V Qəbələ Beynəlxalq Musiqi Festivalı çərçivəsində növbəti kamera musiqisi axşamı olmuşdur

Heydər Əliyev Fondunun təşkilatçılığı ilə böyük uğurla reallaşdırılan V Qəbələ Beynəlxalq Musiqi Festivalı sona çatmaq üzrədir.

AzərTAc xəbər verir ki, avqustun 3-də festival çərçivəsində daha bir yaddaqalan konsert proqramı təqdim edilmişdir.

Kamera musiqisi axşamında müxtəlif nüfuzlu festivalların iştirakçısı və beynəlxalq müsabiqələrin laureatı, tanınmış Litva pianoçusu xanım Muza Rubaskite tamaşaçılara klassik Avropa bəstəkarlarının, o cümlədən Lüdviq Van Bethovenin "Sonata", Ferents Listin "Venesiya və Neapol", "Danteni oxuyarkən" əsərlərini təqdim etmişdir.

Məşhur pianoçunun çıxışı alqışlarla qarşılanmışdır.

Sankt-Peterburqda pianoçuların Beynəlxalq müsabiqəsinin qalibi olmuş Muza Rubaskite Avropa, ABŞ, Cənubi Amerika, Asiyanın bir çox şəhərlərində geniş konsert proqramları ilə çıxış etmişdir. İfaçılıqla yanaşı, Fransanın paytaxtı Paris şəhərində pedaqoji fəaliyyətlə də məşğul olan tanınmış pianoçunun bir sıra məşhur səsyazma şirkətlərində musiqi albomları işıq üzü görmüşdür.

Muza Rubaskite ötən əsrin 90-cı illərinin sonlarından tanınmağa başlamış və hazırda Litvada müasir caz, piano ifaçılığının ən parlaq simalarından biridir.

Dünya şöhrətli pianoçu indiyədək bir sıra mükafatların laureatı olmuş və çoxsaylı uğurlara imza atmışdır.

Azərbaycan. - 2013.- 4 avqust.- S. 7.