Elnur Əhmədov: «Azərbaycan muğamı çox güclü və sehrləyici təsirə malikdir»

"Azərbaycan muğamı çox güclü və sehrləyici təsirə malikdir. O, müxtəlif millətlərə mənsub olan insanları bir yerə, bir auditoriyaya toplamağı bacarır".

Bu sözləri Heydər Əliyev Fondunun təşkilatçılığı ilə keçirilən V Qəbələ Beynəlxalq Musiqi Festivalının iştirakçısı, əməkdar artist, Prezident təqaüdçüsü, kamança ifaçısı Elnur Əhmədov AzərTAc-a müsahibəsində demişdir.

Elnur Əhmədov gənc ifaçılara belə yüksək tədbirlərdə iştirak etmək üçün yaradılan şəraitə görə Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevaya minnətdarlığını bildirmişdir.

Qədim tarixə və zəngin mədəniyyətə malik olan Qəbələdə dünyaya səs salan belə bir tədbirin keçirilməsini yüksək qiymətləndirən Elnur Əhmədov bu mötəbər incəsənət bayramı ilə təəssüratlarının unudulmaz olduğunu demişdir. Bildirmişdir ki, festivalda iştirak etdiyim üçün özümü xoşbəxt hiss edirəm. Bəlkə də bu barədə günlərlə danışa bilərəm. Bu, əslində, musiqinin təntənəsidir. Festival həm də xalqlar arasında qarşılıqlı mədəni əməkdaşlığa çox böyük təkandır. Bu da coğrafi baxımdan festivalın böyüklüyündən və əhəmiyyətindən xəbər verir.

Azərbaycan. - 2013.- 4 avqust.- S. 7.