləri
dolanışıqlarından razılıqlarını bildirərək
vurğuladılar ki, dövlətin dəstəyi
əvəzində daha çox
çalışmalıdırlar.
Bu, bir həqiqətdir ki,
aparılan abadlıq-quruculuq işləri sakinlərin həyatına
xeyli rahatlıq gətirib. İcra
nümayəndəsi İlqar Məmmədov
bildirdi ki, təbii
qazın verilməsində uzunmüddətli fasilə
yaranmışdı. 2011-ci ilin sentyabr ayından isə fasilələr aradan qaldırılıb və nümayəndəliyin
hər iki kəndinə təbii qazın
verilməsi bərpa edilib. Həm
Fazılın, həm də İbrahimkəndin mərkəzi
yollarının asfaltlaşdırılması əhalinin
gediş-gəlişini rahatlaşdırıb.
Nümayəndəlikdə
tam (İbrahimkənd) və ümumi (Fazıl) orta məktəblər,
klub, kitabxanalar, feldşer-mama məntəqəsi fəaliyyət
göstərir. Əvvəllər çay
sularının uçurtduğu 3 körpü də yenidən qurulub
və nəqliyyatın hərəkəti ilə bağlı heç bir çətinlik
qalmayıb. Sakinlər əminliklə bildirdilər ki, Fazıl kəndində yeni
artezian quyularının qazılması da tezləşdiriləcək. Eyni
zamanda, İbrahimkənd tam
orta məktəbi üçün
yeni binanın tikintisi
də planlaşdırılacaq.
Kənddə olarkən
Şəki Şəhər İcra
Hakimiyyəti ərazi idarəetmə və yerli
özünüidarəetmə orqanları ilə iş şöbəsinin müdiri
Rəfael Mənəfovla rastlaşdıq. O bildirdi
ki, səyyar qəbullardan əlavə
ayrı-ayrı vaxtlarda da
kənd sakinləri ilə görüşüb
mövcud çətinlikləri və təklifləri
ilə maraqlanırlar. Onu da
qeyd etdi ki, bu yerlər qədim
yaşayış məskənləri olub.
Arxeoloji qazıntılar nəticəsində
bir çox tarixi faktlar üzə
çıxıb və ərazidə "Təpəbaşı
Nekropolu" yaradılıb. Bu isə Şəkinin turizm
potensialının genişləndirilməsi və gələcəkdə
yeni turist marşrutunun açılması deməkdir.
Şəkinin ən qədim
kəndlərindən biri də
Aşağı Küngüt kəndidir.
Sovetlər dönəmində 4 kənd - Aşağı Küngüt, Çapağan,
İbrahimkənd və Fazıl kəndləri "Orconikidze" adına kolxozda
birləşmişdi.
Alazan-Həftəran
vadisində yerləşən Aşağı Küngüt
icra nümayəndəliyinə 82 təsərrüfatı,
342 nəfər əhalisi olan Çapağan kəndi də daxildir.
Aşağı Küngütün isə
əhalisi 1369 nəfər, təsərrüfatının
sayı 388-dir. Kənd camaatı taxılçılıq və
maldarlıqdan əlavə, tərəvəzçiliklə məşğuldur.
Nümayəndəlikdə tam və ümumi orta məktəblər,
mədəniyyət evi, klub,
kitabxana, poçt
şöbəsi, elektron ATS, uşaq bağçası, həkim məntəqəsi
və şadlıq evi fəaliyyət
göstərir.
2011-ci ildə
Aşağı Küngüt kəndinə
təbii qaz verilib və
hazırda 224 abonent qazdan
istifadə edir. İlin
sonuna qədər Çapağan
kəndinin də qazlaşdırılması nəzərdə
tutulub.
Şəki Şəhər
İcra Hakimiyyəti
başçısının Aşağı Küngüt
üzrə nümayəndəsi Eysan Səfərov
bildirdi ki, suvarma və içməli su
ilə əlaqədar əvvəlki çətinliklər aradan qaldırılıb. Həmçinin əlavə
artezianların qazılması planlaşdırılıb. Son illər Küngüt
çayının suyunun azalması bir daha bu
sahəyə diqqətin vacibliyini zəruri
edir.
Aşağı
Küngüt tam orta məktəbin binası ötən əsrin
70-ci illərində tikildiyindən yenidənqurmaya ehtiyacı var. Öyrəndik ki, həm
bu məktəbin əsaslı təmiri, həm
də Çapağanda ümumi
orta məktəb üçün
yeni binanın tikintisi
regional Dövlət Proqramında nəzərdə
tutulub.
Söhbət etdiyimiz sakinlər də rahat
yolu həm yaşamaq,
həm də çalışmaq üçün
çox vacib amil saydıqlarını vurğuladılar. Bu sarıdan problemə 2012-ci ildə son qoyulub. Prezident İlham
Əliyevin müvafiq sərəncamına
əsasən, ayrılan vəsaitlə Şəki-Oğuz
magistralından Aşağı
Küngüt-Fazıl-İbrahimkənd-Aydınbulaq yolunadək olan 14 və
Aşağı Küngüt-Çapağan-Şəki-Yevlax
magistralına qədər olan 11 km-lik yollar yenidən qurulub, Aşağı Küngüt
kəndinin 2 km-lik mərkəzi yoluna asfalt döşənib.
Kənddən ayrılarkən
küngütlülər bir
arzularını da çatdırdılar.
Dedilər ki, taxılın,
maldarlıq və bağçılıq məhsullarının
satışında müəyyən çətinliklər var və kooperativləşməyə keçid məsələlərinə daha çevik
baxılması yaxşı olardı. Çünki
bu səbəbdən başqa
çətinliklər yaranır. Xırda təsərrüfatlar
həm əkin-səpində, həm də məhsulun bazara çıxarılmasında əziyyət
çəkirlər.
Telman
NƏZƏRLİ
Azərbaycan. - 2013.- 4 avqust.- S. 5.